പുത്തൻ പ്രതീക്ഷകളുമായി 2023 ന് സ്വാഗതം. ലോകം മുഴുവൻ ആഘോഷാരവങ്ങളോടെ 2023നെ വരവേറ്റു. കോവിഡ് ഭീതി നിലനിൽക്കുന്ന സാഹചര്യത്തിൽ പോലും രാജ്യം ഒട്ടാകെ ആഘോഷങ്ങളോടെയാണ് പുതുവർഷത്തെ വരവേറ്റത്. സംസ്ഥാനത്തെ വിവിധ കേന്ദ്രങ്ങളിൽ വിപുലമായ ആഘോഷ പരിപാടികൾ നടന്നു. നാടും നഗരവും അലങ്കാരദീപങ്ങളാൽ വിസ്മയക്കാഴ്ച ഒരുക്കി. ആഘോഷങ്ങൾ അതിരു കടക്കാതിരിക്കാൻ പോലീസിന്റെ ശക്തമായ നിരീക്ഷണവും ഉണ്ടായിരുന്നു.
സംസ്ഥാനത്തെ വിവിധ കേന്ദ്രങ്ങളിൽ വിപുലമായ ആഘോഷങ്ങളാണ് പുതുവത്സരം പ്രമാണിച്ച് സംഘടിപ്പിച്ചത്. കൊച്ചി, കോവളം, കോഴിക്കോട്, തിരുവനന്തപുരം എന്നിവിടങ്ങളിലായിരുന്നു ഏറ്റവും കൂടുതൽ ആഘോഷങ്ങൾ നടന്നത്. ഫോർട്ട് കൊച്ചിയിൽ എല്ലാവർഷത്തെയും പോലെ പാപ്പാഞ്ഞി കത്തിച്ചാണ് പുതുവർഷത്തെ ജനങ്ങൾ വരവേറ്റത്. ആഘോഷങ്ങൾ കാണാൻ സംസ്ഥാനത്തിന്റെ പല മേഖലയിൽ നിന്നുള്ളവർ ഫോർട്ടുകൊച്ചിയിൽ എത്തിയിരുന്നു.
തലസ്ഥാനനഗരിയിൽ കോവളത്താണ് പുതുവത്സര ആഘോഷ പരിപാടികൾ നടന്നത്. ലോകമെമ്പാടുമുള്ള മലയാളികൾക്ക് മുഖ്യമന്ത്രി പിണറായി വിജയൻ ആശംസകൾ നേർന്നു. സമത്വവും സൗഹൃദവും പുരോഗതിയും പുലരുന്ന ഒരു പുതുവർഷത്തെയാണ് മുഖ്യമന്ത്രി ആശംസിച്ചത്. കോവിഡ് സാഹചര്യം നില നിന്നിരുന്നതിനാൽ കഴിഞ്ഞ വർഷം പുതുവത്സര പരിപാടികൾ രാത്രി 10 മണി വരെയായിരുന്നു. എന്നാൽ ഇത്തവണ ആഘോഷാരവങ്ങളോടെ പുതുവർഷത്തെ വരവേറ്റു എന്ന് മാത്രമല്ല രാവിലെ വരെ പലയിടത്തും പരിപാടികൾ നീണ്ടുനിന്നു.
ലോകത്ത് ഇത്തവണ 2023 ആദ്യം പിറന്നത് പസഫിക് സമുദ്രത്തിലെ കിരിബാത്തി ദ്വീപിലാണ്. വൈകിട്ട് ഇന്ത്യൻ സമയം മൂന്നരയോടെയാണ് ദ്വീപിലുള്ളവർ പുതുവർഷത്തെ വരവേറ്റത്. പിന്നാലെ ന്യൂസിലാൻഡിൽ ആഘോഷം തുടങ്ങി. 2023നെ വരവേറ്റ ആദ്യ പ്രധാന നഗരമായിരുന്നു ന്യൂസിലാൻഡിലെ ഓക് ലൻഡ്. തുടർന്ന് ഓസ്ട്രേലിയ, ജപ്പാൻ, ഇന്തോനേഷ്യ, സിംഗപ്പൂർ, നോർത്ത് സൗത്ത് കൊറിയ തുടങ്ങിയ രാജ്യങ്ങളും പുതുവർഷം ആഘോഷിച്ചു.