ബിജെപിക്കെതിരെ ഗുരുതര ആരോപണങ്ങളുമായി ഡൽഹി മുഖ്യമന്ത്രി അരവിന്ദ് കെജ്രിവാൾ രംഗത്ത്. ഡൽഹിയിലെ ഏഴ് ആംആദ്മിപാർട്ടി എംഎൽഎമാരെ ബിജെപി വേട്ടയാടാൻ ശ്രമിച്ചുവെന്നും പാർട്ടി മാറാൻ അവർക്ക് 25 കോടി രൂപ വാഗ്ദാനം ചെയ്തുവെന്നും കെജ്രിവാൾ ആരോപിച്ചു. മദ്യനയ കേസിൽ ഡൽഹി മുഖ്യമന്ത്രിയെ ഉടൻ അറസ്റ്റ് ചെയ്യുമെന്ന് ഭീഷണിപ്പെടുത്തിയ ബിജെപി എഎപി എംഎൽഎമാരുമായി ചർച്ച നടത്തിയെന്നും അദ്ദേഹം ആരോപിച്ചു.
എക്സി´ലുടെയാണ് അരവിന്ദ് കെജ്രിവാൾ ആരോപണം ഉന്നയിച്ചിരിക്കുന്നത്.അടുത്തിടെ ബിജെപി ഞങ്ങളുടെ ഡൽഹിയിലെ ഏഴ് എംഎൽഎമാരുമായി ബന്ധപ്പെട്ടിരുന്നു. കുറച്ച് ദിവസങ്ങൾക്ക് ശേഷം ഞങ്ങൾ കെജ്രിവാളിനെ അറസ്റ്റ് ചെയ്യുമെന്നും അതിനുശേഷം എംഎൽഎമാരെ തകർക്കുമെന്നും പറഞ്ഞു. 21 എംഎൽഎമാരുമായി ചർച്ച നടത്തിയെന്നും മറ്റുള്ളവരോട് സംസാരിച്ചുകൊണ്ടിരിക്കുകയാണെന്നും വ്യക്തമാക്കി. ചർച്ചകൾക്കു ശേഷം ഡൽഹിയിലെ ആം ആദ്മി പാർട്ടി സർക്കാരിനെ താഴെയിറക്കുമെന്നും പറഞ്ഞു. നിങ്ങൾക്കും ബിജെപിയിലേക്ക് വരാം. 25 കോടി രൂപ സ്വീകരിച്ച് ബിജെപി ടിക്കറ്റിൽ തിരഞ്ഞെടുപ്പിൽ മത്സരിക്കുകയും ചെയ്യാം´- ബിജെപി പറഞ്ഞതായി കെജ്രിവാൾ ആരോപിക്കുന്നു.
എന്നെ അറസ്റ്റ് ചെയ്യുന്നത് ഒരു മദ്യ കുംഭകോണം അന്വേഷിക്കാനല്ല. അവർ ദില്ലിയിലെ ആം ആദ്മി പാർട്ടി സർക്കാരിനെ താഴെയിറക്കാനാണ് ഗൂഢാലോചന നടത്തുന്നത്. കഴിഞ്ഞ ഒൻപത് വർഷമായി അവർ നമ്മുടെ സർക്കാരിനെ താഴെയിറക്കാൻ നിരവധി ഗൂഢാലോചനകൾ നടത്തി. പക്ഷേ അതിലൊന്നും അവർ വിജയിച്ചില്ല. .ദൈവവും ജനങ്ങളും എപ്പോഴും ഞങ്ങളെ പിന്തുണച്ചുകൊണ്ടിരുന്നു. ഞങ്ങളുടെ എല്ലാ എംഎൽഎമാരും ശക്തമായി ഒരുമിച്ചാണ്. ഇത്തവണയും ഇവർ ഇക്കാര്യത്തിൽ പരാജയപ്പെടുമെന്ന് ഉറപ്പാണ്´´- അദ്ദേഹം കൂട്ടിച്ചേർത്തു.