ദില്ലിയില്‍ വായു മലിനീകരണം അതിരൂക്ഷമായത് കണക്കിലെടുത്ത് എല്ലാ പ്രൈമറി സ്‌കൂളുകളും നവംബര്‍ 10 വരെ അടച്ചിടാന്‍ ഡല്‍ഹി സര്‍ക്കാര്‍ ഉത്തരവിട്ടു. 6-12 ഗ്രേഡുകളില്‍ ഓണ്‍ലൈന്‍ ക്ലാസുകള്‍ നടത്തണമെന്നാണ് നിര്‍ദ്ദേശം. ഡല്‍ഹി വിദ്യാഭ്യാസ മന്ത്രിയും ആം ആദ്മി പാര്‍ട്ടി (എഎപി) നേതാവുമായ അതിഷി എക്സില്‍ പങ്കുവെച്ച പോസ്റ്റിലൂടെയാണ് ഇക്കാര്യം അറിയിച്ചത്. നേരത്തെ എല്ലാ സര്‍ക്കാര്‍, സ്വകാര്യ പ്രൈമറി സ്‌കൂളുകളും നവംബര്‍ 2 വരെ അടച്ചിടാന്‍ ഡല്‍ഹി സര്‍ക്കാര്‍ ഉത്തരവിട്ടിരുന്നു. മലിനീകരണ തോത് മോശമായതിനെത്തുടര്‍ന്ന് സ്‌കൂളുകള്‍ താല്‍ക്കാലികമായി അടച്ചിടുന്നതായി ഡല്‍ഹി മുഖ്യമന്ത്രി അരവിന്ദ് കെജ്രിവാളാണ് അറിയിച്ചത്.
വായുഗുണനിലവാര സൂചിക 300ന് മുകളില്‍ അതീവ ഗുരുതരമാണെന്നിരിക്കേ 460 ആണ് ദില്ലിയില്‍ ഇന്ന് രാവിലെ രേഖപ്പെടുത്തിയ ശരാശരി വായുഗുണനിലവാര സൂചിക. . ദേശീയ തലസ്ഥാന മേഖലയുടെ (എന്‍സിആര്‍) ഭാഗമായ ഡല്‍ഹിയുടെ അയല്‍ നഗരങ്ങളായ നോയിഡ, ഗുരുഗ്രാം എന്നിവിടങ്ങളിലും മലിനീകരണതോത് ഉയര്‍ന്ന നിലയിലാണ്. നിര്‍മ്മാണ പ്രവര്‍ത്തനങ്ങള്‍ക്ക് നിരോധനമേര്‍പ്പെടുത്തുമെന്നും, മലിനീകരണ തോത് കുറക്കാന്‍ വാഹനങ്ങളുടെ എണ്ണം കുറക്കാന്‍ നിര്‍ദ്ദേശം നല്‍കുമെന്നും വ്യക്തമാക്കിയ പരിസ്ഥിതി മന്ത്രി ഗോപാല്‍ റായ്, പാഴ് വസ്തുക്കള്‍ കൂട്ടിയിട്ട് കത്തിക്കരുതെന്നും നിര്‍ദ്ദേശം നല്‍കി. പഞ്ചാബില്‍ കാര്‍ഷികാവശിഷ്ടങ്ങള്‍ കത്തിക്കുന്നത് തടയാന്‍ ശ്രമിച്ച ഉദ്യോഗസ്ഥര്‍ക്ക് നേരെ കര്‍ഷകര്‍ പ്രതിഷേധിച്ചതായും റിപ്പോര്‍ട്ടുകളുണ്ട്.
മലിനീകരണത്തിന് കാരണമാകുന്ന നിര്‍മാണ പ്രവര്‍ത്തനങ്ങള്‍ തടയുക, അത്തരം വാഹനങ്ങള്‍ ഡല്‍ഹിക്കുള്ളില്‍ പ്രവേശിക്കുന്നത് കര്‍ശനമായി നിരോധിക്കുക, ബിഎസ് 3 പെട്രോള്‍, ബിഎസ് 4 ഡീസല്‍ വാഹനങ്ങള്‍ക്ക് നിരോധനം ഏര്‍പ്പെടുത്തുക,മാലിന്യം കത്തിക്കുന്നത് തടയുക എന്നിവ അടക്കമുള്ള കാര്യങ്ങളിലാണ് സര്‍ക്കാരിന്റെ ഇപ്പോഴത്തെ ശ്രദ്ധയെന്ന് ഡല്‍ഹി പരിസ്ഥിതി മന്ത്രി ഗോപാല്‍ റായ് പറഞ്ഞു.
ദേശീയ തലസ്ഥാനത്തെ അപകടകരമായ വായു മലിനീകരണം തടയുന്നതിനുള്ള ഗ്രേഡഡ് റെസ്പോണ്‍സ് ആക്ഷന്‍ പ്ലാനിന്റെ (GRAP) ഘട്ടം III കേന്ദ്രം ഇതിനകം നടപ്പാക്കിയിട്ടുണ്ട്. അത്യാവശ്യമല്ലാത്ത നിര്‍മ്മാണ പ്രവര്‍ത്തനങ്ങള്‍, ഖനനം, പാറ പൊട്ടിക്കല്‍ എന്നിവയ്ക്കുള്ള നിരോധനവും ഡല്‍ഹി, ഗാസിയാബാദ്, ഗൗതം ബുദ്ധ നഗര്‍, ഗുരുഗ്രാം, ഫരീദാബാദ് എന്നിവിടങ്ങളില്‍ BS III പെട്രോള്‍, BS IV ഡീസല്‍ ഫോര്‍ വീലറുകള്‍ ഓടിക്കുന്നതിലുള്ള നിയന്ത്രണങ്ങളും ഇതില്‍ ഉള്‍പ്പെടുന്നു. ന്യൂ ഡല്‍ഹി മുനിസിപ്പല്‍ കൗണ്‍സില്‍ (എന്‍ഡിഎംസി) നഗരത്തിലെ വര്‍ദ്ധിച്ചുവരുന്ന വായു മലിനീകരണത്തെ ചെറുക്കുന്നതിന് നിരവധി നടപടികള്‍ കൈക്കൊണ്ടിട്ടുണ്ട്. ദേശീയ തലസ്ഥാനത്തെ പ്രധാന റോഡുകളിലെ മരങ്ങളിലും കുറ്റിച്ചെടികളിലും വെള്ളം തളിക്കാന്‍ 18,000 വാട്ടര്‍ ടാങ്കറുകളോ ട്രോളികളോ വിന്യസിച്ചിട്ടുണ്ട്.
പൂജ്യത്തിനും 50നും ഇടയിലാണെങ്കിൽ വായു നിലവാര സൂചിക ‘മികച്ചത്’ എന്നാണ് കണക്കാക്കുക. 51നും 100നും ഇടയിലാണെങ്കിൽ ‘തൃപ്തികരം’, 101നും 200നും ഇടയിൽ ‘ ഇടത്തരം’, 201നും 300നും ഇടയിൽ ‘മോശം’, 301നും 400നും ഇടയിൽ ‘വളരെ മോശം’, 401നും 500നുമിടയിൽ ‘ഗുരുതരം’ എന്നിങ്ങനെയാണ് കണക്കാക്കുക