ഡൽഹി- മീററ്റ് നമോ ഭാരത് ട്രെയിൻ ഫ്ലാ​ഗ് ഓഫ് ചെയ്ത് പ്രധാനമന്ത്രി നരേന്ദ്രമോദി

ഡൽഹി- മീററ്റ് നമോ ഭാരത് ട്രെയിൻ പ്രധാനമന്ത്രി നരേന്ദ്രമോദി ഫ്ലാ​ഗ് ഓഫ് ചെയ്തു. പുതിയതായി പണികഴിപ്പിച്ച 13 കിലോമീറ്റർ പാതയാണ് പ്രധാനമന്ത്രി നരേന്ദ്രമോദി രാജ്യത്തിന് സമർപ്പിച്ചത്. സാഹിബാബാദിനും ന്യൂ അശോക് ന​ഗറിനും ഇടയിലുള്ള 13 കിലോമീറ്റർ റെയിൽവേ ലൈനാണ് പ്രധാനമന്ത്രി ഉദ്ഘാടനം ചെയ്തത്. 4,600 കോടി രൂപ ചെലവിലാണ് ഇടനാഴി നിർമിച്ചിരിക്കുന്നത്. രാജ്യതലസ്ഥാനത്തിന്റെ മുഖഛായ മാറ്റുന്നതിനുള്ള 12,200 കോടിയുടെ വികസന പദ്ധതികളും പ്രധാനമന്ത്രി രാജ്യത്തിന് സമർപ്പിച്ചു.

ഉത്തർപ്രദേശിലെ സാഹിബാബാദിനെയും ഡൽഹിയിലെ അശോക് ന​ഗറിനെയും ബന്ധിപ്പിക്കുന്ന ഇടനാഴിയാണിത്. നമോ ഭാരത് ട്രെയിനിന്റെ ഉദ്ഘാടനത്തിന് ശേഷം സാഹിബാബാദ് ആർആർടിഎസ് സ്റ്റേഷൻ മുതൽ ന്യൂ അശോക് നഗർ ആർആർടിഎസ് സ്റ്റേഷൻ വരെ പ്രധാനമന്ത്രി യാത്ര ചെയ്തു. വിദ്യാർത്ഥികളോടൊപ്പം സംവദിച്ചുകൊണ്ടായിരുന്നു പ്രധാനമന്ത്രിയുടെ യാത്ര. വളരെ വ്യത്യസ്തമായ മെട്രോ സംവിധാനം എന്നതിലുപരി അതിവേ​ഗ യാത്രാസൗകര്യം ഒരുക്കുന്നതിന്റെ ഭാ​ഗമായാണ് നമോ ഭാരത് ട്രെയിനിന്റെ ഉദ്ഘാടനം നടന്നത്. സാഹിബാബാദിൽ നിന്ന് ന്യൂ അശോക് ന​ഗർ വരെ പ്രധാനമന്ത്രി യാത്ര ചെയ്തു

ഡൽഹിയിലെ പൊതു​ഗതാ​ഗത സംവിധാനങ്ങൾ ജനങ്ങൾക്ക് മികച്ച യാത്രാസൗകര്യങ്ങൾ നൽകുമെന്ന് പ്രധാനമന്ത്രി എക്സിൽ കുറിച്ചു. ഡൽഹിയിലെ ​​ഗതാ​ഗതം വിപുലീകരിക്കുന്നതിന് കേന്ദ്ര സർക്കാർ പ്രതിജ്ഞാബന്ധമാണെന്നും യാത്രാസൗകര്യങ്ങൾ കൂടുതൽ മെച്ചപ്പെടുത്തണമെന്നും പ്രധാനമന്ത്രി പറഞ്ഞു. ഡൽഹി മെട്രോയുടെ ജനക്പുരിക്കും കൃഷ്ണ പാർക്കിനുമിടയിലുള്ള പാതയും പ്രധാനമന്ത്രി ഉദ്ഘാടനം ചെയ്തു. 1,200 കോടി രൂപ ചെലവിലാണ് ഇവ നിർമിച്ചത്. മെട്രോയുടെ നാലാംഘട്ട നിർമാണ പ്രവർത്തനത്തിന്റെ ഭാ​ഗമായി റിതാല – കുണ്ട്ലി ഭാഗത്തിന്റെ തറക്കല്ലിടലും അദ്ദേഹം നിർവ്വഹിച്ചു.

പുതിയ RRTS സെക്ഷൻ നിലവിൽ വന്നതോടെ ഡൽഹിയെ മീററ്റുമായി ബന്ധിപ്പിക്കുന്ന ഏറ്റവും സൗകര്യപ്രദമായ വഴിയാണ് തുറന്നിരിക്കുന്നത്. മീററ്റിൽ നിന്ന് ഡൽഹിയിലെത്താൻ ഇനി 40 മിനിറ്റ് മതിയാകും. ഡൽഹി-മീററ്റ് നമോ ഭാരത് ഇടനാഴി പ്രവർത്തനക്ഷമമാകുന്നതോടെ, ഒരു ലക്ഷത്തിലധികം സ്വകാര്യ വാഹനങ്ങൾ നിരത്തുകളിൽ നിന്ന് കുറയ്‌ക്കാനും പ്രതിവർഷം 2.5 ലക്ഷം ടൺ കാർബൺ പുറന്തള്ളൽ കുറയ്‌ക്കാനും കഴിയുമെന്നാണ് വിലയിരുത്തൽ. പ്രധാനമന്ത്രി ഉദ്ഘാടനം ചെയ്ത സാഹചര്യത്തിൽ ജനുവരി അഞ്ചിന് വൈകിട്ട് അഞ്ച് മണി മുതൽ യാത്രക്കാർക്ക് തുറന്നുനൽകുന്നതാണ്. പുതുതായി ഉദ്ഘാടനം ചെയ്ത 13 കിലോ മീറ്റർ സെക്ഷനിൽ ആറ് കിലോമീറ്റർ ഭൂ​ഗർഭപാതയാണ്. ഇതിൽ ഡൽഹിയിലെ ഏറ്റവും സുപ്രധാനമായ ആനന്ദ് വിഹാർ സ്റ്റേഷനുമുണ്ട്. പ്രധാന ട്രാൻസിറ്റ് ഹബ്ബായ ഇവിടെ റെയിൽവേ സ്റ്റേഷൻ, ബസ് ടെർമിനൽ, ഡൽഹി മെട്രോ എന്നിവ ലഭ്യമാണ്. ന്യൂ അശോക് ന​ഗറിൽ നിന്ന് മീററ്റ് സൗത്തിലേക്ക് സ്റ്റാൻഡേർഡ് കോച്ചിൽ യാത്ര ചെയ്യുകയാണെങ്കിൽ 150 രൂപയാണ് ടിക്കറ്റ് നിരക്ക്. പ്രീമിയം കോച്ചിന് 225 രൂപയാണ്. 11 സ്റ്റേഷനുകളാണ് ആകെയുള്ളത്. എല്ലാ 15 മിനിറ്റ് കൂടുമ്പോഴും സ്റ്റേഷനിൽ ട്രെയിൻ എത്തും.