വിഴിഞ്ഞം തീരശോഷണത്തെകുറിച്ച് പഠിക്കാൻ സർക്കാർ വിദഗ്ധ സമിതിയെ നിയോഗിച്ചു. സമിതി പരിഗണിക്കുന്ന വിഷയങ്ങളിൽ തീരുമാനമായിട്ടുണ്ട്. സമീപപ്രദേശങ്ങളിൽ തീരശോഷണം സംഭവിച്ചിട്ടുണ്ടോ, മത്സ്യബന്ധന മേഖലയിലും സമുദ്ര ആവാസവ്യവസ്ഥയിലും തുറമുഖനിർമ്മാണം നിമിത്തം എന്തെങ്കിലും മാറ്റങ്ങൾ ഉണ്ടായിട്ടുണ്ടോ എന്ന് സമിതി പഠിക്കും. തീരദേശ സംബന്ധമായ എന്തൊക്കെ മാറ്റങ്ങളാണ് അവിടെ സംഭവിച്ചിട്ടുള്ളത് എന്നറിയാനായി മത്സ്യത്തൊഴിലാളി സംഘടനയുമായും ലത്തീൻ അതിരൂപതയുമായും സമിതി ചർച്ച ചെയ്യേണ്ടതുണ്ട്. പഠിക്കേണ്ട ദൂരം എത്രയാണെന്ന് സമിതിക്ക് നിശ്ചയിക്കാമെന്ന് സർക്കാർ പറഞ്ഞിട്ടുണ്ട്. തീര ശോഷണത്തെക്കുറിച്ച് പഠിക്കേണ്ട മേഖലകൾ കൃത്യമായി സർക്കാർ അടയാളപ്പെടുത്തിയിട്ടില്ല. ഒക്ടോബർ ആദ്യമാണ് പഠിക്കാനുള്ള വിദഗ്ധസമിതിയെ സർക്കാർ രൂപീകരിച്ച് ഉത്തരവ് ഇറക്കിയത്. സെൻട്രൽ വാട്ടർ ആൻഡ് പവർ റിസർച്ച് സ്റ്റേഷൻ അഡീഷണൽ ഡയറക്ടർ എം ഡി കുന്ദലെ യാണ് സമിതിയുടെ അധ്യക്ഷൻ. നാലുമാസം കൊണ്ട് ഇടക്കാല റിപ്പോർട്ടും ആറുമാസം കൊണ്ട് അന്തിമ റിപ്പോർട്ടും തയ്യാറാക്കി സമർപ്പിക്കാനാണ് സമിതിയോട് സർക്കാർ നിർദ്ദേശിച്ചിരിക്കുന്നത്.
