ഷാര്ജ: സാഹിത്യം എന്നത് ആരുടെയും കുത്തകയല്ലെന്നും പുതിയ യുഗത്തില് കൂടുതല് ജനാധിപത്യവത്കരിക്കപ്പെട്ടതായും കഥാകൃത്തും നോവലിസ്റ്റുമായ ജി.ആര് ഇന്ദുഗോപന് പറഞ്ഞു. 41-മത് ഷാര്ജ രാജ്യാന്തര പുസ്തകോത്സവത്തില് എഴുത്തില് നിന്നും സിനിമയിലേക്ക് എന്ന പരിപാടിയില് സംസാരിക്കുകയായിരുന്നു ഇന്ദുഗോപന്. ഷാര്ജ പുസ്തകോത്സവത്തില് നടക്കുന്ന പ്രകാശനങ്ങളുടെ എണ്ണം നോക്കി ആക്ഷേപിക്കുന്നവരുണ്ട്. വീട്ടിലിരിക്കുന്ന സ്ത്രീകളും കുട്ടികളും വരെ പുസ്തകം എഴുതുന്നതായി കളിയാക്കുന്നു. എഴുത്ത് മനുഷ്യത്വ വിരുദ്ധമായ കാര്യമല്ലാത്ത കാലത്തോളം മോശപ്പെട്ട സംഗതിയല്ല. ഇതൊന്നും ലോകോത്തര കൃതിയാണെന്ന് കരുതി ആരും എഴുതുന്നതല്ല. ഫേസ് ബുക്കില് എഴുതിയ കൃതിക്കാണ് സാഹിത്യ അക്കാദമി അവാര്ഡ് ലഭിക്കുന്നത്. ആ രീതിയിലേക്ക് എഴുത്തിന്റെ ലോകം മാറിയിരിക്കുന്നതായും നമ്മളില് ഓരോരുത്തരിലും എഴുത്തുകാരുണ്ടെന്നും ഇന്ദുഗോപന് പറഞ്ഞു. ഒരുപാട് അനുഭവങ്ങളില് നിന്നും കൂട്ടായ്മകളില് നിന്നുമാണ് ശരിയായ എഴുത്ത് പിറക്കുന്നത്. പലവിധത്തിലുള്ള കൂട്ടായ്മയില് നിന്നും ആനന്ദത്തോടെ കണ്ടെത്തുന്ന ഒന്നായി സാഹിത്യം മാറിയിരിക്കുന്നു. സാഹിത്യം ശക്തമായ ജനാധിപത്യവത്കരണത്തിന് വിധേയമായിരിക്കുന്നു എന്നും അദ്ദേഹം കൂട്ടിച്ചേർത്തു.
ഓരോരുത്തരും അവരവരുടെ ശൈലിയില് എഴുതുന്നതായിരിക്കും പുതിയ കാലത്തെ സാഹിത്യം. അത്തരം എഴുത്തുകള്ക്ക് അംഗീകാരം കിട്ടുന്ന കാലം വിദൂരമല്ല. ഇതാണോ സാഹിത്യം എന്ന് ചോദിക്കുന്ന നിരൂപകന്റെ കാലം മാറിയിരിക്കുന്നു എന്നും അദ്ദേഹം പറഞ്ഞു. മാധ്യമപ്രവര്ത്തനത്തില് നിന്നും എഴുത്തിലേക്ക് വരാനുള്ള സാഹചര്യവും പിന്നീട് സിനിമാ രംഗത്തേക്ക് വന്നതും ഇന്ദുഗോപന് വിശദീകരിച്ചു. മനുഷ്യപാരസ്പര്യത്തില് നിന്നാണ് എഴുത്തിനുള്ള പ്രചോദനം ലഭിക്കുന്നത്. എഴുതുന്നതെല്ലാം മഹത്തരമാണെന്ന് അവകാശവാദമില്ലെന്നും സാഹിത്യത്തില് ചിട്ടവട്ടങ്ങള്ക്കപ്പുറം ചിന്തിക്കുകയും പ്രവര്ത്തിക്കുകയും ചെയ്യുന്ന രീതിയാണ് തനിക്കിഷ്ടമെന്നും അദ്ദേഹം പറഞ്ഞു. ഒരു തെക്കന് തല്ലുകേസ്, ചെന്നായ, വിലായത്ത് ബുദ്ധ തുടങ്ങിയ സിനിമകളെക്കുറിച്ചുള്ള ചര്ച്ചയും നടന്നു. മാധ്യമ പ്രവര്ത്തകന് സാദിഖ് കാവില് അവതാരകനായിരുന്നു.