ലോകത്തിന്റെ വിവിധ കോണുകളിലെ രുചിവൈവിധ്യം ആസ്വദിക്കണമെങ്കിൽ ദുബൈ ഗ്ലോബൽ വില്ലേജിലെ ഫ്ലോട്ടിങ് മാർക്കറ്റിൽ എത്തിയാൽ മതി. കനാലിന്റെ തീരത്ത് നിർത്തിയിട്ടിരിക്കുന്ന തോണികളിലാണ് വിഭവങ്ങൾ അപ്പപ്പോൾ തന്നെ തയ്യാറാക്കുന്നത്. കൊതിപ്പിക്കുന്ന വിഭവങ്ങളുമായി ഗ്ലോബൽ വില്ലേജിൽ ഏവരെയും ആകർഷിക്കുന്നതാണ് ഈ ഫ്ലോട്ടിങ് മാർക്കറ്റ്.
ഗുണമേന്മയേറിയ വിഭവങ്ങളാണ് എന്നതാണ് ഈ തോണികളിൽ പ്രവർത്തിക്കുന്ന ഭക്ഷണ ശാലകളുടെ പ്രത്യേകത. ഈ തോണികളിൽ ഏറ്റവും അധികവും തയ്യാറാക്കുന്നത് തായ്ലൻഡ്, കൊറിയ, ജപ്പാൻ, ചൈന, ഫിലിപ്പീൻസ് എന്നിവിടങ്ങളിൽ നിന്നുള്ള വിഭവങ്ങൾ ആണ്. തായ് ലൻഡ് ഭക്ഷണ വൈവിധ്യമാണ് ഇവിടുത്തെ ഏറ്റവും വലിയ ആകർഷണം. തായ്ലൻഡിന്റെ ഭക്ഷണ സംസ്കാരം നേരിട്ടറിയാൻ സ്വദേശികളും വിദേശീയരായ സന്ദർശകരും ഫ്ലോട്ടിങ് മാർക്കറ്റിൽ രുചിതേടി എത്തുന്നുണ്ട്. വേറിട്ട പഴച്ചാറുകളും ഇവിടുത്തെ പ്രത്യേകതയാണ്. പരമ്പരാഗത തായ് ഭക്ഷണങ്ങളായ മാംഗോ ട്രീറ്റ്സ് മുതൽ തായ് നൂഡിൽസ് വരെ രുചി വൈവിധ്യങ്ങളോടെ ആസ്വദിക്കാം.
ഇത്തരത്തിൽ ഉള്ള നാൽപതോളം ഔട് ലറ്റുകളാണ് ഇവിടെയുള്ളത്. വൈവിധ്യമാർന്ന തെരുവ് ഭക്ഷണങ്ങൾ ഇഷ്ടംപോലെ ആസ്വദിക്കാം. പ്രശസ്ത തായ് വിഭവങ്ങളായ ഗ്രിൽഡ് മത്സ്യവിഭവങ്ങൾ,സ്പെഷ്യൽ പ്രോൺസ് വിഭവങ്ങൾ, ഗ്രിൽഡ് മീറ്റ് റോൾ, എന്നിവക്കു പ്രസിദ്ധമാണ് ഈ ഫ്ലോട്ടിങ് മാർക്കറ്റ്. ഇവിടെയെത്തുന്ന അതിഥികൾക്ക് തായ്ലൻഡിന്റെ ആധികാരിക പാചകക്കുറിപ്പുകൾ, കൊറിയയിൽ നിന്നുള്ള ആകർഷകമായ രുചികൾ, മസാലകൾ നിറഞ്ഞ ഫാർ ഈസ്റ്റ്-ഏഷ്യൻ ഗ്രിൽ ഫുഡുകൾ, ഏഷ്യൻ സീ ഫുഡ്, അതുപോലെ മ്യാൻമറിൽ നിന്നുള്ള രുചികൾ, ഫിലിപ്പീൻസിൽ നിന്നുള്ള പലഹാരങ്ങൾ, ഇന്തോനേഷ്യൻ ട്രീറ്റുകൾ എന്നിവയെല്ലാം ആസ്വദിക്കാം. ഗ്രിൽഡ് കടൽമത്സ്യങ്ങളുടെ വ്യത്യസ്ത വിഭവങ്ങളും ഇവിടെ തയ്യാറാണ്.
കക്കയും ചെമ്മീനും കൊണ്ടുണ്ടാക്കുന്ന വിഭവങ്ങളും സ്പെഷ്യൽ ഫ്രൈഡ് റൈസും വിവിധ തരങ്ങളിലുള്ള മോമോസും എല്ലാ നേരിട്ട് തന്നെ ഇവിടെ ആവശ്യക്കാരുടെ ഇഷ്ടത്തിനനുസരിച്ച് അപ്പപ്പോൾ തന്നെ തയ്യാറാക്കിനൽകും. വൈകുന്നേരങ്ങളിൽ നല്ല തിരക്കും ഇവിടെ അനുഭവപ്പെടുന്നുണ്ട്. ഇതൊക്കെ കാണേണ്ട ഒരു കാഴ്ച തന്നെയാണ്.
അതിശയിപ്പിക്കുന്ന ഡ്രാഗൺ തടാകപശ്ചാത്തലവും ഈ ഫ്ലോട്ടിങ് മാർക്കറ്റിന്റെ ഭംഗികൂട്ടുന്നുണ്ട്. വിവിധ നിറങ്ങളാൽ കുളിച്ച് നിൽക്കുന്ന ഡ്രാഗണ് സംഗീതത്തിനൊത്ത് തീ തുപ്പുന്ന കാഴ്ചയും ഒക്കെ ഇവിടെ ഇങ്ങനെ ഇരുന്ന് ആസ്വദിക്കാം.