മഹ്സൂസ് നടത്തിയ 120-ാമത് ആഴ്ച്ച നറുക്കെടുപ്പിൽ ഇന്ത്യന് പ്രവാസി പ്രദീപ് ഗ്യാരണ്ടീഡ് മില്യണയറായി.
മഹ്സൂസ് പ്രൈസ് സ്ട്രക്ച്ചര് പുതുക്കിയതിന് ശേഷമുള്ള രണ്ടാമത്തെ വിജയിയാണ് പ്രദീപ്. തൃശൂർ പാവറട്ടി സ്വദേശിയായ പ്രദീപ് തന്റെ സഹപ്രവർത്തകരായ ആറു മലയാളികളുമായി ചേർന്നാണ് നറുക്കെടുപ്പിൽ പങ്കെടുത്തത്. കഴിഞ്ഞ 15 വര്ഷമായി സൗദി അറേബ്യയിൽ കൊറിയൻ കെട്ടിട നിർമ്മാണ കമ്പനിയിൽ ക്വാളിറ്റി കൺട്രോൾ സൂപ്പർവൈസർ ആയി ജോലി ചെയ്യുന്ന പ്രദീപ് സുഹൃത്തുക്കളുടെ നിര്ബന്ധത്തെത്തുടര്ന്ന് ഈ മാര്ച്ചിൽ മഹ്സൂസ് അക്കൗണ്ട് തുടങ്ങി മത്സരങ്ങളിൽ പങ്കെടുക്കുകയായിരുന്നു. മത്സരത്തിൽ പങ്കെടുത്ത നാലാം തവണ തന്നെ ഭാഗ്യം പ്രദീപിനെ തേടിയെത്തി. മലയാളികളായ ആറു സഹപ്രവർത്തകരുമായും തുക തുല്യമായി പങ്കിടാനാണു തീരുമാനം.
ഭാഗ്യ പരീക്ഷണം നടത്താതെ ഒന്നും നേടാനാവില്ലെന്നും ഇതൊരു സ്വപ്ന സാക്ഷാത്കാരമാണെന്നും പ്രദീപ് പറഞ്ഞു. നാട്ടിൽ ക്ഷേത്രത്തിനടുത്ത് ആഗ്രഹം പോലെ ഒരു വീട് വാങ്ങാൻ തീരുമാനിച്ചിരുന്നെന്നും സാമ്പത്തികം വലിയ പ്രശ്നമായിരുന്നെനും പ്രദീപ് പറഞ്ഞു. എന്നാൽ അനുഗ്രഹം പോലെ ഇപ്പോൾ ഭാഗ്യവും എത്തി. വീട് സ്വന്തമാക്കിയ ശേഷമുള്ള പണം അടുത്ത സുഹൃത്തുക്കള്ക്ക് വേണ്ടി ചിലവാക്കും. 21 കാരിയായ മകളുടെ വിദ്യഭ്യാസത്തിനും പണം ചിലവഴിക്കും. ഇതു ജീവിതത്തിൽ ഒരിക്കൽ മാത്രം ലഭിക്കുന്ന അവസരമാണ്. അതുകൊണ്ട് തന്നെ ബാക്കി പണം വിവേകത്തോടെ ഉപയോഗിക്കാൻ ഉദ്ദേശിക്കുന്നു. കോവിഡ് കാലത്തെ ജീവിതം ഒരുപാട് അനുഭവം നൽകിയെന്നും അതിനാൽ ഇനി ലഭിക്കുന്ന പണം ശ്രദ്ധാപൂർവ്വം മാത്രമേ ചിലവഴിക്കുകയുള്ളു എന്നും പ്രദീപ് ചാനൽ ന്യുവിനോട് പ്രതികരിച്ചു. കോവിഡ് കാലത്ത് പശുവളർത്തുമായി ഒരു ഫാം തുടങ്ങിയെങ്കിലും അത് വൻ നഷ്ടത്തിൽ കലാശിച്ചതോടെ ഇനി എല്ലാ ശ്രമങ്ങളും കരുതലോടെ മാത്രമായിരിക്കുമെന്നും പ്രദീപ് പറഞ്ഞു.
മഹ്സൂസ് വീക്കിലി പ്രൈസുകളിൽ പുതിയ മാറ്റം വരുത്തിയിരുന്നു. പക്ഷേ, പങ്കെടുക്കാനുള്ള നിയമങ്ങള് മാറിയിട്ടില്ല. പുതിയ ഗെയിം ഘടന മൂന്നാഴ്ച മുൻപാണ് പ്രാബല്യത്തിൽ വന്നത്. മഹ്സൂസിന്റെ 120–ാമത്തെ നറുക്കെടുപ്പാണ് ഈ മാസം 18ന് നടന്നത്. ഗ്യാരന്റീഡ് മില്ല്യനയറെ തിരഞ്ഞെടുക്കാനുള്ള രണ്ടാമത്തേതും. 10 ലക്ഷം ദിര്ഹം സ്വന്തമാക്കിയ മഹ്സൂസിന്റെ ആദ്യത്തെ ഗ്യാരണ്ടീഡ് മില്യണയറും ഒരു മലയാളിയായിരുന്നു.
പുതിയ ഗെയിം ഘടനപ്രകാരം എല്ലാ ആഴ്ചയും ഒരു കോടീശ്വരനെ ഉറപ്പാക്കുന്നു. 35 ദിർഹമിന് ഒരു കുപ്പി കുടിവെള്ളം വാങ്ങിക്കുന്നവർക്ക് നറുക്കെടുപ്പിൽ പ്രവേശിക്കാം. ഗ്രാൻഡ് ഡ്രോ അടങ്ങുന്ന പുതിയ സമ്മാനമായ 2 കോടി ദിർഹം നേടാനുള്ള അവസരവും പുതിയ പ്രതിവാര റാഫിൾ നറുക്കെടുപ്പിലുണ്ട്. ഓരോ ആഴ്ച്ചയും നടക്കുന്ന നറുക്കെടുപ്പിലും 20,000,000 ദിര്ഹം സമ്മാനമുള്ള ഗ്രാൻഡ് ഡ്രോയിലും ഭാഗമാകാം. ഇതോടൊപ്പം പുതിയ ഗ്യാരണ്ടീഡ് മില്യണയര് നറുക്കെടുപ്പിൽ ആഴ്ച്ചതോറും 1,000,000 വീതം സ്വന്തമാക്കുകയും ചെയ്യാം.