സെക്രട്ടേറിയറ്റിനു മുന്നില് ആശ വര്ക്കര്മാര് നടത്തുന്ന രാപ്പകല്സമരം ഇന്ന് 48-ാം ദിവസത്തിലേക്ക് കടന്നു. അനിശ്ചിതകാല നിരാഹാര സമരം 10-ാം ദിവസത്തിലും തുടരുകയാണ്. ഷൈലജ എസ്, ബീന പീറ്റര്, അനിതകുമാരി എന്നിവരാണ് നിരാഹാരം ഇരിക്കുന്നത്. അതേസമയം സെക്രട്ടേറിയറ്റിന് മുന്നില് നടത്തി വരുന്ന സമരത്തെ അവഗണിക്കുന്ന സമീപനം സംസ്ഥാന സര്ക്കാര് തുടരുകയാണ്.
ഈ സാഹചര്യത്തില് സമരം 50-ാം ദിവസം പൂര്ത്തിയാകുന്ന മാര്ച്ച് 31-ന് സമരവേദിയില് ആശാവര്ക്കര്മാര് തങ്ങളുടെ മുടി മുറിച്ച് പ്രതിഷേധിക്കാനായി തീരുമാനിച്ചിരിക്കുന്നുവെന്ന് സമരസമിതി നേതാവ് എസ് മിനി അറിയിച്ചു. തലസ്ഥാനത്തെ പ്രതിഷേധത്തിന് സമാനമായുള്ള പരിപാടികള് ജില്ലാ കേന്ദ്രങ്ങളില് സംഘടിപ്പിക്കുമെന്നും മിനി കുട്ടിച്ചേര്ത്തു.
സമരത്തിലുള്ള ആശ പ്രവർത്തകരും അനുഭാവം പ്രകടിപ്പിച്ചെത്തുന്നവരും മുടിമുറിച്ച് പ്രതിഷേധം അറിയിക്കും. ഉപരോധ സമരത്തിൽ പങ്കെടുത്ത ആശാ വർക്കർമാരുടെ ഒരു മാസത്തെ ഓണറേറിയം തടഞ്ഞതിലും കടുത്ത പ്രതിഷേധം ഉയരുന്നുണ്ട്. സമരം തുടരുന്നതിനിടെ 23 തദ്ദേശ സ്ഥാപനങ്ങൾ ആശമാർക്ക് അധികസഹായം പ്രഖ്യാപിച്ചിട്ടുണ്ട്. ആയിരം രൂപ മുതൽ ഏഴായിരം രൂപ വരെ അധികം നൽകുമെന്നാണ് പ്രഖ്യാപനം എന്നാൽ, ആശമാരെ തദ്ദേശ സ്ഥാപനങ്ങള് കബളിപ്പിക്കുന്നുവെന്നായിരുന്നു തദ്ദേശസ്വയംഭരണ മന്ത്രിയുടെ പ്രതികരണം
പുതുച്ചേരി സര്ക്കാര് ഓണറേറിയം 10,000 രൂപയില് നിന്ന് 18,000 രൂപയായി വര്ധിപ്പിച്ചിരിക്കുകയാണ്. ഇത് വെളിപ്പെടുത്തുന്നത് സംസ്ഥാനങ്ങള്ക്ക് ഓണറേറിയം സ്വതന്ത്രമായി വര്ധിപ്പിക്കാം എന്നതാണ്. ഈ പശ്ചാത്തലത്തില് പുതുച്ചേരിയെ മാതൃകയാക്കി സംസ്ഥാന സര്ക്കാര് ആശാവര്ക്കര്മാരുടെ ഓണറേറിയം വര്ധിപ്പിക്കാന് തയ്യാറാകണമെന്ന് കേരള ആശ ഹെല്ത്ത് വര്ക്കേഴ്സ് അസോസിയേഷന് സംസ്ഥാന പ്രസിഡന്റ് വി കെ സദാനന്ദന് ആവശ്യപ്പെട്ടു.