അജ്മാനിലെ ബ്രിട്ടീഷ് വിദ്യാലയമായ ‘ദി ബ്ലൂമിങ്ങ്ടൺ അക്കാദമി’ പത്താം വാർഷികം ആഘോഷിച്ചു. മാർച്ച് അഞ്ചിന് നടന്ന വാർഷികാഘോഷ പരിപാടിയിൽ യു.എ.ഇയിലെ ബ്രിട്ടീഷ് അംബാസഡർ എഡ്വേർഡ് ഹോബർട്ട് മുഖ്യാതിഥിയായി പങ്കെടുത്തു. അംബാസഡറും നോർത്ത് പോയന്റ് എഡുക്കേഷൻ ചെയർമാൻ ലാൻസൺ ലാസറും വാർഷികാഘോഷത്തിന്റെ ഭാഗമായി സ്കൂളിൽ ശിലാഫലകം അനാച്ഛാദനം ചെയ്തു. കൂടാതെ വൃക്ഷത്തൈ നടുകയും ചെയ്തു. ശാസ്ത്രരംഗത്തെ മുന്നേറ്റം വ്യക്തമാക്കുന്ന പരിപാടികൾ, ജെയിൻ ഓസ്റ്റിൻ നാടകാവതരണം, സംഗീത പരിപാടി, മോഡൽ യു.എൻ, TEDx എന്നിവയും ആഘോഷത്തിന്റെ ഭാഗമായി സംഘടിപ്പിച്ചിരുന്നു. ജീവകാരുണ്യ പ്രവർത്തനങ്ങളുടെ ഭാഗമായി ദി ബ്ലൂമിങ്ങ്ടൺ അക്കാദമി റെഡ് ക്രസന്റിന് ധനസഹായം കൈമാറി. ഇതോടൊപ്പം നടന്ന ഇഫ്താർ സംഗമത്തിൽ അംബാസഡർ എഡ്വേർഡ് ഹോബർട്ട് സ്കൂളിലെ രക്ഷിതാക്കളുമായി കൂടിക്കാഴ്ച നടത്തി.
2014 ലാണ് ബ്ലൂമിങ്ടൺ അക്കാദമി തുടങ്ങിയത്. ആറ് മാസത്തിനകം നിർമാണം പൂർത്തിയാക്കിയ വിദ്യാലയം പത്ത് വർഷത്തിനകം വലിയ നേട്ടമാണുണ്ടാക്കിയതെന്നും സ്കൂൾ നേടിയ അംഗീകാരങ്ങൾ ഈ സ്ഥാപനത്തിന് പിന്നിൽ നടക്കുന്ന പ്രയത്നങ്ങളുടെ തെളിവാണെന്നും ബ്രിട്ടീഷ് സ്ഥാനപതി പറഞ്ഞു.
പത്ത് വർഷത്തിനിടെ ബ്ലൂമിങ്ടൺ അക്കാദമി നേടിയത് മികവ് മാത്രമല്ല, ക്രിയാത്മകമായ പ്രയത്നത്തിന്റേയും, വിദ്യാഭ്യാസ മേഖലയിലെ ലക്ഷ്യബോധത്തിന്റെയും നേട്ടങ്ങളാണെന്ന് NPE ചെയർമാൻ ലാൻസൺ ലാസർ പറഞ്ഞു. മികച്ച ഭാവി രൂപപ്പെടുത്താനാണ് ഈ വിദ്യാലയം ശ്രമിക്കുന്നതെന്നും അദ്ദേഹം കൂട്ടിച്ചേർത്തു.
64 രാജ്യങ്ങളിലെ വിദ്യാത്ഥികൾ ഇപ്പോൾ ബ്ലൂമിങ്ടണിൽ പഠിക്കുന്നുണ്ട്. EYFS മുതൽ A ലെവലുകളും BTEC കോഴ്സുകളും ഉൾപ്പെടുത്തി ദി ബ്ലൂമിങ്ങ്ടൺ അക്കാദമി ഭാവിയിൽ കൂടുതൽ വളർച്ചയ്ക്ക് തയ്യാറെടുക്കുകയാണെന്നും സ്കൂൾ അധികൃതർ വ്യക്തമാക്കി. സ്കൂളിന്റെ സ്ഥാപകരുടെ കുടുംബാംഗങ്ങൾ, വിദ്യാർത്ഥികൾ, അധ്യാപകർ തുടങ്ങിയവർ വാർഷികാഘോഷ പരിപാടികളിൽ പങ്കെടുത്തു.