ബാങ്കോക്കിൽ നടന്ന RSO 2025 ഫോറത്തിൽ ദുബായ് അത്യാധുനിക അതിർത്തി സുരക്ഷാ നിയന്ത്രണ സംവിധാനങ്ങൾ അവതരിപ്പിച്ചു. വിവിധ രാജ്യങ്ങളുടെ അതിർത്തി സുരക്ഷാ വിഭാഗങ്ങളും പോർട്ട് മാനേജ്മെന്റ് വിദഗ്ധരും പങ്കെടുത്ത ഈ ഫോറത്തിൽ, ദുബായിലെ ജനറൽ ഡയറക്ടറേറ്റ് ഓഫ് റെസിഡൻസി ആൻഡ് ഫോറിനേഴ്സ് അഫയേഴ്സ് (ജി.ഡി.ആർ.എഫ്.എ) അതിർത്തി മാനേജ്മെന്റ് സാങ്കേതികവിദ്യകളുടെ ഏറ്റവും പുതിയ മുന്നേറ്റങ്ങൾ പരിചയപ്പെടുത്തി. ‘ബോർഡർ മാനേജ്മെന്റ്: പ്രയോജനങ്ങളും വെല്ലുവിളികളും’ എന്ന വിഷയത്തിലായിരുന്നു ഡയറക്ടറേറ്റ് ഫോറത്തിൽ പങ്കെടുത്തത്.
ഫോറത്തിലെ മുഖാമുഖത്തിൽ, ദുബായിലെ പാസ്പോർട്ട് കൺട്രോൾ ചെക്ക്പോയിന്റുകളിൽ ഉപയോഗിക്കുന്ന അത്യാധുനിക സാങ്കേതികവിദ്യകൾ പ്രദർശിപ്പിച്ചു. ബോർഡർ സുരക്ഷാ പ്രവർത്തനങ്ങളിൽ ഉയർന്നുവരുന്ന വെല്ലുവിളികൾ കൂടാതെ, സുരക്ഷാ മാനദണ്ഡങ്ങൾ ഉയർത്തിപ്പിടിക്കുന്ന നൂതന പരിഹാരങ്ങളെക്കുറിച്ചും ചർച്ച നടത്തി. ക്രോസ്-ബോർഡർ ചലനങ്ങൾ മാനേജ് ചെയ്യുന്നതിൽ സാമൂഹിക റെസിലിയൻസ്, അജിലിറ്റി എന്നിവ വർദ്ധിപ്പിക്കുന്നതിനുള്ള സാങ്കേതിക പരിഹാരങ്ങളും അവതരിപ്പിച്ചു. ഡിജിറ്റൽ സാങ്കേതികവിദ്യകളും ബയോമെട്രിക് ഡാറ്റയും ഇൻസ്പെക്ഷൻ, വെരിഫിക്കേഷൻ സംവിധാനങ്ങൾ മെച്ചപ്പെടുത്തുന്നതിലെ പങ്കും ദുബായുടെ പ്രതിനിധി സംഘം ചടങ്ങിൽ എടുത്തുപറഞ്ഞു.
ദുബായ് എയർപോർട്ടുകളിലെ അഡ്വാൻസ്ഡ് സ്ക്രീനിംഗ് സംവിധാനങ്ങളും സാങ്കേതിക സംയോജനത്തിന്റെ പ്രാധാന്യവും സ്ഥാപന റെസിലിയൻസ് ശക്തിപ്പെടുത്തുന്നതിനുള്ള വിവിധ രീതികളും ഡെലിഗേഷൻ വിശദമാക്കി. ഫ്യൂച്ചർ പോർട്ട്സ് അഡ്മിനിസ്ട്രേഷന്റെ ടെക്നിക്കൽ ഡെവലപ്മെന്റ് ഹെഡ് മേജർ ഹാഷിം അബ്ദു റസാക്ക് അൽ ഹാഷിമിയും സ്മാർട്ട് കമാൻഡ് ആൻഡ് കൺട്രോൾ സെന്ററിന്റെ സപ്പോർട്ട് സർവീസസ് ഹെഡ് ക്യാപ്റ്റൻ അബ്ദുല്ല അലി അൽ കമാലിയുമാണ് ഫോറത്തിൽ ദുബായിന്റെ പ്രതിനിധികളായി പങ്കെടുത്തത്.
ജി.ഡി.ആർ.എഫ്.എയുടെ അന്തർദേശീയ പ്രതിബദ്ധതയും സുരക്ഷാ ഫോറങ്ങളിൽ മികച്ച പ്രാക്ടീസുകൾ പങ്കുവെക്കാനുള്ള താൽപര്യവും ഈ പങ്കാളിത്തത്തിലൂടെ വ്യക്തമാകുന്നുവെന്ന് ദുബായ് എയർപോർട്ട് അഫയേഴ്സ് സെക്ടറിന്റെ അസിസ്റ്റന്റ് ഡയറക്ടർ മേജർ ജനറൽ തലാൽ അഹമ്മദ് അൽ ഷൻഖീത്തി പറഞ്ഞു. “ഉയർന്ന മാനദണ്ഡങ്ങൾ പാലിച്ചുകൊണ്ട് ബോർഡർ മാനേജ്മെന്റ് മെച്ചപ്പെടുത്തുന്നതിന് ലോകത്തിലെ മികച്ച പ്രയോഗങ്ങൾ ഞങ്ങൾ ഉപയോഗിക്കുന്നു. സുരക്ഷാ പരിഹാരങ്ങളിൽ നൂതന സമീപനം സ്വീകരിക്കുന്നതിലൂടെ ജീവനിലവാരവും സമൂഹ സുരക്ഷയും മെച്ചപ്പെടുത്തുന്നതിന് ഞങ്ങൾ സംഭാവന ചെയ്യുന്നു. ദുബായിന്റെ സുരക്ഷിതവും കരുത്തുറ്റതുമായ സംവിധാനങ്ങൾ ഭാവിയിലേക്കുള്ള ലക്ഷ്യങ്ങളുമായി യോജിപ്പിക്കുന്നുവെന്ന് ഞങ്ങൾ വിശ്വസിക്കുന്നു,” എന്ന് അദ്ദേഹം കൂട്ടിച്ചേർത്തു.