ദുബൈ :2022 -ൽ ദുബൈയിൽ സന്ദർശക പ്രവാഹം. കഴിഞ്ഞ വർഷം എമിറേറ്റ് സ്വാഗതം ചെയ്തത് 23.7 ദശലക്ഷം യാത്രക്കാരെയാണെന്ന് ജിഡിആർഎഫ്എ അറിയിച്ചു. യാത്രക്കാരുടെ എണ്ണത്തിൽ 2021 വർഷത്തേക്കാൾ 89 % വർദ്ധവനവാണ് ഉണ്ടായതെന്ന് വകുപ്പ് വിശദീകരിച്ചു. ആകാശമാർഗം 21,817,022 പേരും കരമാർഗം 1,612,746 ഉം, ജലമാർഗ്ഗം വഴി 243700 യാത്രക്കാരുമാണ് എത്തിയതെന്ന് അധികൃതർ അറിയിച്ചു.
രാജ്യത്ത് പുതുവർഷം ആഘോഷിക്കാൻ എത്തിയവർ 107,082 പേരായിരുന്നു .ദുബൈ എയർപോർട്ടുകൾ വഴി 107082 പേരും ഹത്ത ബോർഡറിലുടെ 6527ഉം കപ്പൽ മാർഗത്തിലൂടെ 5010 സഞ്ചാരികളാണ് ഇവിടേക്ക് എത്തിയത്. ആർട്ടിഫിഷ്യൽ ഇന്റലിജൻസ്, ഇൻറർനെറ്റ് ഓഫ് തിംഗ്സ് തുടങ്ങിയ സാങ്കേതിക വിദ്യകളുടെ ഉപയോഗമൂലം എല്ലാ സന്ദർശകർക്കും മികച്ച ഡിജിറ്റൽ സേവനങ്ങളും, സംതൃപ്തമായ യാത്രാനുഭവവും നൽകാൻ ദുബായ് എയർപോർറ്റുകൾക്ക് കഴിഞ്ഞു, ഇത് ടൂറിസം, ബിസിനസ്സ്, ലൈഫ്സ്റ്റൈൽ മേഖലകളിൽ ദുബൈയുടെ ഖ്യാതി കൂടുതൽ വർദ്ധിപ്പിച്ചുവെന്ന് ജിഡിആർഎഫ്എ- ദുബൈ മേധാവി ലഫ് : ജനറൽ മുഹമ്മദ് അഹ്മദ് അൽ മർറി വ്യക്തമാക്കി
ലോകത്ത് ഏറ്റവും അധികം സന്ദർശകർ വന്നുപോവുന്ന പ്രധാന നഗരങ്ങളിൽ ഒന്നാണ് ദുബൈ. കൊവിഡ് പ്രതിസന്ധികൾക്ക് ശേഷം ദുബൈ പഴയകാല സജീവതയിലേക്ക് വീണ്ടും എത്തിയിരിക്കുയാണ്. പോയ വർഷം നിരവധി അംഗീകാരങ്ങളാണ് ദുബൈക്ക് ലഭിച്ചത്. യുകെ ആസ്ഥാനമായുള്ള മാർക്കറ്റ് റിസർച്ച് സ്ഥാപനമായ യൂറോമോണിറ്ററിന്റെ പുതിയ റിപ്പോർട്ടിൽ ദുബൈ എയർപോർട്ടുകൾ ലോകത്തിലെ ഏറ്റവും തിരക്കേറിയ വിമാനത്താവളങ്ങളിലൊന്നായി തെരഞ്ഞെടുത്തു. .2022 ലെ മികച്ച 100 സിറ്റി ഡെസ്റ്റിനേഷൻ സൂചികയിൽ ആഗോളതലത്തിൽ ദുബൈ നഗരം രണ്ടാമതെത്തി. കൂടാതെ എയർപോർട്ട് കൗൺസിൽ ഇന്റർനാഷണൽ (എസിഐ) റിപ്പോർട്ടിൽ 2022-വർഷത്തിൽ പ്രാദേശികമായും അന്തർദേശീയമായും ദുബായ് എയർപോർട്ടുകൾ ആഗോള മത്സര സൂചികകളിൽ തങ്ങളുടെ മുൻനിര സ്ഥാനം കാത്തുസൂക്ഷിക്കുകയും ചെയ്തു