ആരോഗ്യത്തിനും ക്ഷേമത്തിനും വേണ്ടി ലോകത്തെ ഒന്നിപ്പിക്കുക എന്ന ലക്ഷ്യത്തോടെ വിവിധ പങ്കാളികളുടെ സഹകരണത്തോടെ ദുബായ് സ്പോർട്സ് കൗൺസിൽ നടത്തുന്ന ഏറ്റവും കൂടുതൽ രാജ്യക്കാർ പങ്കെടുക്കുന്ന യോഗ ഈ മാസം 13 ന് നടക്കും. പരിപാടിയിൽ 2,000 ലേറെ പേർ പങ്കെടുക്കുമെന്നാണ് പ്രതീക്ഷിക്കുന്നത്. 3ന് വൈകിട്ട് 4ന് ദുബായ് സബീൽ പാർക്കിലെ ഫ്രെയിം ആംഫി തിയറ്ററിൽ ആണ് യോഗ നടക്കുന്നത്. പരിപാടി ഗിന്നസ് വേൾഡ് റെക്കോർഡ് ലക്ഷ്യമിടുന്നുണ്ട്.
ദുബായ് സ്പോർട്സ് കൗൺസിൽ അജണ്ടയിലെ ഏറ്റവും പ്രധാനപ്പെട്ട പരിപാടികളിലൊന്നായാണ് ഗിന്നസ് ലോക റെക്കോർഡ് ഉദ്യമം കണക്കാക്കപ്പെടുന്നതെന്ന് ദുബായ് സ്പോർട്സ് കൗൺസിൽ കമ്മ്യൂണിക്കേഷൻ വിഭാഗം സീനിയർ മീഡിയ ഓഫീസർ അഹമ്മദ് മുഹമ്മദ് നബിൽ പറഞ്ഞു. പാർക്കിന്റെ വിവിധ കവാടങ്ങളിൽ 200ലേറെ സന്നദ്ധപ്രവർത്തകർ പരിപാടി നിയന്ത്രിക്കും. വിശാലമായ പാർക്കിങ് സൗകര്യം ലഭ്യമാണ്. വേദിയിലെത്താനും തിരിച്ചുപോകാനും ദുബായ് മെട്രോയും ഉപയോഗിക്കാം.യോഗയുടെ മുന്നോടിയായി ഒട്ടേറെ പരിപാടികൾ അരങ്ങേറുമെന്ന് സംഘാടകർ പറഞ്ഞു. മൂവായിരത്തിലേറെ പേർക്ക് യോഗ പരിശീലിക്കുന്നതിനുള്ള ക്രമീകരണങ്ങൾ ആണ് പാർക്കിൽ ഏർപ്പെടുത്തിയിട്ടുണ്ട്.
യോഗക്കായി എത്തുന്നവർക്ക് പ്രവേശനം സൗജന്യമായിരിക്കും. കുട്ടികളുൾപ്പെടെയുള്ളവർക്ക് പങ്കെടുക്കാം.
പങ്കെടുക്കാൻ താത്പര്യമുള്ളവർ https://fitze.ae/yoga-world-record/ എന്ന ലിങ്കിൽ പ്രവേശിച്ച് ഒാൺലൈനായോ ഓൺസൈറ്റ് കൗണ്ടറുകളിലോ റജിസ്റ്റർ ചെയ്യാം. സബീൽ പാർക്കിൽ വൈകിട്ട് 4 ന് യോഗയ്ക്ക് മുന്നോടിയായുള്ള വിനോദ പരിപാടികള് ആരംഭിക്കും. സൂര്യാസ്തമനത്തിന് ശേഷം എല്ലാവർക്കും പങ്കെടുക്കാവുന്ന 60 മിനിറ്റ് യോഗ സെഷനും ഉണ്ടായിരിക്കും. യോഗ ചെയ്യാനുള്ള പായകൾ സംഘാടകർ നൽകും. പങ്കെടുക്കുന്നവർക്ക് ഇവ തിരികെ കൊണ്ടുപോവാനും സാധിക്കും.