ദില്ലിയിൽ നിന്ന് പാരീസിലേക്ക് പറക്കേണ്ട എയർ ഇന്ത്യ ഡൽഹി-പാരീസ് വിമാനം റദ്ദാക്കി. ഡൽഹിയിൽ നിന്ന് പാരീസ് ചാൾസ് ഡി ഗല്ലെ (ജിഡിജി) വിമാനത്താവളത്തിലേക്കുള്ള എയർ ഇന്ത്യ വിമാനമാണ് ചൊവ്വാഴ്ച റദ്ദാക്കിയത്. ദില്ലിയിൽ നിന്ന് പുറപ്പെടുന്നതിനു മുൻപുള്ള പ്രീ-ഫ്ലൈറ്റ് പരിശോധനയ്ക്കിടെ വിമാനത്തിൽ തകരാർ കണ്ടെത്തിയതിനെത്തുടർന്നാണ് വിമാന സർവീസ് റദ്ദാക്കിയത്. പ്രശ്നം എയർലൈൻ ഇപ്പോൾ പരിഹരിച്ചുവരികയാണ്.
തകരാർ പരിഹരിക്കാനുള്ള ശ്രമങ്ങൾ വിമാനക്കമ്പനി തുടങ്ങി. ബുദ്ധിമുട്ട് നേരിട്ട യാത്രക്കാർക്ക് ദില്ലിയിൽ തന്നെ ഹോട്ടലിൽ താമസ സൗകര്യം ഏർപ്പാടാക്കി. ടിക്കറ്റ് ക്യാൻസൽ ചെയ്യുന്നവർക്ക് മുഴുവൻ തുകയും തിരികെ നൽകുമെന്നും എയർ ഇന്ത്യ അറിയിച്ചു. ഈ സർവീസ് റദ്ദാക്കിയതോടെ ജൂൺ 18 ബുധനാഴ്ച പാരീസിൽ നിന്ന് ഡൽഹിയിലേക്ക് പോകേണ്ടിയിരുന്ന AI 142 വിമാനവും എയർ ഇന്ത്യ റദ്ദാക്കി. റദ്ദാക്കപ്പെട്ട ബോയിംഗ് ഡ്രീംലൈനർ 787-8 കഴിഞ്ഞയാഴ്ച അഹമ്മദാബാദിൽ ടേക്ക് ഓഫിനിടെ തകർന്നുവീണ അതേ വിമാന മോഡൽ തന്നെയാണ്.