രാജ്യത്തെ എല്ലാ തെരഞ്ഞെടുപ്പുകളും ഒരു ദിവസത്തിലോ നിശ്ചിത സമയപരിധിക്കുള്ളിലോ സമന്വയിപ്പിക്കാൻ ലക്ഷ്യമിട്ടുള്ള കേന്ദ്രത്തിൻ്റെ ‘ഒരു രാജ്യം, ഒരു തിരഞ്ഞെടുപ്പ്’ നിർദ്ദേശം ഉടൻ യാഥാർത്ഥ്യമാകുമെന്ന് പ്രധാനമന്ത്രി ആവർത്തിച്ചു. ഈ നിർദ്ദേശം ഈ വർഷം ആദ്യം മന്ത്രിസഭ അംഗീകരിച്ചിരുന്നു. ഈ വർഷാവസാനം പാർലമെന്റിന്റെ ശീതകാല സമ്മേളനത്തിന് മുമ്പാകെ അവതരിപ്പിക്കും. സർദാർ വല്ലഭായ് പട്ടേലിന്റെ 149-ആം ജന്മവാർഷികത്തിൽ ഗുജറാത്തിലെ സ്റ്റാച്യു ഓഫ് യൂണിറ്റിയിൽ പുഷ്പാർച്ചന നടത്തിയ ശേഷം സംസാരിക്കുകയായിരുന്നു അദ്ദേഹം.
“ഞങ്ങൾ ഇപ്പോൾ ‘ഒരു രാഷ്ട്രം ഒരു തിരഞ്ഞെടുപ്പിന്’ വേണ്ടി പ്രവർത്തിക്കുകയാണ്. അത് ഇന്ത്യയുടെ ജനാധിപത്യത്തെ ശക്തിപ്പെടുത്തുകയും ഇന്ത്യയുടെ വിഭവങ്ങളുടെ മികച്ച ഫലം നൽകുകയും വികസിത ഇന്ത്യ എന്ന സ്വപ്നം സാക്ഷാത്കരിക്കുന്നതിൽ രാജ്യം പുതിയ ആക്കം കൈവരിക്കുകയും ചെയ്യും. ഇന്ന് ഇന്ത്യ ‘ഏകത്വ’ത്തിലേക്ക് നീങ്ങുകയാണ്. ഏകീകൃത സിവിൽ കോഡ്, അത് ഒരു മതേതര സിവിൽ കോഡാണ്.” അദ്ദേഹം പറഞ്ഞു.
ആർട്ടിക്കിൾ 370 റദ്ദാക്കിയതിനെ കുറിച്ചും പ്രധാനമന്ത്രി സംസാരിച്ചു. ആർട്ടിക്കിൾ 370 എന്നെന്നേക്കുമായി ഇല്ലാതാക്കിയെന്ന് അദ്ദേഹം പറഞ്ഞു. ഒരു തരത്തിലുള്ള വിവേചനവുമില്ലാതെ ജമ്മു കശ്മീരിൽ നിയമസഭ തെരഞ്ഞെടുപ്പ് നടന്നു. ഇന്ത്യൻ ഭരണഘടന അനുസരിച്ച് ആദ്യമായി ഒരു മുഖ്യമന്ത്രി സത്യപ്രതിജ്ഞ ചെയ്തു. ഈ കാഴ്ചകൾ ഇന്ത്യൻ ഭരണഘടന സൃഷ്ടിച്ചവരെ അങ്ങേയറ്റം ആനന്ദിപ്പിക്കുന്നുണ്ടാകുമെന്നും പ്രധാനമന്ത്രി കൂട്ടിച്ചേർത്തു.
എല്ലാ വർഷവും ഒക്ടോബർ 31 ന് പട്ടേലിന്റെ ജന്മദിനം ആഘോഷിക്കുന്ന രാഷ്ട്രീയ ഏകതാ ദിവസ് ആഘോഷങ്ങൾക്കായി പ്രധാനമന്ത്രി മോദി തൻ്റെ രണ്ട് ദിവസത്തെ ഗുജറാത്ത് സന്ദർശനത്തിലാണ്. ഇന്ത്യക്ക് സ്വാതന്ത്ര്യം ലഭിച്ച് 70 വർഷങ്ങൾക്ക് ശേഷമാണ് രാജ്യത്ത് ഒരു ഭരണഘടന എന്ന പ്രമേയം പൂർത്തീകരിച്ചതെന്നും പ്രധാനമന്ത്രി പറഞ്ഞു.
രാജ്യത്തെ തൻ്റെ സർക്കാരിൻ്റെ കഴിഞ്ഞ 10 വർഷത്തെ ഭരണത്തിൽ ദേശീയ സുരക്ഷയ്ക്കെതിരായ നിരവധി ഭീഷണികൾ ഇല്ലാതാക്കിയതായി പ്രധാനമന്ത്രി മോദി പറഞ്ഞു. “ഇന്ത്യയെ ദ്രോഹിക്കുന്നത് ഫലം നൽകില്ലെന്ന് തീവ്രവാദികളുടെ ‘യജമാനന്മാർക്ക്’ ഇപ്പോൾ അറിയാം, കാരണം ഇന്ത്യ അവരെ വെറുതെ വിടില്ല.” അദ്ദേഹം പറഞ്ഞു.