മിഡിലീസ്റ്റുമായി ഇന്ത്യയുടെ വാണിജ്യ ബന്ധം ശക്തിപ്പെടുത്താൻ ലക്ഷ്യമിട്ട് നടത്തുന്ന മിഡിലീസ്റ്റിലെ ഏറ്റവും വലിയ ഇന്ത്യൻ വാണിജ്യ, വിനോദ, സാംസ്കാരിക മേളയായ ‘ഗൾഫ് മാധ്യമം കമോൺ കേരള’യുടെ അഞ്ചാം എഡിഷൻ മേയ് 19, 20, 21 തീയതികളിൽ ഷാർജ എക്സ്പോ സെന്‍ററിൽ നടക്കും. ഷാർജ ചേംബർ ഓഫ് കൊമേഴ്സിന്‍റെയും ഷാർജ കൊമേഴ്സ് ആൻഡ് ടൂറിസം ഡെവലപ്മെന്‍റ് അതോറിറ്റിയുടെയും പങ്കാളിത്തത്തോടെ സംഘടിപ്പിക്കുന്ന മേളയുടെ ഒരുക്കം പൂർത്തിയായതായി ‘ഗൾഫ് മാധ്യമം’ ചീഫ് എഡിറ്റർ ഹംസ അബ്ബാസ് വാർത്തസമ്മേളനത്തിൽ അറിയിച്ചു. യു എ.ഇ സുപ്രിം കൗൺസിൽ അംഗവും ഷാർജ ഭരണാധികാരിയുമായ ഷെയ്ഖ് ഡോ. സുൽത്താൻ ബിൻ മുഹമ്മദ് അൽ ഖാസിമിയുടെ രക്ഷാകർതൃത്വത്തിൽ ഒരുക്കുന്ന മേളയുടെ മുന്നോടിയായി മേയ് 18ന് ഷാർജ ചേംബർ ഓഫ് കൊമേഴ്സിൽ ഇൻവസ്റ്റ്മെന്‍റ് സമ്മിറ്റും നടക്കും. കമോൺ കേരളയുടെ ഉദ്ഘാടനം മേയ് 19ന് വൈകുന്നേരം നാലിന് ഷാർജ ഡിപാർട്ട്മെന്‍റ് ഓഫ് ഗവൺമെന്‍റ് റിലേഷൻസ് എക്സിക്യൂട്ടീവ് ചെയർമാൻ ഷെയ്ഖ് ഫാഹിം ബിൻ സുൽത്തൻ ബിൻ ഖാലിദ് അൽ ഖാസിമി നിർവഹിക്കും. ലുലു ഗ്രൂപ്പ് ചെയർമാൻ എം.എ. യൂസുഫലി, ആസ്റ്റർ ഡി.എം. ഹെൽത്ത്കെയർ സ്ഥാപക ചെയർമാൻ ഡോ. ആസാദ് മൂപ്പൻ എന്നിവർ മുഖ്യാതിഥിയാകും. ഷാർജ ചേംബർ ഓഫ് കൊമേഴ്സ്, കൊമേഴ്സ് ആൻഡ് ടൂറിസം ഡവലപ്മെന്‍റ് അതോറിറ്റി, ഇന്ത്യൻ കോൺസുലേറ്റ് പ്രതിനിധികൾ എന്നിവർ പങ്കെടുക്കും. ഇന്ത്യ-യു.എ.ഇ സമഗ്ര സാമ്പത്തിക സഹകരണ കരാർ ഒപ്പുവെച്ച് ഒരു വർഷം തികയുന്ന പശ്ചാത്തലത്തിൽ നടക്കുന്ന നിക്ഷേപക സംഗമം ഇരു രാജ്യങ്ങളിലെയും നിക്ഷേപ സാധ്യതകൾ ചർച്ച ചെയ്യും.
മൂന്ന് ദിവസം നടക്കുന്ന മേളയിൽ മുൻ വർഷങ്ങളെ അപേക്ഷിച്ച് പകൽ സമയങ്ങളിലും സന്ദർശകരെ ആഷർഷിക്കുന്ന വിവിധയിനം പരിപാടികൾ നടക്കും. രണ്ടാം ദിവസമായ ശനിയാഴ്ച രാത്രി നടക്കുന്ന മ്യൂസിക് ഓഫ് മൈൻഡ്ഫുൾനെസിൽ നടി ഭാവന മുഖ്യാതിഥിയായെത്തും. വിവിധ മേഖലകളിൽ വ്യക്തിമുദ്ര പതിപ്പിച്ച വനിതകൾക്കുള്ള ആദരമായി ഇന്തോ-അറബ് വിമൻ എക്സലൻസ് അവാർഡ് നൽകും. മാനവികതയുടെയും ഐക്യത്തിന്‍റെയും സന്ദേശം പകരുന്ന ‘ഹാർമോണിയസ് കേരള’ അവസാന ദിവസമായ ഞായറാഴ്ച നടക്കും. വിവിധ ഗൾഫ് രാജ്യങ്ങളിലെ സംഗീതാസ്വാദകർക്കിടയിൽ അറിയപ്പെട്ട ബ്രാൻഡായി മാറിയ ‘ഹാർമോണിയസ് കേരള’യിൽ കുഞ്ചാക്കോ ബോബൻ മുഖ്യാതിഥിയായെത്തും. യു.എ.ഇയുടെ സുസ്ഥിരത വർഷത്തിന് പ്രവാസ ലോകത്തിന്‍റെ പിന്തുണ പ്രഖ്യാപിക്കുന്ന ചടങ്ങും വേദിയിൽ നടക്കും. യു.എ.ഇയിലെ പ്രമുഖ സംഘടന നേതാക്കൾ സുസ്ഥിരത സന്ദേശം പകർന്നുനൽകും. കെ. മുരളീധരൻ എം.പി, ജോൺ ബ്രിട്ടാസ് എം.പി എന്നിവർ പങ്കെടുക്കും.
രാവിലെ 10 മുതൽ രാത്രി 10 വരെ നീണ്ടുനിൽക്കുന്ന ആഘോഷ പരിപാടികളിൽ വൈറൽ സൂപ്പർ സ്റ്റാറുകൾ അവതരിപ്പിക്കുന്ന സ്റ്റാർ ബീറ്റ്സാണ് ആദ്യ ദിവസത്തെ പ്രത്യേകത. മേളനഗരിയിലെത്തുന്നവരെ കാത്ത് കാംറി കാർ ഉൾപെടെ നിരവധി സമ്മാനങ്ങളാണ് ഒരുക്കുന്നത്. രാജ് കലേഷും മാത്തുക്കുട്ടിയും അവതരിപ്പിക്കുന്ന ‘മച്ചാൻസ് ഇൻ ഷാർജ’ മൂന്ന് ദിവസവും പകൽ സമയങ്ങളിൽ ഉണ്ടാകും. കുടുംബ ജീവിതത്തിന്റെ ടിപ്സുമായി പ്രചോദക പ്രഭാഷകൻ മാണി പോളും മകളും നടിയും അവതാരകയുമായ പേളി മാണിയും ‘പോൾ ആൻഡ് പേളി’ ഷോയുമായി എത്തും.
കൊച്ചു കുട്ടികൾക്കായി ചിത്ര രചന മത്സരം, ‘ദ ആർട്ട് ഓഫ് ഗ്രൂമിങ്’, ‘സിങ് എൻ വിൻ’, മജീഷൻ രാജമൂർത്തിയുടെ മാജിക് വർക്ഷോപ് എന്നിവയും ഉണ്ടാകും. ഭക്ഷണ പ്രേമികൾക്ക് രുചിയുടെ വിരുന്നൊരുക്കി ഡസർട്ട് മാസ്റ്റർ തത്സമയ പാചക മത്സരം, ടേസ്റ്റി ഇന്ത്യൻ സ്റ്റാളുകൾ, ഷെഫ് പിള്ളയുടെ പാചക വർക് ഷോപ്പ് എന്നിവയുണ്ടാകും. ആരോഗ്യം, വിനോദ സഞ്ചാരം, വിദ്യാഭ്യാസം, ഷോപ്പിങ്, ഇന്‍റീരിയർ ഡിസൈൻ തുടങ്ങിയ മേഖലയിൽ സ്റ്റാളുകളുമായി ഇന്ത്യയിലെയും യു.എ.ഇയിലെയും സംരംഭകർ അണിനിരക്കും. നിരവധി ഉപഭോക്തൃ ഉൽപന്നങ്ങളുടെ ലോഞ്ചിങിനും കമോൺ കേരള വേദിയാവും. വീടുവാങ്ങാനും വിൽക്കാനും റിയൽ എസ്റ്റേറ്റിൽ നിക്ഷേപിക്കാനും ആഗ്രഹിക്കുന്നവർക്കായി പ്രോപ്പർട്ടി ഷോ നടക്കും.
വി.കെ. ഹംസ അബ്ബാസ്, ചീഫ് എഡിറ്റർ, ഗൾഫ് മാധ്യമം, കെ. മുഹമ്മദ് റഫീഖ്, ഗ്ലോബൽ ഹെഡ്, മാധ്യമം ബിസിനസ് ഓപറേഷൻസ്, മുഹമ്മദ് സലീം അമ്പലൻ, ഡയറക്ടർ, മിഡിലീസ്റ്റ് ഓപറേഷൻസ്, ഗൾഫ് മാധ്യമം-മീഡിയവൺ, അജിൽ മുഹമ്മദ്, സി.ഇ.ഒ, ഹൈലൈറ്റ് ഗ്രൂപ്പ്, ജസ്റ്റിൻ സണ്ണി, ജനറൽ മാനേജർ, ഇന്‍റർനാഷനൽ ഓപറേഷൻസ്, ജോയ് ആലുക്കാസ്, അഫി അഹ്മദ്, മാനേജിങ് ഡയറക്ടർ, സ്മാർട്ട് ട്രാവൽ, ഷാർജ എക്സ്പോ സെന്‍റർ ബിസിനസ് ഡവലപ്മെന്‍റ് മാനേജർ സന്ദീപ് ബോലാർ, ‘ഗൾഫ് മാധ്യമം’ -മീഡിയവൺ എക്സിക്യുട്ടീവ് കമ്മിറ്റി വൈസ് ചെയർമാൻ ഡോ. അബ്ദുൽ സലാം ഒലയാട്ട്, ഗൾഫ് മാധ്യമം കൺട്രി ഹെഡ് ഹാഷിം ജെ.ആർ എന്നിവർ വാർത്താസമ്മേളനത്തിൽ പങ്കെടുത്തു.