ഓഗസ്റ്റ് 26ന് മഹാരാഷ്ട്രയിലെ സിന്ധുദുർഗിൽ ഛത്രപതി ശിവാജി മഹാരാജ് പ്രതിമ തകർന്ന സംഭവത്തിൽ ക്ഷമാപണം നടത്തി പ്രധാനമന്ത്രി നരേന്ദ്ര മോദി വെള്ളിയാഴ്ച രംഗത്തെത്തി.
“ഛത്രപതി ശിവാജി മഹാരാജ് നമുക്ക് വെറുമൊരു പേരല്ല, ഇന്ന് ഞാൻ എന്റെ തല കുനിച്ച് എന്റെ ദൈവമായ ഛത്രപതി ശിവജി മഹാരാജിനോട് മാപ്പ് ചോദിക്കുന്നു”. മഹാരാഷ്ട്രയിലെ പാൽഘറിൽ നടന്ന ഒരു പരിപാടിയിൽ സംസാരിക്കവെയായിരുന്നു പ്രധാനമന്ത്രി മോദിയുടെ ഖേദ പ്രകടനം.”
ഛത്രപതി ശിവാജി മഹാരാജിന്റെ പാദങ്ങളിൽ 100 തവണ തൊടാനും ആവശ്യമെങ്കിൽ പ്രതിമ തകർന്നതിൽ മാപ്പ് ചോദിക്കാനും മടിക്കില്ലെന്ന് മഹാരാഷ്ട്ര മുഖ്യമന്ത്രി ഏകനാഥ് ഷിൻഡെയും വ്യാഴാഴ്ച പറഞ്ഞിരുന്നു. മഹാരാഷ്ട്രയിലെ സിന്ധുദുർഗ് ജില്ലയിലെ ഒരു കോട്ടയിൽ കഴിഞ്ഞ വർഷം പ്രധാനമന്ത്രി നരേന്ദ്ര മോദി അനാച്ഛാദനം ചെയ്ത മറാത്താ സാമ്രാജ്യത്തിൻ്റെ സ്ഥാപകൻ ഛത്രപതി ശിവജി മഹാരാജിന്റെ 35 അടി ഉയരമുള്ള പ്രതിമയാണ് ഓഗസ്റ്റ് 26 ന് തകർന്നിരുന്നത്. കഴിഞ്ഞയാഴ്ച കനത്ത മഴയ്ക്കും കാറ്റിനും സാക്ഷ്യം വഹിച്ച സിന്ധുദുർഗിലെ രാജ്കോട്ട് കോട്ടയിലാണ് പ്രതിമ സ്ഥാപിച്ചത്.
അതേസമയം, സ്വാതന്ത്ര്യ സമര സേനാനിയും ഹിന്ദുത്വ സൈദ്ധാന്തികനുമായ വീർ സവർക്കറിനെയും അദ്ദേഹത്തിന്റെ പ്രത്യയശാസ്ത്രത്തെയും പലപ്പോഴും ആക്രമിക്കുന്ന കോൺഗ്രസിനെയും മറ്റ് പ്രതിപക്ഷ പാർട്ടികളെയും പ്രധാനമന്ത്രി രൂക്ഷമായി വിമർശിച്ചു.