മണിപ്പൂരിലെ മോറെയിൽ ഇന്ത്യ-മ്യാൻമർ അതിർത്തി പ്രദേശത്ത് സുരക്ഷാ സേനയും ഭീകരരും തമ്മിൽ ഏറ്റുമുട്ടൽ. മ്യാൻമർ അതിർത്തിയോട് ചേർന്നുള്ള മോറെയിലാണ് സംഭവം റിപ്പോർട്ട് ചെയ്തത്. പോലീസ് കമാൻഡോകളുടെ വാഹനവ്യൂഹത്തിന് നേരെ തോക്കുധാരികളായ തീവ്രവാദികൾ ആക്രമണം നടത്തുകയായിരുന്നു. സുരക്ഷാ സേന തിരച്ചിൽ നടത്തുന്നതിനിടെ കമാൻഡോകൾക്ക് നേരെ അക്രമികൾ വെടിയുതിർത്തു. കൂടുതൽ വിവരങ്ങൾ പുറത്തുവരുന്നതെയുള്ളൂ. ജനുവരി രണ്ടിന് മണിപ്പൂരിൽ തീവ്രവാദികൾ പതിയിരുന്ന് നടത്തിയ ആക്രമണത്തിൽ നാല് പോലീസ് കമാൻഡോകൾക്കും ഒരു അതിർത്തി രക്ഷാ സേന ജവാനും പരിക്കേറ്റിരുന്നു.
ഒരിടവേളയ്ക്ക് ശേഷമാണ് മണിപ്പൂരിൽ അക്രമസംഭവങ്ങൾ തുടർക്കഥയാവുന്നത്. തിങ്കളാഴ്ചയുണ്ടായ ഏറ്റുമുട്ടലിന് പിന്നാലെ തൗബാൽ, ഇംഫാൽ വെസ്റ്റ് ജില്ലകളിൽ വീണ്ടും കർഫ്യൂ ഏർപ്പെടുത്താൻ സംസ്ഥാന സർക്കാർ തീരുമാനിച്ചിരുന്നു. ഇതിന് മുമ്പും മോറെയിൽ സുരക്ഷാ സേനയ്ക്ക് നേരെ ആക്രമണം റിപ്പോർട്ട് ചെയ്തിരുന്നു. സായുധരായ തീവ്രവാദികൾ പതിയിരുന്ന് നടത്തിയ ആക്രമണത്തിൽ ഒരു പോലീസ് ഉദ്യോഗസ്ഥന് പരിക്കേറ്റു. ഭീകരർ ഐഇഡിയും മറ്റ് സ്ഫോടക വസ്തുക്കളും ഉപയോഗിച്ചാണ് സുരക്ഷാ സേനയ്ക്ക് നേരെ ആക്രമണം നടത്തിയത്. ആക്രമണത്തിന് ശേഷം സംസ്ഥാന സുരക്ഷാ സേന തിരിച്ചടിച്ചു. മോറെയിൽ നിന്ന് കീ ലൊക്കേഷൻ പോയിന്റിലേക്ക് (കെഎൽപി) നീങ്ങുമ്പോൾ പോലീസ് കമാൻഡോകളെ വഹിച്ചുകൊണ്ടു പോകുന്ന വാഹനങ്ങളെ ലക്ഷ്യം വച്ച് അജ്ഞാത തോക്കുധാരികൾ ആക്രമണം നടത്തുകയായിരുന്നു.
2023 മെയ് 3 മുതൽ ആരംഭിച്ച സംഘർഷം ഇപ്പോഴും തുടരുകയാണ്. പട്ടിക വർഗ്ഗ മെയ്തേയ് സമുദായത്തിന്റെ ആവശ്യത്തിനെതിരെ പ്രതിഷേധിച്ച് സംസ്ഥാനത്തെ മലയോര ജില്ലകളിൽ ‘ആദിവാസി ഐക്യദാർഢ്യ മാർച്ച്’ സംഘടിപ്പിച്ചതിന് പിന്നാലെയാണ് അക്രമം ആരംഭിച്ചത്. റിസർവ് വനഭൂമിയിൽ നിന്ന് കുക്കി ഗ്രാമവാസികളെ കുടിയൊഴിപ്പിക്കുന്നതിനെച്ചൊല്ലി സംഘർഷം ശക്തമായി.വംശീയ സംഘർഷങ്ങളിൽ 180-ലധികം പേർ ഇതുവരെ കൊല്ലപ്പെട്ടു. സംസ്ഥാനത്തെ സാധാരണ നിലയിലേക്ക് കൊണ്ടുവരാൻ 10,000 സൈനികരെയും അർദ്ധ സൈനികരെയും വിന്യസിക്കേണ്ടിവന്നു. മണിപ്പൂരിലെ ജനസംഖ്യയുടെ 53 ശതമാനത്തോളം വരുന്ന മെയ്തേയ വിഭാഗക്കാർ ഇംഫാൽ താഴ്വരയിലാണ് കൂടുതലും താമസിക്കുന്നത്. ജനസംഖ്യയുടെ 40 ശതമാനവും വരുന്ന ഗോത്രവർഗ്ഗക്കാരായ നാഗകളും കുക്കികളും മലയോര ജില്ലകളിൽ താമസിക്കുന്നുണ്ട്.