യുഎഇയുടെ 53-ആം ദേശീയ ദിനം അവിസ്മരണീയമാക്കാൻ ഒരുങ്ങുകയാണ് ഗ്ലോബൽ വില്ലേജ്. രാജ്യത്തിൻ്റെ ഐക്യവും അഭിമാനവും ഉൾക്കൊള്ളുന്ന അനുഭവങ്ങൾ സന്ദർശകർക്ക് സമ്മാനിക്കാനാണ് ഗ്ലോബൽ വില്ലേജ് തയ്യാറെടുക്കുന്നത്. സാംസ്കാരിക പരിപാടികൾ, വർണ്ണ ദൃശ്യവിസമയം തീർക്കുന്ന കരിമരുന്ന് പ്രയോഗങ്ങൾ, ഡ്രോൺ ഷോകൾ, വിവിധ രുചി അനുഭവങ്ങൾ എന്നിവ മുതൽ ഔട്ട്ഡോർ ഡെസ്റ്റിനേഷൻ പരിപാടികും അരങ്ങേറും.
നവംബർ 29 മുതൽ ഡിസംബർ 3 വരെ യുഎഇ പതാകയുടെ നിറങ്ങൾ പ്രതിഫലിപ്പിക്കുന്ന കരിമരുന്ന് പ്രയോഗം നടക്കും. രാത്രി 9 മണിക്കാണ് ആകാശത്തെ പ്രകാശ വിസ്മയം അരങ്ങേറുക. ഡിസംബർ 2 ന്, സന്ദർശകർക്ക് ഒരു പ്രത്യേക ഡ്രോൺ പ്രദർശനവും ഒരുക്കിയിട്ടുണ്ട്. ഗ്ലോബൽ വില്ലേജ് ഐക്കണിക് അലങ്കാരങ്ങളും ലൈറ്റിംഗ് ഡിസ്പ്ലേകളും ഉപയോഗിച്ച് രൂപാന്തരപ്പെടും. അതിൻ്റെ ഗേറ്റുകളും ലാൻഡ്മാർക്കുകളും യുഎഇ പതാകയുടെ നിറങ്ങളിൽ പ്രകാശിപ്പിക്കും. ആഘോഷങ്ങൾക്ക് താളാത്മകമായ സാംസ്കാരിക ഭാവം നൽകിക്കൊണ്ട് അതിഥികൾക്ക് ലിവ, ഹർബിയ തുടങ്ങിയ എമിറാത്തി ബാൻഡുകളുടെ തത്സമയ പ്രകടനങ്ങളും ആസ്വദിക്കാം.
ഡിസംബർ 1 മുതൽ 3 വരെ പാർക്കിൻ്റെ പ്രധാന വേദിയിൽ അവതരിപ്പിക്കുന്ന ‘ഹവാ ഇമാറാതി’ എന്ന ഗംഭീരമായ തിയറ്ററാണ് ആഘോഷങ്ങളുടെ ഹൈലൈറ്റ്. 40-ലധികം കലാകാരന്മാരെ ഉൾപ്പെടുത്തി, 1971-ൽ യു.എ.ഇ.യുടെ രൂപീകരണത്തിൻ്റെ പശ്ചാത്തലത്തിൽ ഒരു എമിറാത്തി കല്യാണം ചിത്രീകരിക്കുന്ന, ഒമ്പത് അതിമനോഹരമായ രംഗങ്ങളിലൂടെ പ്രേക്ഷകരെ കൂട്ടിക്കൊണ്ടുപോകും. ദിവസവും രാത്രി 7.05 നും 9.40 നും രണ്ടുതവണ നടക്കും.
യുഎഇ പവലിയൻ, 971 പവലിയൻ, ഖലീഫ ബിൻ സായിദ് അൽ നഹ്യാൻ ഫൗണ്ടേഷൻ പവലിയൻ തുടങ്ങിയ പവലിയനുകളിൽ അതുല്യമായ ദേശീയ ദിന സുവനീറുകൾ ഉൾപ്പെടെയുള്ള എക്സ്ക്ലൂസീവ് ഷോപ്പിംഗ് അവസരങ്ങളും ഗ്ലോബൽ വില്ലേജ് സജ്ജമാക്കുന്നുണ്ട്. അതിഥികൾക്ക് രാജ്യത്തിൻ്റെ സാംസ്കാരിക പാരമ്പര്യം പങ്കുവെക്കാൻ ഹംദാൻ ബിൻ മുഹമ്മദ് ഹെറിറ്റേജ് സെൻ്റർ പ്രവർത്തിക്കുന്ന ഹെറിറ്റേജ് വില്ലേജിൽ എമിറാത്തി കരകൗശല വസ്തുക്കൾ പ്രദർശിപ്പിക്കും.