മഞ്ചേശ്വരം തെരഞ്ഞെടുപ്പ് കോഴക്കേസില് ബിജെപി.സംസ്ഥാന അധ്യക്ഷൻ കെ. സുരേന്ദ്രൻ
ഉള്പ്പെടെയുള്ള ആറ് പ്രതികള്ക്കും കോടതി ജാമ്യം അനുവദിച്ചു. കാസര്കോട് ജില്ല സെഷന്സ് കോടതിയാണ് ജാമ്യം അനുവദിച്ചുകൊണ്ട് ഉത്തരവിട്ടത്. നേരത്തെ ജില്ല സെഷന്സ് കോടതിയില് കെ സുരേന്ദ്രന് ഉള്പ്പെടെയുള്ള ആറു പ്രതികളും ജാമ്യ അപേക്ഷ സമര്പ്പിച്ചിരുന്നു. കെ സുരേന്ദ്രനും മറ്റു പ്രതികളും ഇന്ന് കോടതിയില് ഹാജരായി. കേസ് അടുത്ത മാസം 15ന് വീണ്ടും പരിഗണിക്കും.
2021ലെ നിയമസഭ തെരഞ്ഞെടുപ്പിൽ മഞ്ചേശ്വരത്തെ ബിഎസ്പി സ്ഥാനാർഥിയായ സുന്ദരക്ക് സ്ഥാനാർതിത്വം
പിൻവലിക്കാൻ രണ്ടര ലക്ഷം രൂപയും സ്മാർട്ട് ഫോണും നൽകിയെന്നും ഭീഷണിപ്പെടുത്തിയെന്നുമാണ് കേസ്.
സുരേന്ദ്രനെ കൂടാതെ യുവമോർച്ച മുൻ സംസ്ഥാന ട്രഷറർ സുനിൽ നായിക്ക്, ബിജെപി മുൻ ജില്ല അധ്യക്ഷൻ കെ.കെ. ബാലകൃഷ്ണ ഷെട്ടി, നേതാക്കളായ സുരേഷ് നായിക്, കെ.മണികണ്ഠ റൈ, ലോകേഷ് നോണ്ട എന്നിവരാണ് കേസിലെ മറ്റ് പ്രതികൾ.
ജാമ്യ അപേക്ഷ കോടതി പരിഗണിച്ചപ്പോള് പ്രൊസിക്യൂഷന് എതിര്ത്തില്ല. തുടര്ന്ന് കോടതി പ്രതികള്ക്ക് ജാമ്യം അനുവദിക്കുകയായിരുന്നു. ആദ്യമായാണ് കേസില് സുരേന്ദ്രന് കോടതിയില് ഹാജരാകുന്നത്. കെ. സുരേന്ദ്രന് പുറമെ കേസിലെ മുഴുവന് പ്രതികളും ഇര കെ.സുന്ദരയും കോടതിയിൽ എത്തിയിരുന്നു. കേസിൽ നിന്ന് ഒഴിവാക്കണമെന്നാവശ്യപ്പെട്ട് നൽകിയ വിടുതൽ ഹർജി പരിഗണിക്കുമ്പോഴാണ് കെ.സുരേന്ദ്രനടക്കമുള്ള പ്രതികളോട് ഹാജരാവാൻ കോടതി നിർദ്ദേശം നൽകിയത്.