ഇവിഎമ്മിനെതിരെയുള്ള എല്ലാ ആരോപണങ്ങളും അടിസ്ഥാനരഹിതമാണെന്ന് തിരഞ്ഞെടുപ്പ് കമ്മീഷൻ അറിയിച്ചു. ഇലക്ട്രോണിക് വോട്ടിംഗ് മെഷീൻ (EVM) തുറക്കാൻ ഒ ടി പി ആവശ്യമില്ലെന്ന് തിരഞ്ഞെടുപ്പ് കമ്മീഷൻ വ്യക്തമാക്കി. ഇവിഎം അൺലോക്ക് ചെയ്യാൻ ഒടിപി ആവശ്യമില്ലെന്നും ഇവിഎമ്മിനെതിരെയുള്ള എല്ലാ ആരോപണങ്ങളും അടിസ്ഥാനരഹിതമാണെന്നും തിരഞ്ഞെടുപ്പ് കമ്മീഷൻ അറിയിച്ചു. ഇവിഎം ഹാക്ക് ചെയ്തെന്ന വാർത്തയുമായി ബന്ധപ്പെട്ടാണ് തിരഞ്ഞെടുപ്പ് കമ്മിഷൻ്റെ പ്രസ്താവന പുറത്ത് വന്നിരിക്കുന്നത്. ഫോണുകളുമായി ഇവിഎമ്മിന് ബന്ധമില്ലെന്ന് കമ്മീഷൻ വ്യക്തമാക്കി.
മുംബൈ നോർത്ത് വെസ്റ്റ് ലോക്സഭാ മണ്ഡലത്തിൽ 48 വോട്ടിന്റെ നേരിയ വ്യത്യാസത്തിൽ വിജയിച്ച ശിവസേന സ്ഥാനാർത്ഥി രവീന്ദ്ര വൈകാറിന്റെ ബന്ധുവിനെതിരെ മുംബൈ പോലീസ് കേസെടുത്തതിന് പിന്നാലെയാണ് തിരഞ്ഞെടുപ്പ് കമ്മീഷന്റെ പ്രതികരണം. വോട്ടിംഗ് മെഷീനുകൾ പ്രവർത്തിക്കാൻ ഒടിപി ആവശ്യമില്ലെന്ന് റിട്ടേണിംഗ് ഓഫീസർ വന്ദന സൂര്യവൻഷി മുംബൈയിൽ വാർത്താസമ്മേളനത്തിൽ വ്യക്തമാക്കി.
ഇവിഎം അൺലോക്ക് ചെയ്യാൻ ഒ ടി പി ആവശ്യമില്ല. ഇവിഎം എന്തുമായും ബന്ധിപ്പിച്ചിട്ടില്ല, തികച്ചും തെറ്റായ വാർത്തയാണ് പത്രം പ്രസിദ്ധീകരിച്ചിരിക്കുന്നത്. അപകീർത്തിപ്പെടുത്തിയതിനും തെറ്റായ വാർത്തകൾ പ്രചരിപ്പിച്ചതിനും ഇന്ത്യൻ ശിക്ഷാ നിയമത്തിലെ സെക്ഷൻ 499, 505 പ്രകാരം ദിനപത്രത്തിന് നോട്ടീസ് നൽകിയിട്ടുണ്ട്. പത്രത്തിൻ്റെ റിപ്പോർട്ടറെ ബോധ്യപ്പെടുത്താൻ ശ്രമിച്ചു. പൊലീസ് അന്വേഷണത്തിന് ശേഷം ആഭ്യന്തര അന്വേഷണം വേണോ വേണ്ടയോ എന്ന് തീരുമാനിക്കും. കോടതി ഉത്തരവില്ലാതെ സിസിടിവി ദൃശ്യങ്ങൾ ആർക്കും നൽകാൻ കഴിയില്ല. ഇവിഎം ഹാക്ക് ചെയ്യാൻ കഴിയില്ലെന്നും റിട്ടേണിംഗ് ഓഫീസർ വ്യക്തമാക്കി.
മഹാരാഷ്ട്രയിൽ നിന്നുള്ള ലോക്സഭാ എംപി രവീന്ദ്ര വയ്ക്കറുടെ ബന്ധു ഇലക്ട്രോണിക് വോട്ടിങ് മെഷീൻ (ഇവിഎം) അൺലോക്ക് ചെയ്യാൻ കഴിയുന്ന ഫോൺ ഉപയോഗിച്ചിരുന്നതായി ആയിരുന്നു കണ്ടെത്തൽ. ശിവസേന (ഏക്നാഥ് ഷിൻഡെ പക്ഷം) സ്ഥാനാർഥിയായിരുന്ന രവീന്ദ്ര വയ്ക്കർ മുംബൈ നോർത്ത് വെസ്റ്റ് ലോക്സഭാ സീറ്റിൽനിന്ന് 48 വോട്ടിനാണ് വിജയിച്ചത്. ഇത്തവണത്തെ ഏറ്റവും കുറഞ്ഞ ഭൂരിപക്ഷമായിരുന്നു ഇത്. ജൂൺ 4ന് വോട്ടെണ്ണുമ്പോഴാണ് വോട്ടെണ്ണൽ കേന്ദ്രത്തിൽവച്ച് മങ്കേഷ് മൊബൈൽ ഫോൺ ഉപയോഗിച്ചതായി മറ്റു സ്ഥാനാർഥികൾ പരാതി ഉന്നയിച്ചത്.