ഇന്ത്യയിലെ ആഭരണ മേഖലയെ പ്രതിനിധീകരിക്കുന്ന വ്യവസായ സ്ഥാപനമായ ഓൾ ഇന്ത്യ ജെം ആൻഡ് ജ്വല്ലറി ഡൊമസ്റ്റിക് കൗൺസിലിന്റെ ബി2ബി എക്‌സിബിഷൻ മുംബൈയിൽ നടക്കും. ഇന്ത്യ ജെം ആൻഡ് ജ്വല്ലറി ഷോ പ്രോത്സാഹിപ്പിക്കുന്നത്തിന്റെ ഭാഗമായി ദുബായിൽ ഇൻ്റർനാഷണൽ ജ്വല്ലേഴ്‌സ് മീറ്റും സംഘടിപ്പിക്കും. 2024 ഏപ്രിൽ 2 മുതൽ ഏപ്രിൽ 5 വരെ മുംബൈയിലെ ജിയോ വേൾഡ് കൺവെൻഷൻ സെൻ്ററിൽ ആണ് മെഗാ ബി2ബി എക്‌സ്‌പോയുടെ അക്ഷയ തൃതീയ പതിപ്പ് സംഘടിപ്പിക്കുന്നത്. കഴിഞ്ഞ രണ്ടു വർഷങ്ങളിലും ജ്വല്ലറി മീറ്റ് സംഘടിപ്പിച്ചിരുന്നു.
അക്ഷയ തൃതീയ, ഗുഡി പദ്‌വ എന്നിവയുടെ ഉത്സവ സീസണിന് മുമ്പായി ഒരുക്കങ്ങൾ നടത്തുന്നതിനാൽ പ്രദർശകർക്കും സന്ദർശകർക്കും പ്രയോജനകരമാകുമെന്ന് ജിജെസി ചെയർമാനും ജിജെഎസ് കൺവീനറുമായ സായം മെഹ്‌റ പറഞ്ഞു. പ്രദർശനത്തിന്റെ പ്രമോഷൻ്റെ ഭാഗമായി ജിജെസി ഇന്ത്യയിലുടനീളം 100-ലധികം റോഡ് ഷോകൾ നടത്തി. യുഎഇ, ഖത്തർ, ദുബായ്, ബംഗ്ലാദേശ് തുടങ്ങിയ പ്രധാന അന്താരാഷ്ട്ര വിപണികളിൽ ജ്വല്ലേഴ്‌സ് മീറ്റും സംഘടിപ്പിക്കും.
2,50,000ത്തിലധികം ചതുരശ്ര അടി വിസ്തൃതിയിൽ വ്യാപിച്ചുകിടക്കുന്ന പ്രദർശനത്തിൽ 400ലധികം പ്രദർശകർ എത്തും. പ്രദർശനത്തിന് 15,000ലധികം ആഭ്യന്തര അന്തർദേശീയ ഉപഭാക്താക്കൾ എത്തുമെന്നാണ് പ്രതീക്ഷിക്കുന്നത്. വ്യവസായ രംഗത്തെ പ്രമുഖരുടെ ചർച്ചകൾക്കൊപ്പം വിദ്യാഭ്യാസ സെമിനാറുകൾക്കും പ്രദർശനം സാക്ഷ്യം വഹിക്കും. #HumaraApnaShow-യുടെ അക്ഷയ തൃതീയ പതിപ്പിനായുള്ള ആവേശവും ഒരുക്കങ്ങളും പുരോഗമിക്കുകയാണെന്ന് ജിജെസി വൈസ് ചെയർമാൻ രാജേഷ് റോക്‌ഡെ പറഞ്ഞു. മുൻനിര ചില്ലറ വ്യാപാരികൾ, മൊത്തക്കച്ചവടക്കാർ, നിർമ്മാതാക്കൾ, വ്യാപാരികൾ, പ്രതിനിധികൾ എന്നിവരെയെല്ലാം ഒരുമിച്ച് കൊണ്ടുവരികയാണെന്ന് ജിജെസി മുൻ ചെയർമാൻ നിതിൻ ഖണ്ഡേൽവാൾ പറഞ്ഞു.
മുൻനിര നിർമ്മാതാക്കൾ, മൊത്തക്കച്ചവടക്കാർ, ജെംസ് ആൻഡ് ജ്വല്ലറി വ്യവസായത്തിലെ ഡീലർമാർ എന്നിവരുടെ പ്രധാന കൂട്ടായ്മയാണ് ജിജെഎസ്. ഓൾ ഇന്ത്യ ജെം ആൻഡ് ജ്വല്ലറി ഡൊമസ്റ്റിക് കൗൺസിൽ (ജിജെസി) നിർമ്മാതാക്കൾ, മൊത്തക്കച്ചവടക്കാർ, ചില്ലറ വ്യാപാരികൾ, വിതരണക്കാർ, ലബോറട്ടറികൾ, ജെമോളജിസ്റ്റുകൾ, ഡിസൈനർമാർ, ആഭ്യന്തര രത്നങ്ങൾ & ആഭരണ വ്യവസായത്തിലേക്കുള്ള അനുബന്ധ സേവനങ്ങൾ എന്നിവ ഉൾപ്പെടുന്ന വ്യാപാര ഘടകങ്ങളെ പ്രതിനിധീകരിക്കുന്നതാണ്. വ്യവസായത്തിൻ്റെ താൽപ്പര്യങ്ങൾ സംരക്ഷിച്ചുകൊണ്ട് വളർച്ചയെ പ്രോത്സാഹിപ്പിക്കുക എന്ന ലക്ഷ്യത്തോടെയാണ് കൗൺസിൽ പ്രവർത്തിക്കുന്നത്. GJC കഴിഞ്ഞ 15 വർഷമായി വ്യവസായത്തിനും വേണ്ടിയും വിവിധ സംരംഭങ്ങൾ ഏറ്റെടുത്ത് സർക്കാരിനും വ്യാപാരത്തിനും ഇടയിൽ ഒരു പാലമായി പ്രവർത്തിക്കുന്നു.