യുഎഇ യിൽ ഇന്ത്യക്കാർക്ക് അവധി ദിവസങ്ങളിലും പാസ്പോർട്ട് സംബന്ധമായ സേവനങ്ങൾ ലഭ്യമാക്കാനുളള നടപടി സ്വീകരിച്ചതായി കേന്ദ്ര വിദേശകാര്യ സഹമന്ത്രി വി മുരളീധരൻ. വർഷത്തിൽ എല്ലാ ദിവസവും പ്രവർത്തിക്കുന്ന ബിഎൽഎസിന്റെ മൂന്ന് കേന്ദ്രങ്ങൾ യുഎഇയിൽ സജ്ജമാക്കിയതായി മന്ത്രി അറിയിച്ചു. ദുബായിൽ രണ്ടും ഷാർജയിൽ ഒരു കേന്ദ്രവുമാണ് ഞായറാഴ്ചകളിലും പ്രവർത്തിക്കുക.
പാസ്പോർട്ട്പുതുക്കൽ പോലുള്ള കാര്യങ്ങൾക്ക്നിലവിൽ അവധി എടുത്ത്പോകേണ്ട അവസ്ഥയുണ്ടായിരുന്നു. ഇനി മുതൽ ഇത് ഇല്ലാതാകും. ഇന്ത്യക്കാർ കൂടുതലുള്ള രാജ്യം എന്ന നിലയിലാണ് യു.എ.ഇയിൽ ഏഴ് ദിവസവും സേവനം നൽകുന്നത്. സാധാരണക്കാരായ തൊഴിലാളികളുടെ ക്ഷേമത്തിനുവേണ്ടി വിദേശകാര്യ മന്ത്രാലയത്തിന്റെ പ്രത്യേക താൽപര്യപ്രകാരമാണ് ഈ സംവിധാനം ഏർപ്പെടുത്തിയതെന്നും മറ്റു എമിറേറ്റുകളിലും ഈ സംവിധാനം ഏർപ്പെടുത്തുന്നത് പിന്നീട് ആലോചിക്കുമെന്നും മന്ത്രി വിശദീകരിച്ചു.
യു.എ.ഇയിലെ വിവിധ പരിപാടികളിലും മുരളീധരൻ പങ്കെടുത്തു. ഇന്ത്യൻ കോൺസുലേറ്റിൽ വിവിധ സംഘടന നേതാക്കളുമായി കൂടിക്കാഴ്ച നടത്തി. യു.എ.ഇയിലെ മലയാളി സംഘടനകളുടേതുൾപെടെ പ്രതിനിധികൾ പങ്കെടുത്തു. വിമാനനിരക്ക്വർധനവ്, പ്രവാസി വോട്ടവകാശം തുടങ്ങിയ വിഷയങ്ങൾ വീണ്ടും മന്ത്രിയുടെ ശ്രദ്ധയിൽപെടുത്തി. ഷാർജ ഇന്ത്യൻ അസോസിയേഷൻ, ഇന്ത്യൻ പീപ്പിൾസ് ഫോറം (ഐപിഎഫ്), ഫ്രണ്ട്സ് ഓഫ് ഇന്ത്യ, അക്കാഫ്, തമിൾ സംഘം തുടങ്ങിയ സംഘടനാ ഭാരവാഹികൾ ചർച്ചയിൽ പങ്കെടുത്തു. വിവിധ പരിപാടികളിൽ കോൺസുൽ ജനറൽ ഡോ. അമൻപുരി, മുൻ കോൺസുൽ ജനറൽ വിപുൽ തുടങ്ങിയവരും പങ്കെടുത്തു.