ഖാലിസ്ഥാനി തീവ്രവാദ ഭീഷണിയെത്തുടർന്ന് ഡൽഹി, പഞ്ചാബ് വിമാനത്താവളങ്ങളിൽ നവംബർ 30 വരെ നിയന്ത്രണം. ബ്യൂറോ ഓഫ് സിവിൽ ഏവിയേഷൻ സെക്യൂരിറ്റി ഡൽഹിയിലെ ഇന്ദിരാഗാന്ധി അന്താരാഷ്ട്ര വിമാനത്താവളത്തോടും പഞ്ചാബിലെ എല്ലാ വിമാനത്താവളങ്ങളോടും നവംബർ 30 വരെ താൽക്കാലിക സന്ദർശക പ്രവേശന പാസുകളൊന്നും നൽകരുതെന്ന് ആവശ്യപ്പെട്ടതായി വൃത്തങ്ങൾ അറിയിച്ചു. താത്കാലിക എയർപോർട്ട് എൻട്രി പാസുകളുമായി പ്രവർത്തന ആവശ്യങ്ങൾക്ക് പോകുന്ന സർക്കാർ ഉദ്യോഗസ്ഥർക്ക് ഇളവ് ഉണ്ടായിരിക്കും.
നവംബർ 19ന് എയർ ഇന്ത്യ വിമാനങ്ങൾ സംബന്ധിച്ച് ഖാലിസ്ഥാനി ഭീകരൻ ഗുർപത്വന്ത് സിംഗ് പന്നൂൻ നൽകിയ ഭീഷണിയുടെ അടിസ്ഥാനത്തിലാണ് നിയന്ത്രണത്തിന് നിർദ്ദേശങ്ങൾ നൽകിയിരിക്കുന്നത്. നവംബർ 19ന് എയർ ഇന്ത്യ വിമാനസർവീസുകൾ തടസ്സപ്പെടുത്തുമെന്ന് ഖലിസ്താൻ ഭീകരൻ ഗുർപത്വന്ത് സിങ് പന്നൂൻ ഭീഷണി മുഴക്കിയത്. 19ന് എയർ ഇന്ത്യ വിമാനത്തിൽ സിഖുകാർ യാത്രചെയ്യരുതെന്നും അതു ജീവൻ അപകടത്തിലാക്കുമെന്നുമാണ് നിരോധിത സിഖ് സംഘടനയായ സിഖ്‌സ് ഫോർ ജസ്റ്റിസിന്റെ (എസ്എഫ്ജെ) തലവൻ ഗുർപത്വന്ത് സിങ് പന്നൂൻ സാമൂഹികമാധ്യമങ്ങളിൽ ഭീഷണിമുഴക്കിയത്.
എയർ ഇന്ത്യ വിമാനങ്ങൾക്ക് സുരക്ഷ വർധിപ്പിക്കണമെന്ന് ഇന്ത്യ കാനഡയോട് ആവശ്യപ്പെട്ടു. കാനഡയിലേക്കും തിരിച്ച് ഇന്ത്യയിലേക്കും പോകുന്ന എയർ ഇന്ത്യ വിമാനങ്ങൾക്ക് സുരക്ഷ വർധിപ്പിക്കണമെന്നാണ് ഇന്ത്യൻ ഹൈക്കമ്മീഷണർ കനേഡിയൻ അധികൃതരോട് നിർദേശിച്ചിരിക്കുന്നത്. കനേഡിയൻ നഗരങ്ങളായ ടൊറന്റോ, വാൻകൂവർ എന്നിവിടങ്ങളിൽ നിന്ന് ഡൽഹിയിലേക്ക് എയർ ഇന്ത്യ ആഴ്ചയിൽ ഒന്നിലധികം നേരിട്ടുള്ള ഫ്ളൈറ്റുകൾ സർവീസ് നടത്തുന്ന പശ്ചാത്തലത്തിലാണ് ഇന്ത്യ ഇക്കാര്യം ആവശ്യപ്പെട്ടത്. നിരോധിത യുഎസ് ആസ്ഥാനമായുള്ള സിഖ് ഫോർ ജസ്റ്റിസ് (എസ്എഫ്ജെ) സംഘടനയുടെ തലവനായ പന്നൂൻ 2019 മുതൽ ദേശീയ അന്വേഷണ ഏജൻസിയുടെ (എൻഐഎ) നിരീക്ഷണത്തിലാണ്.