ഫെഡറൽ അതോറിറ്റി ഫോർ ഐഡന്റിറ്റി, സിറ്റിസൺഷിപ്പ്, കസ്റ്റംസ് ആൻഡ് പോർട്ട് സെക്യൂരിറ്റി (ഐസിപി) യുടെ പുതിയ അറിയിപ്പ് അനുസരിച്ച് യുഎഇ–സൗദി അതിർത്തിയായ അൽ ഗുവൈഫത്ത് പോർട്ട് സ്റ്റേഷനിൽ കരമാർഗം യുഎഇയിലേക്ക് പ്രവേശിക്കുന്ന വിദേശ വാഹനങ്ങൾ ജൂൺ 26 മുതൽ ഇൻഷ്വറൻസ് നിർബന്ധമാക്കി. നേരത്തെ ഇൻഷുറൻസ് എടുക്കാത്തവർ മടങ്ങിപ്പോകേണ്ടതില്ലെന്നും യുഎഇയിൽ പ്രവേശിക്കുന്നതിനു മുൻപ് ഓൺലൈനിൽ വഴി ഇൻഷുറൻസ് എടുക്കാൻ സൗകര്യമുണ്ടെന്നും അറിയിച്ചിട്ടുണ്ട് .
ഇൻഷുറൻസ് എടുത്തവർക്ക് അതിർത്തിയിൽ വേഗത്തിൽ നടപടിക്രമങ്ങൾ പൂർത്തിയാക്കാമെന്നും ഐസിപി അറിയിച്ചു. നേരത്തെ എടുക്കാത്തവർ ഇൻഷുറൻസ് പോളിസി എടുക്കുന്നതിന് https://aber.shory.com വെബ്സൈറ്റിലൂടെയോ Shory Aber മൊബൈൽ ആപ്പിലൂടെയോ 2 മിനിറ്റിനകം നടപടി പൂർത്തിയാക്കാം.
തുറമുഖങ്ങളിൽ എത്തുമ്പോൾ യാത്രക്കാർ ഇൻഷുറൻസ് തെളിവ് നൽകേണ്ടതുണ്ട്. രാജ്യത്തേക്ക് പ്രവേശിക്കുന്ന വിദേശ വാഹനങ്ങൾക്കായി സ്മാർട്ട് ഇൻഷുറൻസ് സേവനം അവതരിപ്പിച്ചുകൊണ്ട് യാത്രക്കാർക്ക് മികച്ച സേവനങ്ങൾ നൽകുന്നതിനും ലാൻഡ് പോർട്ടുകളിൽ കാര്യക്ഷമമായ നടപടിക്രമങ്ങൾ ഉറപ്പാക്കുന്നതിനും ഐസിപി പ്രതിജ്ഞാബദ്ധമാണെന്ന് അധികൃതർ പറഞ്ഞു.