മിഷോങ് ചുഴലിക്കാറ്റിനെ തുടർന്നുണ്ടായ വെള്ളപ്പൊക്കത്തെ തുടർന്ന് ചെന്നൈയിലെ സ്‌കൂളുകൾക്കും കോളേജുകൾക്കും വെള്ളിയാഴ്ച അവധി പ്രഖ്യാപിച്ചു. ചുഴലിക്കാറ്റിനെ തുടർന്നുണ്ടായ മഴ വേളാച്ചേരി, താംബരം തുടങ്ങിയ പ്രദേശങ്ങളെ വെള്ളത്തിനടിയിലാക്കി. ചെന്നൈയിലെ വിവിധ പ്രദേശങ്ങളിൽ തുടർച്ചയായ മൂന്നാം ദിവസവും പാൽ ഉൾപ്പടെയുള്ള ആവശ്യ സാധനങ്ങളുടെ വിതരണം തടസ്സപ്പെട്ടതായും റിപോർട്ടുകൾ ഉണ്ട്.
ചൊവ്വാഴ്ച ആന്ധ്രാപ്രദേശ് തീരത്ത് വീശിയടിച്ച മിഷോങ് ചുഴലിക്കാറ്റിന്റെ ആഘാതത്തെ തുടർന്ന് ചെന്നൈയിൽ കഴിഞ്ഞ തിങ്കൾ, ചൊവ്വ ദിവസങ്ങളിൽ തുടർച്ചയായി മഴ പെയ്തു. തുടർച്ചായി പെയ്ത ഈ മഴയാണ് വെള്ളപ്പൊക്കത്തിന് കാരണമായത്. വീടുകളിലേക്ക് വെള്ളം കയറി, തെരുവുകൾ നദികളായി, മരങ്ങളും വൈദ്യുത തൂണുകളും തകർന്നു, വാഹനങ്ങൾ ഒഴുകിപ്പോകുകയും പൂർണ്ണമായും വെള്ളത്തിൽ മുങ്ങുകയും ചെയ്തു. ചുഴലിക്കാറ്റിനെ തുടർന്ന് ചെന്നൈയിലെ വിവിധ പ്രദേശങ്ങളിലും പ്രാന്തപ്രദേശങ്ങളിലും ഇപ്പോഴും വൈദ്യുതി തടസ്സം നേരിടകയാണ്. മുടിച്ചൂരിലെ സന്നദ്ധപ്രവർത്തകർ വ്യാഴാഴ്ച മുട്ടോളം വെള്ളത്തിലൂടെ സഞ്ചരിച്ചാണ് ഭക്ഷണപ്പൊതികളും വെള്ളക്കുപ്പികളും വിതരണം ചെയ്തത്.
അതേസമയം പ്രളയക്കെടുതിയിൽ ചുഴലിക്കാറ്റ് ദുരിതാശ്വാസമായി തമിഴ്‌നാടിന് രണ്ടാം ഗഡുവായ 450 കോടി അനുവദിക്കാൻ പ്രധാനമന്ത്രി നരേന്ദ്ര മോദി കേന്ദ്ര ആഭ്യന്തര മന്ത്രാലയത്തിന് നിർദ്ദേശം നൽകി.
കഴിഞ്ഞ മൂന്ന് ദിവസമായി ചെന്നൈയിലെ പല പ്രദേശങ്ങളിലും സർക്കാർ നടത്തുന്ന ആവിൻ ബൂത്തുകളിൽ പാലിന് ക്ഷാമം നേരിടുന്നതായി താമസക്കാർ അറിയിച്ചു.