ദുബായ് ഇൻ്റർനാഷനൽ ഫൂട് വേർ & ലെതർ പ്രൊഡക്റ്റ്സ് എക്സ്പോ (ഡിഫ്ലക്സ് 2024) ദുബായ് ഫെസ്റ്റിവൽ സിറ്റിയിലെ ഫെസ്റ്റിവൽ അരീനയിൽ ആരംഭിച്ചു. പാദരക്ഷാ, തുകൽ ഉൽപ്പന്ന മേഖലയിൽ നിന്നുള്ള 50 ലധികം നിർമ്മാതാക്കൾ പങ്കെടുക്കുന്ന പ്രദർശനത്തിൽ 250 ലധികം പ്രശസ്ത ബ്രാൻ്റുകൾ 10,000ത്തിലധികം ഉൽപ്പന്ന ശ്രേണിയുമായാണ് എത്തിയിരിക്കുന്നത്. ഇറ്റലി, പോർച്ചുഗൽ, ഈജിപ്ത്, സ്പെയിൻ, തായ്ലാൻ്റ്, പാക്കിസ്താൻ, യു.എ.ഇ, ജോർദാൻ, സിറിയ, തുർക്കി, ഇന്ത്യ, ചൈന തുടങ്ങിയ രാജ്യങ്ങളിലെ പാദരക്ഷാ, തുകൽ ഉൽപ്പന്ന ഹബ്ബുകളിലെ മുൻനിര പങ്കാളികളാണ് ഇത്തവണയും പ്രദർശനത്തിലുണ്ട്.
2030ഓടെ തുകൽ ഉൽപ്പന്ന കയറ്റുമതിയിൽ 13.70 ബില്യൻ ഡോളർ ടേണോവർ എന്ന ലക്ഷ്യാർത്ഥം ഇന്ത്യ പ്രവർത്തിച്ചു വരുന്നതിനാൽ പ്രത്യേകിച്ചും, ഇന്ത്യയുടെ തുകൽ ഉൽപ്പന്ന- പാദദരക്ഷാ വ്യവസായത്തിന് മിഡിൽ ഈസ്റ്റ്-ആഫ്രിക്കൻ (മിയ) വിപണികൾ വലിയ സാധ്യതകളാണ് തുറന്നു തരുന്നത്. ഇനിയുമത് കൂടുതൽ ഉപയോഗിക്കപ്പെടേണ്ടിയിരിക്കുകയാണ്. തന്ത്രപരമായ വളർച്ചാ നീക്കം പരിഗണിക്കുമ്പോൾ ഈ നിരീക്ഷണം ശരിയാണെന്ന് ബോധ്യമാകുമെന്ന് ഇന്ത്യൻ വാണിജ്യ മന്ത്രാലയത്തിലെ ലെതർ എക്സ്പോർട്ട് കൗൺസിൽ (എൽ. ഇ സി) എക്സിക്യൂട്ടിവ് ഡയറക്ടർ ആർ.സെൽവം ഐ.എ.എസ് പറഞ്ഞു. ഇന്ത്യയുടെ വളർച്ചാ മുന്നേറ്റത്തിൽ ജി.സി.സി വിപണികൾ, വിശേഷിച്ചും യു.എ.ഇയും സൗദിയും മുഖ്യ പങ്കാളിത്തം വഹിക്കുവെന്നും അദ്ദേഹം വ്യക്തമാക്കി. 2024-’25 ധനകാര്യ വർഷാർധത്തിൽ ലെതർ, ഫൂട് വേർ ഉൽപ്പന്നങ്ങളുടെ കയറ്റുമതി 2.45 ബില്യൻ ഡോളറാകുമെന്നും അദ്ദേഹം പ്രത്യാശിച്ചു.
2023-‘24 കാലയളവിൽ ഇന്ത്യയിൽ നിന്നുള്ള ഫൂട് വേർ-തുകൽ, തുകൽ ഉൽപ്പന്ന കയറ്റുമതി 4.69 ബില്യൻ ഡോളറായിരുന്നുവെന്നും, ഇന്ത്യക്കും യു.എ. ഇക്കുമിടക്കുള്ള സമഗ്ര സാമ്പത്തിക പങ്കാളിത്ത കരാർ (സേപ) ഉൾപ്പെടെയുള്ള സ്വതന്ത്ര വ്യാപാര കരാറുകളുടെ (എഫ്.ടി.എ) പശ്ചാത്തലത്തിൽ ഇന്ത്യൻ ലെതർ-ഫൂട് വേർ ഉൽപ്പന്നങ്ങളുടെ വിപണിശേഷി വലിയ നിലയിലാണുള്ളതെന്നും ഡിഫ്ലക്സ് സംഘാടകരായ വെരിഫെയർ എം.ഡി ജോബി ജോഷ്വ പറഞ്ഞു.