ദുബായ് : ഷാർജ രാജ്യാന്തര പുസ്തകമേളയിൽ സാഹിത്യകാരൻ ശിഹാബുദ്ദീൻ പൊയ്ത്തുംകടവ് നയിക്കുന്ന ‘ഗൾഫനുഭവങ്ങൾ പറയൂ, കേൾക്കൂ’ എന്ന സംവാദപരിപാടി നാളെ തുടങ്ങും. കാൽ നൂറ്റാണ്ടിലേറെയായി ഗൾഫിൽ പ്രവാസ ജീവിതം നയിക്കുന്ന വ്യക്തികളുടെ ഗൾഫനുഭവം ഈ സംവാദപരിപാടിയിലൂടെ നേരിട്ട് കേട്ട് രേഖപ്പെടുത്തുകയും എഡിറ്റ് ചെയ്ത് പുസ്തകമാക്കി പ്രസിദ്ധീകരിക്കുകയും ചെയ്യുമെന്ന് ഐവറി ബുക്സ് പ്രതിനിധികൾ പറഞ്ഞു. ഷാർജ പുസ്തകോത്സവത്തിൽ ഐവറി ബുക്സിന്റെ സ്റ്റാളിൽ 6, 7,8 തിയതികളിൽ വൈകിട്ട് ആറുമണി മുതലാണ് പരിപാടി നടക്കുക. നാളെ പ്രായംകുറഞ്ഞ ഗ്രാഫിക് എഴുത്തുകാരനായ ആയുഷ് ഡെന്നിയുടെ (ഇന്ത്യാ റെക്കോർഡ്സ് ഫെയിം) ലൈവ് ആർട്ട് ഡെമോ പരിപാടിയും ഐവറിയുടെ സ്റ്റാളിൽ നടക്കും. പുസ്തകമേളയുടെ അവസാന ദിവസമായ 13നു രാത്രി 9 മുതൽ 9.25 വരെ റൈറ്റേഴ്സ് ഫോറത്തിൽ എഴുത്തുകാരൻ ആനന്ദ് നീലകണ്ഠൻ ‘സിഗ്നിഫിക്കൻസ് ഓഫ് ഗ്രേറ്റ് ഇന്ത്യൻ എപിക്സ് ഫോർ മില്ലെനിയൽസ് ആൻഡ് ജെൻ ഇസഡ്’ എന്ന വിഷയത്തെകുറിച്ച് പ്രസംഗിക്കും.
ഐവറി ബുക്സിന് ഷാർജ ഫ്രീസോണിൽ ഓഫീസ് പ്രവർത്തനമാരംഭിച്ചിട്ടുണ്ട്. മലയാളികളായ ഗൾഫ് എഴുത്തുകാർക്കായി സാഹിത്യ ക്യാംപുകൾ, ഏകദിന ശിൽപശാലകൾ, കേരളത്തിൽ നിന്നുള്ള എഴുത്തുകാരുമായുള്ള മുഖാമുഖ ചർച്ചകൾ എന്നിവയിലൂടെ ഗൾഫ് മേഖലയിലെ എഴുത്തുകാരെ മുഖ്യധാരയിലെത്തിക്കുകയാണ് ലക്ഷ്യം. ഇതിലുടെ ഗൾഫ് എഴുത്തുകാരുടെ പുസ്തകങ്ങൾ നല്ല രീതിയിൽ എഡിറ്റിങ്ങും ഫ്രൂഫ് റീഡിങ്ങും നടത്തി പ്രസിദ്ധീകരിക്കാനും ഉദ്ദേശിക്കുന്നു.
ഐവറി ബുക്സ് രാജ്യാന്തര വിപണി ലക്ഷ്യം വച്ചുകൊണ്ട് യുകെയിലെ യുക്സ്ബ്രഡ്ജ് ആസ്ഥാനമാക്കി ഇംഗ്ലീഷ് പുസ്തക പ്രസാധനത്തിനും തുടക്കമിട്ടു. ടി. ഡി. രാമകൃഷ്നന്റെ ‘മാമ ആഫ്രിക്ക’ എന്ന നോവലിന്റെ ഇംഗ്ലീഷ് പരിഭാഷയാണ് ആദ്യ പുസ്തകമായി പ്രസിദ്ധീകരിക്കുന്നത്. ഇന്ത്യയിലേയും,ഗൾഫ് മേഖലയിലേയും ഇംഗ്ലീഷിൽ ഏഴുതുന്ന പുതിയ എഴുത്തുകാരേയും എവറിബുക്സ് യുകെയിലെ ഈ സംരംഭത്തിലൂടെ ലക്ഷ്യമിടുന്നുണ്ട്. ഇന്ന് ദുബൈയിൽ നടന്ന വാർത്താ സമ്മേളനത്തിൽ സിഇഒ പ്രവീൺ വൈശാഖൻ, ഷാർജ ഓഫീസ് പ്രതിനിധി ഹുസൈഫ ഫക്രുദ്ദീൻ ലോക കേരള സഭാ അംഗം. പി. പദ്മനാഭൻ എന്നിവർ സംബന്ധിച്ചു.