തത്കാല് ടിക്കറ്റ് ബുക്കിങ് പ്രക്രിയയില് ജൂലൈ 1 മുതല് ഇന്ത്യന് റെയില്വേ മൂന്ന് നിര്ണായക പരിഷ്കാരങ്ങള് അവതരിപ്പിക്കുകയാണ്. ഇനി ടിക്കറ്റെടുക്കാന് IRCTCയുമായി ബന്ധപ്പെട്ട ഈ 3 സുപ്രധാന മാറ്റങ്ങള് അറിഞ്ഞിരിക്കണം. അതുപ്രകാരം IRCTC അക്കൗണ്ടില് മാറ്റം വരുത്തിയാലേ ഇനി മുതല് എളുപ്പത്തില് ടിക്കറ്റ് ലഭ്യമാവുകയുള്ളൂ. ഇത് മുന്കൂറായി ചെയ്തുവച്ചില്ലെങ്കില് ടിക്കറ്റെടുക്കല് പ്രക്രിയ വൈകുകയും അത് ലഭിക്കാതെ വരുന്ന സാഹചര്യമുണ്ടാവുകയും ചെയ്യും. ആധാര് ഐആര്സിടിസി പ്രൊഫൈലുമായി എത്രയും വേഗം ബന്ധിപ്പിക്കണം. ബുക്കിങ്ങ് സമയത്ത് OTP വെരിഫിക്കേഷനായി ആരാണോ രജിസ്റ്റര് ചെയ്തത് അവരുടെ മൊബൈല് നമ്പറുള്ള ഫോണ് കൈവശം വയ്ക്കുക. കൗണ്ടറുകള് വഴിയുള്ള തത്കാല് ടിക്കറ്റുകള്ക്കും ആധാര് ലിങ്കിങ്ങ് ആവശ്യമാണ്. ഏത് തരത്തിലുള്ള തത്കാല് ടിക്കറ്റ് ബുക്കിങ്ങിനും, 2025 ജൂലൈ 15 മുതല്, ഒടിപി അടിസ്ഥാനമാക്കിയുള്ള വെരിഫിക്കേഷനും ആവശ്യമാണ്.
ഇന്ത്യന് റെയില്വേ തത്കാല് ബുക്കിങ്ങുകള് കൂടുതല് സുതാര്യവും സുഗമവും ആധികാരികവുമാക്കാന് ആണ് നിലവിലെ സംവിധാനങ്ങളില് ജൂലൈ 1 മുതല് പരിഷ്കരണം വരുത്തുന്നത്. ആധാര് അടിസ്ഥാനമാക്കിയുള്ള പരിശോധന, OTP അടിസ്ഥാനമാക്കിയുള്ള സുരക്ഷാ പരിശോധന, ഏജന്റുമാര്ക്കുള്ള ബുക്കിങ് സമയ നിയന്ത്രണങ്ങള് എന്നിവയാണ് നടപ്പാക്കുക.
ജൂലൈ 1 മുതല്, IRCTCയുടെ വെബ്സൈറ്റ്, ആപ്പ് എന്നിവ വഴി തത്കാല് ടിക്കറ്റുകള് ബുക്ക് ചെയ്യണമെങ്കില്, ആധാര് നമ്പര് അതുമായി ലിങ്ക് ചെയ്തിട്ടുണ്ടെന്ന് ഉറപ്പാക്കേണ്ടതുണ്ട്. ഈ പരിശോധന കൂടാതെ തത്കാല് ബുക്കിങ്ങുകള് ഓണ്ലൈനായി ചെയ്യാനാകില്ല. ജൂലൈ 15 മുതല്, ബുക്കിങ്ങ് പ്രക്രിയയില് ആധാര് അടിസ്ഥാനമാക്കിയുള്ള OTP പരിശോധന നിര്ബന്ധമാക്കും. ഇത് ബുക്കിങ്ങിന് അധിക സുരക്ഷാ തലം നല്കും. യഥാര്ഥ വ്യക്തികള് തന്നെയാണ് ടിക്കറ്റ് ബുക്ക് ചെയ്യുന്നതെന്ന് ഇതിലൂടെ ഉറപ്പാക്കാനുമാകും. ഏജന്റുമാര്ക്ക് ഇനി ആദ്യത്തെ 30 മിനിട്ടിനുള്ളില് തത്കാല് ടിക്കറ്റുകള് ബുക്ക് ചെയ്യാന് കഴിയില്ല. ദൈനംദിന യാത്രക്കാര്ക്ക് തത്കാല് ടിക്കറ്റുകള് നേടുന്നതിന് മികച്ച അവസരം നല്കുന്നതിനായി, അംഗീകൃത ഏജന്റുമാര്ക്ക് ബുക്കിങ് സമയ നിയന്ത്രണം ഏര്പ്പെടുത്തിയിരിക്കുകയാണ്. എസി ക്ലാസ് ടിക്കറ്റുകള്: ഏജന്റുമാര്ക്ക് രാവിലെ 10:30 ന് ശേഷം മാത്രമേ ബുക്ക് ചെയ്യാന് കഴിയൂ .(തത്കാല് ബുക്കിങ്ങ് രാവിലെ 10ന് ആരംഭിക്കും). നോണ്-എസി ക്ലാസ് ടിക്കറ്റുകള്: ഏജന്റുമാര്ക്ക് രാവിലെ 11:30 ന് ശേഷം മാത്രമേ ബുക്ക് ചെയ്യാന് കഴിയൂ (തത്കാല് ബുക്കിങ്ങ് രാവിലെ 11ന് ആരംഭിക്കും).