മാസ്റ്റർ വിഷൻ ഇന്റർനാഷണൽ എക്സലൻസ് പുരസ്കാര വിതരണം ഡിസംബർ 20, 21, 22 തീയ്യതികളിൽ നടക്കുമെന്ന് സംഘാടകർ അറിയിച്ചു. ദുബായ് ഐ എച്ച് എസ് റാഷിദ് ഓഡിറ്റോറിയത്തിൽ നടക്കുന്ന അവാർഡ് നൈറ്റിലും ദെയ്റ ക്രൗൺ പ്ലാസയിൽ സംഘടിപ്പിച്ചിരിക്കുന്ന ബിസിനസ് കോൺക്ലേവിലും കേന്ദ്ര-സംസ്ഥാന മന്ത്രിമാരും സിനിമാ, സാഹിത്യ, സാംസ്കാരിക, വ്യവസായ മേഖലകളിൽ നിന്നുള്ള പ്രമുഖരും പങ്കെടുക്കുമെന്നും സംഘാടകർ വ്യക്തമാക്കി.
രാജ്യാന്തര തലത്തിൽ മികവു പുലർത്തുന്ന സമസ്ത മേഖലയിൽ നിന്നുള്ള വ്യക്തിത്വങ്ങൾക്കാണ് എട്ടാമത് എഡീഷനിൽ പുരസ്കാരം നൽകുന്നത്. സിനിമ, സംഗീതം, സാമൂഹ്യ സേവനം, മീഡിയ(ഇന്ത്യ, യുഎഇ), ബിസിനസ്, സ്പെഷ്യലി എബിൾഡ് വിഭാഗങ്ങളിലായാണ് എക്സലന്സ് അവാർഡ് നല്കുന്നത്.
ഡിസംബർ 20 നും 21 നും ക്രൗൺ പ്ലാസ അൽ തുരയ ബാൾ റൂമിൽ നടക്കുന്ന ബിസിനസ് കോൺക്ലേവിൽ യു എ ഇ യിലും പുറത്തുമുള്ള പ്രമുഖ വ്യവസായ പ്രമുഖർ പങ്കെടുക്കും. ഡിസംബർ 22 ന് ഐ എച്ച് എസ് റാഷിദ് ഓഡിറ്റോറിയത്തിൽ നടക്കുന്ന അവാർഡ് നൈറ്റിൽ സമസ്ത മേഖലയിൽ നിന്നുളള പ്രതിഭകൾക്ക് എക്സലൻസ് പുരസ്കാരം നൽകും. 2023 ൽ മികവുറ്റ പ്രകടനം നടത്തിയ സംരംഭകരെ ആദരിക്കും.
സാമൂഹിക നീതി-ശാക്തീകരണ വകുപ്പു മന്ത്രി രാംദാസ് അത് വാലെ, പോണ്ടിച്ചേരി മുഖ്യമന്ത്രി എൻ രങ്കസ്വാമി, സംസ്ഥാന സഹകരണ തുറുമുഖ ദേവസ്വം മന്ത്രി വി. എൻ വാസവൻ , കർണാടക നിയമസഭാ സ്പീക്കർ യു ടി ഖാദർ, തെലങ്കാന വനിതാ ശിശു ക്ഷേമ വകുപ്പ് മന്ത്രി ഡോ. ദൻസാരി അനസൂയ സീതക്ക, കേരള മുൻ ആഭ്യന്തര മന്ത്രി രമേശ് ചെന്നിത്തല എം എൽ എ, ദുബായ്, ഷാർജ, അജ്മാൻ പോലീസ് ഡിപ്പാർട്ട്മെന്റിലെ ഉന്നത ഉദ്യോഗസ്ഥർ തുടങ്ങിയ പ്രമുഖർ അവാർഡ് ദാന ചടങ്ങിൽ പങ്കെടുക്കുമെന്ന് മാസ്റ്റർ വിഷൻ ഇന്റർനാഷണൽ സി ഇ ഒ മുഹമ്മദ് റഫീഖ് അറിയിച്ചു.