അന്താരാഷ്ട്ര വനിതാ ദിനമായ ഇന്ന് പ്രധാനമന്ത്രി നരേന്ദ്ര മോദിക്ക് സുരക്ഷ ഒരുക്കുന്നത് വനിത സുരക്ഷ ഉദ്യോഗസ്ഥരാണ്. ചരിത്രത്തിലാദ്യമായാണ് ഇന്ത്യൻ പ്രധാധനമന്ത്രിക്ക് ഇങ്ങനെയൊരും സുരക്ഷ ഒരുക്കിയത്. ഗുജറാത്ത് പൊലീസില് നിന്നുള്ള 2,300 വനിത സുരക്ഷ ഉദ്യോഗസ്ഥരെയാണ് പ്രധാനമന്ത്രിയുടെ സുരക്ഷയ്ക്കായി ഒരുക്കിയിരിക്കുന്നത്. 2,300 പേരിൽ 87 സബ് ഇൻസ്പെക്ടർമാർ, 61 പൊലീസ് ഇൻസ്പെക്ടർമാർ, 16 ഡെപ്യൂട്ടി പൊലീസ് സൂപ്രണ്ടുമാർ, അഞ്ച് എസ്പിമാർ, ഒരു ഇൻസ്പെക്ടര് ജനറൽ ഓഫ് പൊലീസ്, ഒരു അഡീഷണൽ ഡിജിപി റാങ്കിലുള്ള ഉദ്യോഗസ്ഥ എന്നിവരാണ് സുരക്ഷാ സംഘത്തിലുള്ളത്. ഗുജറാത്ത് ആഭ്യന്തര സെക്രട്ടറിയായ നിപുന ടൊറവാനെയാണ് സുരക്ഷാ ക്രമീകരണങ്ങളുടെ മേൽനോട്ടം വഹിക്കുന്നത്.
വനിതാദിനത്തോട് അനുബന്ധിച്ച് ഗുജറാത്തിലെ നവസാരിയിൽ ലഖ്പതി ദീദി സമ്മേളനത്തിൽ പങ്കെടുക്കുന്ന മോദി, വനിത സംരംഭ ഗ്രൂപ്പുകൾക്കുള്ള 450 കോടിയുടെ ധനസഹായം പ്രഖ്യാപിക്കും. തെരഞ്ഞെടുക്കപ്പെട്ട 10 വനിത സംരംഭകരുമായി മോദി സംസാരിക്കും. ഈ സമ്മേളനം മൊത്തം നിയന്ത്രിക്കുന്നത് വനിതാ സുരക്ഷാ ജീവനക്കാരാണ്.
കൂടാതെ ഇന്ന് പ്രധാനമന്ത്രി നരേന്ദ്ര മോദിയുടെ ഔദ്യോഗിക സാമൂഹിക മാധ്യമ ഹാൻഡിലുകള് കൈകാര്യം ചെയ്യുന്നത് വിവിധ മേഖലകളില് കഴിവ് തെളിയിച്ച വനിതകള്. മോദിയുടെ എക്സ് അക്കൗണ്ടിലൂടെ ഇന്ത്യൻ ചെസ് ഗ്രാൻഡ്മാസ്റ്റർ വൈശാലി രമേശ്ബാബു ആശംസകള് അറിയിച്ച് സര്പ്രൈസ് ഒരുക്കി. വനിതാ ദിനത്തില് പ്രധാനമന്ത്രിയുടെ സോഷ്യല് മീഡിയ അക്കൗണ്ട് ഏറ്റെടുക്കാൻ സാധിച്ചതില് അതിയായ സന്തോഷമുണ്ടെന്നും വൈശാലി മോദിയുടെ എക്സില് കുറിച്ചു.
“വണക്കം! ഞാൻ ചെസ് ഗ്രാൻഡ്മാസ്റ്റർ വൈശാലി ആണ്, വനിതാദിനത്തിൽ നമ്മുടെ പ്രധാനമന്ത്രി മോദിജിയുടെ സോഷ്യൽ മീഡിയ അക്കൗണ്ട് ഏറ്റെടുക്കുന്നതിൽ എനിക്ക് അതിയായ സന്തോഷമുണ്ട്, നിരവധി ചെസ് ടൂർണമെന്റുകളിൽ നമ്മുടെ പ്രിയപ്പെട്ട രാജ്യത്തെ പ്രതിനിധീകരിക്കുന്നതിൽ എനിക്ക് വളരെ അഭിമാനം തോന്നുന്നു,” വൈശാലി കുറിച്ചു.
ബഹിരാകാശ സാങ്കേതികവിദ്യ, ആണവ സാങ്കേതികവിദ്യ എന്നീ മേഖലകളില് കഴിവ് തെളിയിച്ച ശാസ്ത്രജ്ഞരായ എലീന മിശ്രയും ശിൽപി സോണിയും മോദിയുടെ എക്സ് അക്കൗണ്ടിലൂടെ ആശംസകള് അറിയിച്ച് രംഗത്തെത്തി. “ആണവ ശാസ്ത്രജ്ഞയായ എലീന മിശ്രയും ബഹിരാകാശ ശാസ്ത്രജ്ഞയായ ശിൽപി സോണിയുമാണ് ഞങ്ങള്, വനിതാ ദിനത്തില് പ്രധാനമന്ത്രിയുടെ സോഷ്യൽ മീഡിയ അക്കൗണ്ടുകള് കൈകാര്യം ചെയ്യാൻ സാധിച്ചതില് ഞങ്ങൾക്ക് അതിയായ സന്തോഷമുണ്ട്. ഇന്ത്യയുടെ ശാസ്ത്രമേഖല വളരെ മികച്ചതാണ്, അതുകൊണ്ട് തന്നെ കൂടുതൽ സ്ത്രീകള് ഈ മേഖലയിലേക്ക് കടന്നുവരണമെന്ന് ഞങ്ങൾ അഭ്യർഥിക്കുന്നു” എന്ന് അവര് കുറിച്ചു.
ഫ്രോണ്ടിയർ മാർക്കറ്റ്സിന്റെ സ്ഥാപകയും സിഇഒയുമായ അജൈത ഷായും മോദിയുടെ എക്സ് അക്കൗണ്ടിലൂടെ സന്ദേശവുമായി രംഗത്തെത്തി. “സാമ്പത്തികമായി ശാക്തീകരിക്കപ്പെട്ട ഒരു സ്ത്രീ ആത്മവിശ്വാസമുള്ള തീരുമാനമെടുക്കുന്നവളും, സ്വതന്ത്ര ചിന്തകയും, സ്വന്തം ഭാവിയെ കുറിച്ച് ബോധ്യമുള്ളവളും, ആധുനിക ഇന്ത്യയുടെ നിർമ്മാതാവുമാണ്! സാമ്പത്തികമായി ശാക്തീകരിക്കപ്പെട്ട സ്ത്രീകളെ കെട്ടിപ്പടുക്കുന്നതിൽ നമ്മുടെ രാജ്യം സുപ്രധാന പങ്കുവഹിക്കുന്നു” എന്ന് അവര് കുറിച്ചു. അതേസമയം, വനിതാ ദിനത്തില് തന്റ സോഷ്യല് മീഡിയ ഹാൻഡിലുകള് വിവിധ മേഖലകളില് കഴിവ് തെളിയിച്ച സ്ത്രീകളാകും കൈകാര്യം ചെയ്യുകയെന്ന് മോദി നേരത്തെ വ്യക്തമാക്കിയിരുന്നു.