മലപ്പുറം മക്കരപറമ്പ് ‘വിളക്ക്’ സ്‌പെഷ്യല്‍ സ്‌കൂളിലെ 22 ഭിന്നശേഷി വിദ്യാർത്ഥികളും അധ്യാപകരും രക്ഷിതാക്കളുമടക്കം 50 പേര്‍ ജനുവരി 25 മുതല്‍ 29 വരെ ദുബൈയും അബുദാബിയുമടക്കം യുഎഇയിലെ വിവിധ സ്ഥലങ്ങള്‍ സന്ദര്‍ശിക്കും. ‘സ്‌നേഹ വിളക്ക്’ ദുബൈ കൂട്ടായ്മയാണ് സ്‌പെഷ്യല്‍ സ്‌കൂളിലെ വിദ്യാർത്ഥികൾക്ക് ഇതിനായി ഒരവസരം ഒരുക്കുന്നത്.
കുറെ നാളുകളായി ഈ വിദ്യാർത്ഥി പ്രതിഭകൾ തങ്ങളുടെ ദുബൈ യാത്ര സ്വപ്നം കണ്ടിരിക്കുകയാണെന്നറിഞ്ഞതോടെ, വ്യവസായികളും സാമൂഹിക-സാംസ്‌കാരിക പ്രവര്‍ത്തകരുമായ ഏതാനും പേര്‍ ചേര്‍ന്ന് ഇവരുടെ ഈ സ്വപ്ന യാത്രക്ക് വേണ്ടി മാത്രം ‘സ്‌നേഹ വിളക്ക്’ എന്ന കൂട്ടായ്മ രൂപീകരിച്ച് ഇതിനായി വഴി തുറന്നിരിക്കുകയാണ്. 22 ഭിന്ന ശേഷി കുട്ടികളും അസ്ഥി പൊടിഞ്ഞു പോകുന്ന രോഗാവസ്ഥയുള്ള സലീന സുറുമി എന്ന എഴുത്തുകാരിയും ഇവരുടെ സംഘത്തിലുണ്ട്. ജനുവരി 25ന് രാവിലെ ഷാർജ എയര്‍പോര്‍ട്ടില്‍ ‘സ്‌നേഹ വിളക്ക് കൂട്ടായ്മ പ്രതിനിധികൾ ചേര്‍ന്ന് ഈ വിദ്യാർത്ഥികൾക്ക് ഊഷ്മള സ്വീകരണം നല്‍കും. അന്നേ ദിവസം ധോ ക്രൂസ് ട്രിപ്. 26ന് ഇംഗ്‌ളീഷ് ഗൈഡിനൊപ്പം ദുബൈ സിറ്റി ടൂറും ദുബൈ മിറക്കിള്‍ ഗാര്‍ഡന്‍ സന്ദര്‍ശനവും. 27ന് അബുദാബി സിറ്റി ടൂറും ദുബൈ ബുര്‍ജ് ഖലീഫ, ബുർജ് അൽ അറബ് വിസിറ്റും. 28ന് രാത്രി 7 മണി മുതല്‍ 10 വരെ ദുബൈ ക്രസന്റ് സ്‌കൂളില്‍ ഒരുക്കുന്ന മെഗാ സ്‌റ്റേജ് ഷോയില്‍ ഈ പ്രതിഭകളുടെ കലാ പ്രകടനങ്ങള്‍ അരങ്ങേറും. 29ന് ഇവര്‍ക്ക് യാത്രയയപ്പ് നല്‍കും.
ഇത്തരമൊരു കാരുണ്യ പ്രവര്‍ത്തനം നടത്താനാകുന്നതില്‍ തങ്ങള്‍ക്കേറെ സംതൃപ്തിയും സന്തോഷവുമുണ്ടെന്ന് ‘സ്‌നേഹ വിളക്ക്” ദുബൈ കൂട്ടായ്മ പ്രതിനിധികളായ കെപി ഗ്രൂപ് മാനേജിംഗ് ഡയറക്ടര്‍ കെ.പി മുഹമ്മദും ഫസ്റ്റ് ഫാസ്റ്റ് ചെയര്‍മാൻ ഹാഷിം തങ്ങള്‍ നാദാപുരം, സാമൂഹിക പ്രവർത്തകരായ റിയാസ്‌ പപ്പൻ, മുന്ദിർ കൽപകഞ്ചേരി എന്നിവർ ദുബൈയിൽ വാര്‍ത്താസമ്മേളനത്തില്‍ അറിയിച്ചു. സ്‌നേഹ വിളക്ക് കൂട്ടായ്മയിലെ മറ്റംഗങ്ങളായ യാസർ കൊട്ടാരം, കൂഖ് അൽ ഷായ് എംഡി ഇസ്മായിൽ എളമടത്തിൽ, മിഡിൽ ഈസ്റ്റ് ടൂർസ് ഡയറക്ടർ ഡോ. ഷമീൽ ബിൻ ജമീൽ, അസാൻ ഗോൾഡ് & ഡയമൊൻഡ്‌സ് എംഡി സജാദ് സി.എച്ച്, വി.എ റഹീം നാദാപുരം എന്നിവരും വാര്‍ത്താസമ്മേളനത്തില്‍ പങ്കെടുത്തു.