ദുബായ് ഇന്ത്യൻ ഹൈസ്കൂളിൽ എമിറേറ്റിലെ ആദ്യ വാണിജ്യ മൊബൈൽ ഡെന്റൽ ക്ലിനിക്കിന് തുടക്കമായി. ദുബായ് ഇന്ത്യൻ ഹൈസ്കൂൾ ഗ്രൂപ്പ് സിഇഒ പുനിത് എം.കെ. വാസു മൊബൈൽ ഡെന്റൽ ക്ലിനിക് ഉദ്ഘാടനം ചെയ്തു. ഡയറക്ടർ ഡോ. എം.എ. ബാബു, ചെയർമാൻ ലുവായ് സമീർ അൽദഹ്ലാൻ തുടങ്ങിയവർ പ്രസംഗിച്ചു. ദുബായ് ഇന്ത്യൻ ഹൈസ്കൂളിലെ അധ്യാപകരുടെയും, വിദ്യാർത്ഥികളുടെയും ആരോഗ്യ സംരക്ഷണ പ്രവർത്തകരുടെയും സാന്നിധ്യത്തിൽ ആണ് ‘800 ടീത്ത്’ എന്ന പേരിലുള്ള ചലിക്കുന്ന ഡെന്റൽ ക്ലിനിക്കിന്റെ ഉദ്ഘാടന ചടങ്ങുകൾ നടന്നത്. വിദ്യാർത്ഥികളുടെ ക്ഷേമവും ആരോഗ്യ പ്രതിരോധ പരിചരണവും ഉറപ്പുവരുത്താനുള്ള ലക്ഷ്യമാണ് ഈ സംരംഭമെന്ന് അധികൃതർ പറഞ്ഞു.
മലബാര് ഡെന്റല് ക്ലിനിക്കിന് കീഴിലുള്ള ദന്ത പരിചരണ സംരംഭമാണ് 800 ടീത്ത്. ആരോഗ്യപരവും സാങ്കേതികവുമായ എല്ലാ വശങ്ങളും പരിശോധിച്ച ശേഷമാണ് മൊബൈൽ ക്ലിനിക്കിന് അംഗീകാരം നൽകിയതെന്ന് ആരോഗ്യ വകുപ്പ് അധികൃതരും വ്യക്തമാക്കി. ഹോട്ടലുകള്, സ്കൂളുകള്, കോര്പറേറ്റ് ഓഫിസുകള്, താമസ കേന്ദ്രങ്ങള് എന്നിവിടങ്ങളില് നേരിട്ടെത്തി ദന്തരോഗ സംബന്ധമായ സേവനം നല്കുകയാണ് ക്ലിനിക്കിന്റെ ലക്ഷ്യം. അത്യാധുനിക ഡെന്റല് ചികിത്സ ക്ലിനിക്കില് ലഭ്യമാവുമെന്ന് മലബാര് ഡെന്റല് ക്ലിനിക് സിഇഒ ഡോ. എം എ ബാബു പറഞ്ഞു.