കരൾരോഗം ബാധിച്ച് കരൾമാറ്റിവയ്ക്കൽ ശസ്ത്രക്രിയക്ക് വിധേയനായ നടൻ ബാലയുടെ ആരോഗ്യനില തൃപ്തികരമെന്ന് ആശുപത്രി അധികൃതർ. ശസ്ത്രക്രിയക്ക് ശേഷം ഐസിയുവിൽ ഡോക്ടർമാരുടെ നിരീക്ഷണത്തിലാണ് ബാല. കഴിഞ്ഞ ചൊവ്വാഴ്ചയായിരുന്നു ശസ്ത്രക്രിയ നടന്നത്. സുഹൃത്താണ് ബാലയ്ക്ക് കരൾ നൽകിയത്. ഒരു മാസം കൂടി ആശുപത്രിയിൽ കഴിയേണ്ടിവരുമെന്ന് ആശുപത്രി അധികൃതർ അറിയിച്ചു.
നേരത്തെ തന്നെ ബാല കരൾ അസുഖത്തിന് ചികിത്സ തേടിയിരുന്നു. മാര്‍ച്ച് ആദ്യവാരമാണ് ബാലയെ ആശുപത്രിയില്‍ പ്രവേശിപ്പിച്ചത്. ആദ്യദിവസങ്ങളില്‍ ഗ്യാസ്ട്രോ എൻട്രോളജി വിഭാഗത്തിൽ ആയിരുന്നു. അന്ന് ആരോഗ്യ സ്ഥിതി മോശം ആയിരുന്നുവെങ്കിലും പിന്നീട് സ്ഥിതി മെച്ചപ്പെട്ടു. തുടർന്ന് കരള്‍മാറ്റ ശസ്ത്രക്രിയയ്ക്ക് ഡോക്ടർമാർ നിർദ്ദേശിക്കുകയായിരുന്നു.