ജീവിതത്തിൽ ചില പ്രതിസന്ധികൾ അലട്ടുന്നതായി ഭാനുപ്രിയ പറയുന്നു. ഭർത്താവിന്റെ മരണശേഷം തനിക്ക് ഓർമ്മക്കുറവ് നേരിടുകയാണെന്നും അത് ജീവിതത്തെയും നൃത്തത്തെയും ഒരുപോലെ ബാധിച്ചു എന്നും നടി പറഞ്ഞു. പഠിച്ച കാര്യങ്ങൾ മറന്നു, നൃത്തത്തോടുള്ള താൽപര്യം കുറഞ്ഞു, കഴിഞ്ഞ രണ്ടു വർഷമായി ഓർമ്മക്കുറവ് നേരിടുന്നു തുടങ്ങിയ പ്രതിസന്ധികൾ തന്റെ ജീവിതത്തെ ഇപ്പോൾ പിൻതുടരുകയാണെന്നും അവർ പറഞ്ഞു. സിനിമാ സൈറ്റിൽ വച്ച് ഡയലോഗുകൾ വരെ മറന്നു പോകുന്ന സാഹചര്യങ്ങളും ഉണ്ടായിട്ടുണ്ട് എന്നും ഭാനുപ്രിയ തുറന്നു പറയുന്നു.
ഭർത്താവ് ആദർശ് 2018ൽ ഹൃദയാഘാതം മൂലമാണ് മരണമടഞ്ഞതെന്നും ഭർത്താവുമായി പിരിഞ്ഞു എന്നുള്ള വാർത്തകൾ തെറ്റാണെന്നും ഭാനുപ്രിയ വ്യക്തമാക്കി. പിരിമുറുക്കമോ വിഷാദമോ തന്നെ അലട്ടാറില്ലെന്നും മറവിക്ക് കാരണം മോശം ആരോഗ്യാവസ്ഥയാണെന്നും അവർ പറഞ്ഞു. ഭാനുപ്രിയയ്ക്ക് 20 വയസ്സായ ഒരു മകളുണ്ട് അഭിനയ. 20 വയസ്സുള്ള അഭിനയ ഇപ്പോൾ ലണ്ടനിലെ ലോഫ്ബറോ യൂണിവേഴ്സിറ്റിയിൽ വിദ്യാർത്ഥിനിയാണ്. ചെന്നൈയിൽ അമ്മയ്ക്കും സഹോദരനും ഒപ്പം താമസിക്കുകയാണ് ഇപ്പോൾ ഭാനുപ്രിയ.
തെന്നിന്ത്യൻ സിനിമാ ലോകത്ത് കുറഞ്ഞ സമയം കൊണ്ട് ഒരുപാട് ആരാധകരെ നേടിയെടുത്ത നായികയാണ് ഭാനുപ്രിയ. തമിഴ്, തെലുങ്ക്, ഹിന്ദി, മലയാളം എന്നീ ഭാഷകളിൽ ചെയ്ത സിനിമകളൊക്കെയും ഹിറ്റാക്കിയ നടി. സ്വപ്നം പൂക്കുന്ന കണ്ണുകളും വശ്യതയാർന്ന ചിരിയും കൊണ്ട് ആരാധകരുടെ ഹൃദയം കവർന്ന താരസുന്ദരിയാണ് ഭാനുപ്രിയ. അഴകിയ രാവണൻ, കൊച്ചു കൊച്ചു സന്തോഷങ്ങൾ, ഹൈവേ, രാജശില്പി തുടങ്ങിയവ ഭാനുപ്രിയയുടേതായി ശ്രദ്ധിക്കപ്പെട്ട സിനിമകളാണ്.