ഇടുക്കി ചിന്നക്കനാലിൽ 301 കോളനിയിൽ വി ജെ ജോർജ് എന്നയാളുടെ വീട് ഇന്ന് അരിക്കൊമ്പൻ തകർത്തു. വീടിന്റെ അടുക്കളയും ഷെഡുമാണ് അരിക്കൊമ്പൻ തകർത്തത്. അയൽവാസികളും വനപാലകരും ചേർന്ന് പിന്നീട് ആനയെ തുരത്തുകയായിരുന്നു.
അതേസമയം അരിക്കൊമ്പനെ പറമ്പിക്കുളത്തേക്ക് മാറ്റുന്നതിനെതിരെ പ്രതിഷേധം ശക്തമാവുകയാണ്. അരിക്കൊമ്പനെ മാറ്റാൻ ഉദ്ദേശിക്കുന്ന സ്ഥലത്ത് നിരവധി ആദിവാസി കുടംബങ്ങൾ താമസിക്കുന്നുണ്ട്. നിലവിൽ കാട്ടാനശല്യം നേരിടുന്ന ഇവിടെ അരിക്കൊമ്പൻ കൂടി എത്തുമ്പോൾ ആക്രമണം രൂക്ഷമാവുമെന്ന ഭീതിയിലാണ് ആദിവാസി കുടുംബങ്ങൾ.