ഹൈക്കോടതിയുടെ കര്ശന നിബന്ധനകള്ക്ക് വിധേയമായി വയനാട്ടിലെ കുറുവ ദ്വീപ് തുറന്നു. എട്ട് മാസങ്ങള്ക്ക് ശേഷമാണ് വയനാട്ടിലെ പ്രധാന ടൂറിസം കേന്ദ്രമായ കുറുവ ദ്വീപ് സഞ്ചാരികള്ക്കായി തുറന്നുകൊടുത്തത്. സര്ക്കാര് നല്കിയ അപ്പീലിലാണ് ഇക്കോ ടൂറിസം കേന്ദ്രങ്ങള് തുറക്കാനുള്ള നടപടിയായത്. സഞ്ചാരികളെ പ്രവേശിപ്പിക്കുന്നതിന് നിയന്ത്രണമുണ്ട്.
പാക്കത്ത് പോളും പടമലയില് അജീഷും കാട്ടാന ആക്രമണത്തില്കൊല്ലപ്പെട്ടതോടെയാണ് കുറുവാദ്വീപിലേക്കുള്ള പ്രവേശനം നിര്ത്തിയത്. ഹൈക്കോടതി ഉത്തരവിന്റെ അടിസ്ഥാനത്തില് ജില്ലയിലെ മറ്റ് ഇക്കോടൂറിസം കേന്ദ്രങ്ങളും അടച്ചുപൂട്ടേണ്ട സ്ഥിതി വന്നു. പ്രതിദിനം 400 പേര്ക്കാണ് പ്രവേശനം അനുവദിച്ചിട്ടുള്ളത്. നേരത്തെയുണ്ടായിരുന്നതിന്റെ ഇരട്ടി നിരക്കാണ് നിലവില് ഈടാക്കുന്നത്. ഒരാള്ക്ക് 220 രൂപയാണ് പ്രവേശന ഫീസ്. ടിക്കറ്റ് വരുമാനം പങ്കുവയ്ക്കുന്നതുമായി ബന്ധപ്പെട്ട ഡിറ്റിപിസിയും വനംവകുപ്പും തമ്മിലുള്ള തര്ക്കം തുടരുന്നുണ്ട്. രണ്ട് ദിവസത്തിനുള്ളില് പ്രശ്നം പരിഹരിക്കുമെന്ന ഉപാധിയോടെയാണ് കുറുവദ്വീപ് തുറന്നത്. സൂചിപ്പാറ, മീന്മുട്ടി, കാറ്റുകുന്ന് ആനച്ചോല എന്നിവിടങ്ങളിലേക്കും സഞ്ചാരികളെ അടുത്ത ദിവസം മുതല് പ്രവേശിപ്പിക്കും.
പാക്കം ചെറിയമല കവാടത്തിലൂടെയും മാനന്തവാടി പാൽവെളിച്ചം വഴിയും സഞ്ചാരികളെ പ്രവേശിപ്പിച്ചു. രണ്ടിടത്തുമായി ആദ്യദിനം എത്തിയത് 132 സഞ്ചാരികൾ. പാക്കത്ത് 83 പേരും പാൽവെളിച്ചത്ത് 49 പേരും സന്ദർശകരായി. പ്രതികൂല കാലാവസ്ഥയും പാൽവെളിച്ചത്തെ അനിശ്ചിതത്വവുമെല്ലാം സഞ്ചാരികളുടെ എണ്ണത്തിൽ കുറവുണ്ടാക്കി. 400 പേർക്കാണ് ഒരുദിവസം പ്രവേശനാനുമതി. ഇരുഭാഗത്തും 200 പേരെവീതം കടത്തിവിടും.
പാക്കത്ത് രാവിലെ 9.30 മുതൽ സഞ്ചാരികളെ പ്രവേശിപ്പിക്കാൻ തുടങ്ങിയെങ്കിലും പാൽവെളിച്ചത്ത് വൈകി. പകൽ 12.30 ഓടെയാണ് സഞ്ചാരികളെ കടത്തിവിട്ടത്. പ്രവേശനം വൈകുന്നതിൽ കർമസമിതിയുടെ നേതൃത്വത്തിൽ പ്രദേശവാസികളുടെ പ്രതിഷേധവുമുണ്ടായി.