വ്യാപാര വിനോദ മേളയാൽ ഏവരെയും ആകർഷിക്കുന്ന ദുബൈയിലെ ഗ്ലോബൽ വില്ലേജിലെ ഫ്ലോട്ടിങ് മാർക്കറ്റ് പ്രശസ്തമാണ്. ലോകത്തിന്റെ വിവിധ കോണുകളിലെ രുചിവൈവിധ്യം ആസ്വദിക്കണമെങ്കിൽ ഇവിടെ ഈ ഫ്ലോട്ടിങ് മാർക്കറ്റിൽ എത്തിയാൽ മതി. ഗുണമേന്മയേറിയ വിഭവങ്ങളാണ് എന്നതാണ് ഈ തോണികളിൽ പ്രവർത്തിക്കുന്ന ഭക്ഷണ ശാലകളുടെ പ്രത്യേകത. തായ് ലൻഡ് ഭക്ഷണ വൈവിധ്യമാണ് ഇവിടുത്തെ ഏറ്റവും വലിയ ആകർഷണം. തയ് ലൻഡിൻ്റെ പരമ്പരാഗത ഭക്ഷണശാലകളെ അനുസ്മരിപ്പിക്കുന്നവിധം സവിശേഷമായ ലഘു ഭക്ഷണം സ്വാദോടെ കഴിക്കാൻ ഇവിടെ മിതമായ നിരക്ക് മാത്രമേ നൽകേണ്ടതുള്ളു. ഇത്തരത്തിൽ ഉള്ള നാൽപതോളം ഔട് ലറ്റുകളാണ് ഇവിടെയുള്ളത്. വൈവിധ്യമാർന്ന തെരുവ് ഭക്ഷണങ്ങൾ ഇഷ്ട്ടം പോലെ ആസ്വദിക്കാം. വിവിധ ഭക്ഷണങ്ങളുടെ കൊതിയൂറുന്ന മണമാണ് ഈ ചുറ്റുവട്ടത്തെ കാറ്റിനുള്ളത്. കനാലിന്റെ തീരത്ത് നിർത്തിയിട്ടിരിക്കുന്ന ഈ ചെറുതോണികളിൽ നിന്ന് അപ്പപ്പോൾ ഉണ്ടാക്കുന്ന വിഭവങ്ങൾ കഴിച്ച് ഇവിടുത്തെ മനോഹര കാഴ്ചകൾ കണ്ട് കാറ്റേറ്റ് ഇങ്ങനെ ഇരിക്കാം.
പ്രശസ്ത തയ് വിഭവങ്ങളായ ഗ്രിൽഡ് മത്സ്യവിഭവങ്ങൾ,സ്പെഷ്യൽ പ്രോൺസ് വിഭവങ്ങൾ, ഗ്രിൽഡ് മീറ്റ് റോൾ, എന്നിവയ്ക്ക് പ്രസിദ്ധമാണ് ഈ ഫ്ലോട്ടിങ് മാർക്കറ്റ്. ഇവിടെയെത്തുന്ന അതിഥികൾക്ക് തായ്ലൻഡിന്റെ ആധികാരിക പാചകക്കുറിപ്പുകൾ, കൊറിയയിൽ നിന്നുള്ള ആകർഷകമായ രുചികൾ, മസാലകൾ നിറഞ്ഞ ഫാർ ഈസ്റ്റ്-ഏഷ്യൻ ഗ്രിൽ ഫുഡുകൾ, ഏഷ്യൻ സീ ഫുഡ്, അതുപോലെ മ്യാൻമറിൽ നിന്നുള്ള രുചികൾ, ഫിലിപ്പീൻസിൽ നിന്നുള്ള പലഹാരങ്ങൾ, ഇന്തോനേഷ്യൻ ട്രീറ്റുകൾ എന്നിവയെല്ലാം ആസ്വദിക്കാം. ഗ്രിൽഡ് കടൽമത്സ്യ ങ്ങളുടെ വ്യത്യസ്ത വിഭവങ്ങളും ഇവിടെ തയ്യാറാണ്. കൂടാതെ ഇവയെല്ലാം പാകംചെയ്യുമ്പോൾ ഉണ്ടാകുന്ന ആരെയും ആകർഷിക്കുന്ന മണവും പറയാതെ വയ്യ.
തായ്ലൻഡിന്റെ ഭക്ഷണ സംസ്കാരം നേരിട്ടറിയാൻ സ്വദേശികളും ഇന്ത്യക്കാരടക്കമുള്ള വിദേശീയരായ സന്ദർശകരും ഫ്ലോട്ടിങ് മാർക്കറ്റിൽ രുചിതേടി എത്തുന്നുണ്ട്. ലോകത്തിന്റെ വിവിധ കോണുകളിലെ രുചിവൈവിധ്യം നുണയാൻ ഗ്ലോബൽ വില്ലേജിലെ ഫ്ലോട്ടിങ് മാർക്കറ്റിൽ എത്തിയാൽ മതി, പിന്നെ അവയൊക്കെ ഒന്ന് രുചിക്കാതെ ഇവിടെനിന്നു മടങ്ങാൻ ആവില്ല.
വേറിട്ട പഴച്ചാറുകളും ഇവിടുത്തെ പ്രത്യേകതയാണ്. കൂടാതെ ഇളനീരിൽ നൽകുന്ന പ്രത്യേക വിഭവങ്ങലും ഇവിടെ ഉണ്ട്. പരമ്പരാഗത തയ് ഭക്ഷണങ്ങളായ മാംഗോ ട്രീറ്റ്സ് മുതൽ തയ് നൂഡിൽസ് വരെ രുചി വൈവിധ്യങ്ങളോടെ ആസ്വദിക്കാം. കക്കയും ചെമ്മീനും കൊണ്ടുണ്ടാക്കുന്ന വിഭവങ്ങഉം സ്പെഷ്യൽ ഫ്രൈഡ് റൈസും വിവിധ തരങ്ങളിലുള്ള മോമോസും എല്ലാ നേരിട്ട് തന്നെ ഇവിടെ ആവശ്യക്കാരുടെ ഇഷ്ടത്തിനനുസരിച്ച് അപ്പപ്പോൾ തന്നെ തയ്യാറാക്കി നൽകും. വൈകുന്നേരങ്ങളിൽ നല്ല തിരക്കും ഇവിടെ അനുഭവപ്പെടുന്നുണ്ട്. അതിശയിപ്പിക്കുന്ന ഡ്രാഗൺ തടാക പശ്ചാത്തലവും ഈ ഫ്ലോട്ടിങ് മാർക്കറ്റിന്റെ ഭംഗികൂട്ടുന്നുണ്ട്. വിവിധ നിറങ്ങളാൽ കുളിച്ച് നിൽക്കുന്ന ഡ്രാഗണ് സംഗീതത്തനൊത്ത് തീ തുപ്പുന്ന കാഴ്ചയും ഒക്കെ ഇവിടെ ഇങ്ങനെ ഇരുന്ന് ആസ്വദിക്കാം.