മുൻ യു.എസ് പ്രസിഡന്റ് ഡോണൾഡ് ട്രംപിന് നേരെയുണ്ടായ വധശ്രമത്തെ അപലപിച്ച് യു.എ.ഇ പ്രസിഡന്റ് ഷെയ്ഖ് മുഹമ്മദ് ബിൻ സായിദ് ആൽ നഹ്യാൻ. യു.എ.ഇ വിദേശകാര്യ മന്ത്രാലയവും ദാരുണമായ സംഭവത്തെ അപലപിച്ച് പ്രസ്താവന പുറപ്പെടുവിച്ചു.
ഡോണൾഡ് ട്രംപിന് ഐക്യദാർഢ്യം അറിയിക്കുന്നതായും എല്ലാ രീതിയിലുമുള്ള അക്രമത്തെയും തീവ്രവാദത്തെയും യു.എ.ഇ അപലപിക്കുന്നതായും അദ്ദേഹം സമൂഹ മാധ്യമ പോസ്റ്റിലൂടെ പറഞ്ഞു. പ്രസിഡന്റ് സ്ഥാനാർഥി ട്രംപിനോടും അദ്ദേഹത്തിന്റെ കുടുംബത്തോടും യു.എസിലെ സർക്കാറിനോടും ജനങ്ങളോടും ഐക്യദാർഢ്യം പ്രകടിപ്പിക്കുന്നതായും പൂർണവും വേഗത്തിലുള്ളതുമായ തിരിച്ചുവരവിന് ആശംസ അറിയിക്കുന്നതായും പ്രസ്താവനയിൽ പറഞ്ഞു. ക്രിമിനൽ, തീവ്രവാദ പ്രവർത്തനങ്ങളെ ശക്തമായി അപലപിക്കുന്നതായും എല്ലാതരം അക്രമങ്ങളെയും യു.എ.ഇ തള്ളിക്കളയുന്നതായും മന്ത്രാലയം വ്യക്തമാക്കി.