തെരഞ്ഞെടുപ്പിൽ ഇലക്ട്രോണിക് വോട്ടിംഗ് മെഷീനുകൾക്ക് (ഇവിഎം) പകരം ബാലറ്റ് പേപ്പറുകൾ ഉപയോഗിക്കണമെന്ന ഹർജി സുപ്രീം കോടതി ചൊവ്വാഴ്ച തള്ളി. തെരഞ്ഞെടുപ്പിൽ തോൽക്കുമ്പോൾ മാത്രമാണ് ഇവിഎമ്മിൽ കൃത്രിമം കാണിച്ചെന്ന ആരോപണം ഉയരുന്നതെന്ന് ജസ്റ്റിസുമാരായ വിക്രം നാഥ്, പി ബി വരാലെ എന്നിവരടങ്ങിയ ബെഞ്ച് പറഞ്ഞു.
“എന്താണ് സംഭവിക്കുന്നത്, നിങ്ങൾ തെരഞ്ഞെടുപ്പിൽ വിജയിക്കുമ്പോൾ, ഇവിഎമ്മുകൾ തകരാറിലാകില്ല, നിങ്ങൾ തെരഞ്ഞെടുപ്പിൽ തോൽക്കുമ്പോൾ, ഇവിഎമ്മുകൾ തകരാറാണെന്ന് പററയുന്നു.” ബെഞ്ച് പറഞ്ഞു.
ജനാധിപത്യം സംരക്ഷിക്കാൻ ബാലറ്റ് പേപ്പറുകൾ പുനഃസ്ഥാപിക്കുന്നത് അനിവാര്യമാണെന്നും ഇവിഎമ്മുകൾ കൃത്രിമം കാണിക്കാൻ സാധ്യതയുണ്ടെന്നും ഹർജിക്കാരനായ കെ എ പോൾ പറഞ്ഞു.
ആന്ധ്രാപ്രദേശ് മുഖ്യമന്ത്രി ചന്ദ്രബാബു നായിഡുവും മുൻ മുഖ്യമന്ത്രി ജഗൻ മോഹൻ റെഡ്ഡിയും ഇവിഎമ്മുകളിൽ കൃത്രിമം കാണിക്കുമെന്ന് അവകാശപ്പെട്ടിരുന്നുവെന്നും അദ്ദേഹം പറഞ്ഞു. ഇവിഎമ്മുകൾ ഹാക്ക് ചെയ്യാൻ കഴിയുമെന്ന ഇലോൺ മസ്കിൻ്റെ അവകാശവാദവും അദ്ദേഹം ചൂണ്ടിക്കാണിച്ചു. “എന്നാൽ, ചന്ദ്രബാബു നായിഡുവോ ശ്രീ റെഡ്ഡിയോ തോൽക്കുമ്പോൾ ഇവിഎമ്മുകളിൽ കൃത്രിമം നടന്നുവെന്നാണ് അവർ പറയുന്നത്, ജയിക്കുമ്പോൾ അവർ ഒന്നും പറയുന്നില്ല, ഞങ്ങൾ ഇത് എങ്ങനെ കാണും, ഞങ്ങൾ ഇത് തള്ളിക്കളയുകയാണ്.” ജസ്റ്റിസ് നാഥ് പറഞ്ഞു.
തെരഞ്ഞെടുപ്പ് സമയത്ത് വോട്ടർമാരെ സ്വാധീനിക്കുന്നതിനായി പണമോ മദ്യമോ മറ്റ് വസ്തുക്കളോ വിതരണം ചെയ്തതിന് കുറ്റക്കാരാണെന്ന് കണ്ടെത്തിയാൽ കുറഞ്ഞത് അഞ്ച് വർഷത്തേക്ക് സ്ഥാനാർത്ഥികളെ അയോഗ്യരാക്കാൻ ഇന്ത്യൻ തെരഞ്ഞെടുപ്പ് കമ്മീഷനോട് നിർദ്ദേശം നൽകണമെന്നും പാരാതിക്കാരൻ കോടതിയോട് അഭ്യർത്ഥിച്ചു.