ചന്ദ്രോപരിതലത്തിന്റെ വ്യക്തതയുള്ള ചിത്രങ്ങൾ പുറത്തുവിട്ട് ഐഎസ്ആർഒ, സോഫ്റ്റ് ലാൻഡിംഗ് ബുധനാഴ്ച

ചന്ദ്രോപരിതലത്തിന്റെ കൂടുതൽ വ്യക്തതയുള്ള ചിത്രങ്ങൾ പുറത്തുവിട്ട് ഐഎസ്ആർഒ. ചന്ദ്രയാൻ മൂന്നിലെ ലാൻഡറിലെ ഹസാർഡ് ഡിറ്റെക്ഷൻ ആൻഡ് അവോയ്ഡൻസ് ക്യാമറ (എൽഎച്ച്ഡിഎസി) പകർത്തിയ ദൃശ്യങ്ങളാണിവ. ബുധനാഴ്ചയാണ് ചന്ദ്രയാൻ 3യുടെ സോഫ്റ്റ് ലാൻഡിംഗ്. വൈകുന്നേരം 6.4ന് ലാൻഡറിനെ ചന്ദ്രന്റെ ദക്ഷിണധ്രുവത്തിൽ ഇറക്കുമെന്നാണ് ഐഎസ്ആർഒ അറിയിച്ചത്.

ചന്ദ്രോപരിതലത്തിൽ സുരക്ഷിതമായി ഇറങ്ങുന്നതിന് പാറകളോ ഗർത്തങ്ങളോ ഇല്ലാത്ത ഭാഗം കണ്ടെത്താനാണ് ക്യാമറ സഹായിക്കുന്നത്. റോവർ ചന്ദ്രോപരിതലത്തിൽ വിവിധ ശാസ്ത്രീയ പരീക്ഷണഘങ്ങൾ നടത്തും. അവിടെ ജലം, മഞ്ഞ്, ധാതുക്കൾ എന്നിവയെക്കുറിച്ച് പഠനം നടത്തും.

ബുധനാഴ്ചയാണ് ചന്ദ്രയാൻ 3യുടെ സോഫ്റ്റ് ലാൻഡിംഗ്. വൈകുന്നേരം 6.4ന് ലാൻഡറിനെ ചന്ദ്രന്റെ ദക്ഷിണധ്രുവത്തിൽ ഇറക്കുമെന്നാണ് ഐഎസ്ആർഒ അറിയിച്ചത്. ലാൻഡർ മോഡ്യൂളിനെ ചന്ദ്രന്റെ ഏറ്റവും അടുത്ത ഭ്രമണപഥത്തിൽ എത്തിച്ചിട്ടുണ്ട്. ഞായറാഴ്ച പുലർച്ചെ രണ്ട് മണിക്കാണ് ഡീബൂസ്റ്റിംഗ് പ്രക്രിയ നടന്നത്. നിലവിൽ ചന്ദ്രന്റെ 25 കിലോമീറ്റർ അടുത്തുള്ള ഭ്രണണപഥത്തിലാണ് ചന്ദ്രയാൻ 3യുള്ളത്. 4.2 കിലോമീറ്റർ നീളവും 2.5 കിലോമീറ്റർ വീതിയുമുള്ള സ്ഥലത്തായിരിക്കും ലാന്റിംഗ് നടക്കുക. വിക്രം ലാൻഡറും പ്രഗ്യാൻ എന്ന റോവറും അടങ്ങുന്നതാണ് ചന്ദ്രയാൻ 3. ചന്ദ്രനിൽ സോഫ്റ്റ് ലാൻഡിംഗ് നടത്തുന്നത് ലാൻഡറാണ്.

ചന്ദ്രയാൻ -2 ദൗത്യത്തിന്റെ തുടർച്ചയായാണ് ഈ ദൗത്യം അവതരിപ്പിച്ചത്. 2019 സെപ്റ്റംബറിൽ വിക്രം ലാൻഡർ ലാൻഡിംഗ് ശ്രമത്തിനിടെ ഉദ്ദേശിച്ച പാതയിൽ നിന്ന് വ്യതിചലിക്കുകയും ആശയവിനിമയം നഷ്ടപ്പെടുകയും ചെയ്തതോടെയാണ് ദൗത്യത്തിന് തിരിച്ചടി നേരിട്ടത്. ആ ദൗത്യത്തിന്റെ പരാജയങ്ങളിൽ നിന്ന് പഠിച്ച പാഠങ്ങൾ കൂടി ഉൾപ്പെടുത്തിയാണ് ചന്ദ്രയാൻ-3 രൂപകൽപന ചെയ്തിരിക്കുന്നത്. അൽഗോരിതങ്ങൾ പരിഷ്‌ക്കരിക്കുന്നതും സോഫ്‌റ്റ്വെയർ തകരാറുകൾ ലഘൂകരിക്കാനുള്ള നടപടികളും ഇതിൽ ഉൾപ്പെടുന്നു.

ചന്ദ്രയാൻ 3 സമ്പൂർണ്ണ വിജയമാണെങ്കിൽ ചന്ദ്രനിൽ സോഫ്റ്റ് ലാൻഡിംഗ് നടത്തുന്ന ലോകത്തിലെ നാലാമത്തെ രാജ്യമായി ഇന്ത്യ മാറും. പഴയ സോവിയറ്റ് യൂണിയൻ, യുഎസ്, ചൈന എന്നിവയാണ് ഈ പട്ടികയിൽ ആദ്യ മൂന്ന് സ്ഥാനങ്ങളിൽ ഉള്ളത്.