പഹൽഗാം ഭീകരാക്രമണത്തെ അപലപിച്ച് അമേരിക്കൻ പ്രസിഡന്‍റ് ഡൊണൾഡ് ട്രംപ്. ഇരു രാജ്യങ്ങളുമായും തനിക്ക് നല്ല ബന്ധമാണ് ഉള്ളതെന്നും ഇരുരാജ്യങ്ങളും ചേര്‍ന്ന് പ്രശ്നം പരിഹരിക്കുമെന്നും ട്രംപ് പ്രതീക്ഷ പ്രകടിപ്പിച്ചു. എയർഫോഴ്‌സ് വണ്ണിൽ മാധ്യമപ്രവർത്തകരോട് സംസാരിക്കുകയായിരുന്നു അദ്ദേഹം. ചൊവ്വാഴ്ചയാണ് രാജ്യത്തെ നടുക്കിയ ഭീകരാക്രമണം നടക്കുന്നത്.
‘നിങ്ങൾക്കറിയാവുന്നതുപോലെ ഞാൻ ഇന്ത്യയുമായും പാകിസ്ഥാനുമായും വളരെ അടുപ്പമുള്ളവനാണ്… വർഷങ്ങളായി കശ്മീരിനെച്ചൊല്ലി ഇരുവരും തമ്മിൽ തർക്കം നടക്കുന്നുണ്ട്. കശ്മീർ പ്രശ്നം വർഷങ്ങളായി നിലനിൽക്കുന്നതാണ്. ഇപ്പോൾ നടന്ന ഭീകരാക്രമണം വളരെ മോശമായിരുന്നു’ ട്രംപ് പറഞ്ഞു. നേരത്തെ, പ്രധാനമന്ത്രി നരേന്ദ്ര മോദിയുമായി നടത്തിയ ഫോണിൽ ഭീകരാക്രമണത്തെ ഡൊണാൾഡ് ട്രംപ് ശക്തമായി അപലപിച്ചു . ‘ഹീനമായ ആക്രമണ’ത്തിന്റെ കുറ്റവാളികളെ നിയമത്തിന് മുന്നിൽ കൊണ്ടുവരുന്നതിൽ ഇന്ത്യയ്ക്ക് പൂർണ്ണ പിന്തുണ അദ്ദേഹം അറിയിച്ചിരുന്നു.
പാക് ഭീകരരുടെ ആക്രമണത്തിൽ 26 ഇന്ത്യൻ വിനോദ സഞ്ചാരികളാണ് മരിച്ചത്. ഭീകരാക്രമണത്തിന് ശേഷം ഇരു രാജ്യങ്ങളും തമ്മിലുള്ള ബന്ധം വഷളായി. അട്ടാരിയിലെ ഇന്റഗ്രേറ്റഡ് ചെക്ക് പോസ്റ്റ് (ഐസിപി) അടച്ചുപൂട്ടൽ, പാകിസ്ഥാൻ പൗരന്മാർക്കുള്ള സാർക്ക് വിസ ഇളവ് പദ്ധതി (എസ്‌വിഇഎസ്) താൽക്കാലികമായി നിർത്തിവയ്ക്കൽ, ഇരുവശത്തുമുള്ള ഹൈക്കമ്മീഷനുകളിലെ ഉദ്യോഗസ്ഥരുടെ എണ്ണം കുറയ്ക്കൽ എന്നിവയുൾപ്പെടെ നിരവധി നയതന്ത്ര പ്രതികരണങ്ങൾ കേന്ദ്ര സർക്കാർ നടത്തി. 1960 ലെ സിന്ധു നദീജല കരാറും ഇന്ത്യ നിർത്തിവച്ചു.
വെള്ളിയാഴ്ച, സിന്ധു നദിയിലെ വെള്ളം പാഴാക്കുകയോ പാകിസ്ഥാനിലേക്ക് ഒഴുകാൻ അനുവദിക്കുകയോ ചെയ്യില്ലെന്ന് ഇന്ത്യ ഉറപ്പാക്കുമെന്ന് ഇന്ത്യൻ ഉദ്യോഗസ്ഥർ പറഞ്ഞു. നദിയിലെ വെള്ളം പാകിസ്ഥാനിൽ എത്തുന്നത് തടയാൻ ഹ്രസ്വകാല, മധ്യകാല, ദീർഘകാല എന്നിങ്ങനെ മൂന്ന് മേഖലകളിൽ പദ്ധതികൾ പ്രഖ്യാപിച്ചു.