ദുബായ് ഗ്ലോബൽ വില്ലേജിൽ ആദ്യ പുതുവത്സരം പിറന്നു. യുഎഇയുമായി 4 മണിക്കൂർ വ്യത്യാസമുള്ള ഫിലിപ്പൈൻസിൽ പുതുവർഷം എത്തിയ സമയം അതായത് യുഎഇ സമയം രാത്രി 8 മണിക്ക് ഫിലിപ്പീൻസിനൊപ്പം ദുബായ് ഗ്ലോബൽ വില്ലേജിൽ പുതുവർഷം പിറന്നു. കരിമരുന്നു പ്രയോഗത്തോടെയാണ് ഫിലിപ്പൈൻസ് പുതുവർഷം ആഗോളഗ്രാമത്തിൽ ആദ്യമായി ആഘോഷിച്ചത്. തുടർന്ന് 9 മണിക്ക് തായ്‌ലൻഡിന്റെ പുതുവർഷം, 10ന് ബംഗ്ലാദേശും, 10.30ന്, ഇന്ത്യയും 11ന് പാക്കിസ്ഥാനും 12ന് യുഎഇയും 1 മണിക്ക് തുർക്കിയും ഗ്ലോബൽ വില്ലേജിൽ പുതുവത്സരം ആഘോഷിക്കും. ഒരു മണിക്ക് തുർക്കിയുടെ പുതുവർഷത്തോടെയാണ് ആഘോഷങ്ങൾ സമാപിക്കുക. ഓരോ പുതുവത്സരപ്പിറവിക്കും കൗണ്ട്ഡൗണും ഗ്ലോബൽ വില്ലേജ് ഒരുക്കുന്ന പ്രത്യേക വെടിക്കെട്ടും ഉണ്ടായിരിക്കും. 7 രാജ്യങ്ങളിൽ പുതുവർഷം പിറക്കുന്നസമയത്ത് ഗംഭീര വെടിക്കെട്ടോടൊപ്പം മറ്റു കലാപരിപാടികളും അതാത് രാജ്യങ്ങളുടെ പവലിയനിൽ അരങ്ങേറുന്നുണ്ട് .
വിവിധ രാജ്യങ്ങളിലെ 27 പവലിയനുകളും 3,500ലധികം ഷോപ്പിങ് ഔട്ട്‌ലെറ്റുകൾ, വിവിധ വിനോദങ്ങൾ, സാംസ്‌കാരിക പരിപാടികൾ എന്നിവയെല്ലാം സംഗമിക്കുന്ന ദുബായ് ഗ്ലോബൽ വില്ലേജിലേക്ക് പുതുവത്സരം ആഘോഷിക്കാൻ സന്ദർശകരുടെ ഒഴുക്കാണ് അനുഭവപ്പെടുന്നത്. ഇന്ന് വൈകീട്ട് നാലിന് ആരംഭിച്ച് നാളെ പുലർച്ചെ രണ്ടുവരെയാണ് പുതുവത്സരരാവിൽ ഗ്ലോബൽ വില്ലേജ് പ്രവർത്തിക്കുക. വിവിധ സാംസ്‌കാരിക പരിപാടികൾക്കൊപ്പം സംഗീതപരിപാടികളും ഗ്ലോബൽ വില്ലേജിൽ അരങ്ങേറുന്നുണ്ട് . വിവിധ രാജ്യങ്ങളുടെ പവലിയനുകളിലും വ്യത്യസ്ത പരിപാടികൾ നടക്കുകയാണ്. ഇന്ന് സ്ത്രീകൾക്കും കുടുംബങ്ങൾക്കും മാത്രമായി സംവരണം ചെയ്തിരിക്കുകയാണെന്ന് നേരത്തെ ഗ്ലോബൽ വില്ലജ് അധികൃതർ അറിയിച്ചിരുന്നു.
മാത്രവുമല്ല ആഘോഷണങ്ങളോടൊപ്പം ഡാൻസ്, ഡിജെ ഉൾപ്പെടെ വമ്പൻ ആഘോഷ പരിപാടികളാണ് അണിയറയിൽ ഒരുങ്ങുന്നത്. കഴിഞ്ഞ വര്ഷങ്ങളിലേത് പോലെ ഇക്കുറിയും സന്ദർശകർ ഏറെ എത്തുമെന്നാണ് സംഘാടകർ പ്രതീക്ഷിക്കുന്നത്. സന്ദർശകബാഹുല്യം കണക്കിലെടുത്ത് എല്ലാ സുരക്ഷാ സൗകര്യവും ഗ്ലോബൽ വില്ലേജ് അധികൃതർ ഒരുക്കിയിട്ടുണ്ട്.