അഡ്‌ലെയ്ഡ്: ദക്ഷിണാഫ്രിക്കയ്‌ക്കെതിരെ നെതര്‍ലന്‍ഡ്സ് അട്ടിമറി ജയം നേടിയതോടെ ട്വന്റി-20 ക്രിക്കറ്റ് ലോകകപ്പിൽ നിന്ന് ദക്ഷിണാഫ്രിക്ക പുറത്തായി. ഇതോടെ ഇന്ത്യ സെമി ഉറപ്പിച്ചു. ഞായറാഴ്ച ഉച്ചയ്ക്ക് സിംബാവെയുമായാണ് ഇന്ത്യയുടെ അവസാന മത്സരം. ഇതിന് മുമ്പായി തന്നെ പോയിന്റുകളുടെ അടിസ്ഥാനത്തില്‍ ഇന്ത്യ സെമി ഉറപ്പിച്ചിച്ചു. പാകിസ്താനും ബംഗ്ലാദേശും തമ്മിലുള്ള മത്സരം ജയിക്കുന്നവര്‍ക്ക് സെമിയില്‍ പ്രവേശിക്കാം. ഗ്രൂപ്പ് രണ്ടിലെ അവസാനത്തെ നിര്‍ണായക പോരാട്ടത്തില്‍ ഇറങ്ങുന്ന ബംഗ്ലാദേശിനും പാകിസ്താനും നിലവില്‍ നാല് പോയിന്റ് വീതമാണുള്ളത്. വിജയിക്കുന്നവര്‍ സെമിയില്‍ പ്രവേശിക്കും.
ടോസ് നേടി ഫീല്‍ഡിങ് തിരഞ്ഞെടുത്ത ദക്ഷിണാഫ്രിക്കന്‍ ക്യാപ്റ്റന്‍ ടെമ്പ ബാവുമ നെതര്‍ലന്‍ഡ്സിനെ ബാറ്റിങ്ങിനയക്കുകയായിരുന്നു. നാല് വിക്കറ്റ് നഷ്ടത്തില്‍ നെതര്‍ലന്‍ഡ്സ് 158 റണ്ണെടുത്തു. ബാറ്റിങ്ങിനിറങ്ങിയ നെതര്‍ലന്‍ഡ്സിന് ഭേദപ്പെട്ട സ്‌കോര്‍ സമ്മാനിച്ച കോളിന്‍ അക്കര്‍മാന്‍ ആണ് മത്സരത്തിലെ താരം. മറുപടി ബാറ്റിങ്ങിനിറങ്ങിയ ദക്ഷിണാഫ്രിക്കയെ 145 റണ്‍സില്‍ നെതര്‍ലന്‍ഡ്സ് ബൗളര്‍മാര്‍ തളച്ചു. എട്ടുവിക്കറ്റും വീഴ്ത്തി. ദക്ഷിണാഫ്രിക്കയെ നെതര്‍ലന്‍ഡ്സ് 13 റണ്ണിനാണ് പരാജയപ്പെടുത്തിയത്.