ഏഷ്യയിലെ ഏറ്റവും വലിയ കൗമാര കലോത്സവത്തിന് തിരിതെളിഞ്ഞു. മുഖ്യന്ത്രി പിണറായി വിജയന് നിലവിളക്ക് കൊളുത്തി 62-മത് സംസ്ഥാന സ്ക്കൂൾ കലോത്സവം ഉദ്ഘാടനം ചെയ്തു. കൊല്ലം ആശ്രാമം മൈതാനത്തെ മുഖ്യവേദിയിലായിരുന്നു ഉദ്ഘാടനം നടന്നത്. ജനുവരി നാലുമുതല് എട്ടുവരെയാണ് കലാമേള നടക്കുക. പതിനാലായിരത്തോളം മത്സരാർഥികൾ അഞ്ചുദിവസങ്ങളിലായി വിവിധ വേദികളിൽ എത്തും. 24 വേദികളിൽ ഹൈസ്കൂൾ, ഹയർ സെക്കൻഡറി വിഭാഗങ്ങളിലായി 239 ഇനങ്ങളിൽ ആണ് വിദ്യാർത്ഥികൾ മത്സരിക്കുക.
കലോത്സവം കുട്ടികളുടേതാണെന്നും രക്ഷിതാക്കള് തമ്മില് മത്സരിക്കരുതെന്നും ഉദ്ഘാടനം പ്രസംഗത്തില് മുഖ്യമന്ത്രി പറഞ്ഞു. നടിയും നര്ത്തകിയുമായ ആശാ ശരത്തും സംഘവും അവതരിപ്പിച്ച നൃത്ത ശില്പ്പത്തോടെയാണ് കലാമേളയ്ക്ക് തുടക്കമായത്. ഭിന്നശേഷിക്കുട്ടികള് അവതരിപ്പിക്കുന്ന ചെണ്ടമേളം, മയിലാട്ടം, ശിങ്കാരിമേളം, കളരിപ്പയറ്റ് എന്നിവയും അരങ്ങേറിയിരുന്നു. പ്രധാനവേദിയിൽ എച്ച്എസ് വിഭാഗം പെൺകുട്ടികളുടെ മോഹിനിയാട്ട മത്സരത്തോടെ വേദികൾ ഉണരും.
എട്ടിന് വൈകീട്ട് അഞ്ച് മണിക്ക് നടക്കുന്ന സമാപനസമ്മേളനം പ്രതിപക്ഷനേതാവ് വി.ഡി. സതീശന് ഉദ്ഘാടനം ചെയ്യും. മന്ത്രി ജി.ആര്. അനില് സുവനീര് പ്രകാശനം ചെയ്യും. മലയാളത്തിന്റെ മഹാനടന് മമ്മൂട്ടി സമ്മാനദാനച്ചടങ്ങില് മുഖ്യ അഥിതിയാവും. പതിവുപോലെ കലോത്സവത്തില് ഭക്ഷണമൊരുക്കാനുള്ള ചുമതല ഇത്തവണയും പഴയിടം മോഹനന് നമ്പൂതിരിക്ക് തന്നെയാണ് ലഭിച്ചത്. കഴിഞ്ഞ തവണത്തെ നോണ്വെജ് വിവാദത്തെ തുടര്ന്ന് കലാമേളയില് ഇനി ഭക്ഷണമൊരുക്കില്ലെന്ന് പഴയിടം നമ്പൂതിരി പറഞ്ഞിരുന്നു. എന്നാൽ വെജിറ്റേറിയന് ഭക്ഷണം മാത്രമേ വിളമ്പൂ എന്ന് സര്ക്കാര് വ്യക്തമാക്കിയതോടെയാണ് പാചകത്തിനുള്ള ടെന്ഡറില് പഴയിടം പങ്കെടുത്തത്.
ഒന്നരപതിറ്റാണ്ടിന് ശേഷമാണ് സംസ്ഥാന കലോത്സവത്തിന് കൊല്ലം വേദിയാകുന്നത്. ആറ് പതിറ്റാണ്ടിനിടെ ഇത് നാലാം തവണയാണ് കൊല്ലത്തിന് ആതിഥേയരാകാന് അവസരം ലഭിക്കുന്നത്. 59 ഇനങ്ങളിലാണ് ആദ്യദിനം മത്സരങ്ങൾ നടക്കുന്നത്. 24 വേദികളാണ് കൊല്ലം നഗരത്തില് സജ്ജീകരിച്ചിരിക്കുന്നത്. ആദ്യദിവസം 23 വേദികളിലാണ് മത്സരങ്ങള് നടക്കുക. ഇത്തവണ ഹൈസ്കൂള്, ഹയര് സെക്കന്ഡറി വിഭാഗങ്ങളിലായി 239 ഇനങ്ങളില് 14,000 പ്രതിഭകള് മാറ്റുരയ്ക്കും.
ആണ്കുട്ടികള്ക്കും പെണ്കുട്ടികള്ക്കുമുള്ള താമസസൗകര്യം 31 സ്കൂളുകളുകളിലായി ഒരുക്കിയിട്ടുണ്ട്. പതിനാല് സ്കൂളുകളിലായി 2475 ആണ്കുട്ടികള്ക്കും ഒമ്പത് സ്കൂളുകളിലായി 2250 പെണ്കുട്ടികള്ക്കുമാണ് താമസ സൗകര്യം. കൂടാതെ എല്ലാ ടൗണ് ബസ് സര്വ്വീസുകളും കെഎസ്ആര്ടിസി, ഓര്ഡിനറി ബസുകളും ചിന്നക്കട ആശ്രമം വഴി കടപ്പാക്കട റൂട്ടിലൂടെ കലോത്സവം അവസാനിക്കുന്നതുവരെ സര്വ്വീസ് നടത്തും. എല്ലാ വേദികളിലേക്കും കെഎസ്ആര്ടിസിയും കൊല്ലം കോര്പ്പറേഷന്റെ നേതൃത്വത്തിലുള്ള ഗ്രാമവണ്ടിയും സൗജന്യയാത്ര ഒരുക്കുന്നതായിരിക്കും. ഇരുപത്തിയഞ്ച് ഓട്ടോറിക്ഷകള് വേദികളില് നിന്നും മറ്റു വേദികളിലേക്ക് മത്സരാര്ഥികളെ എത്തിക്കുന്നതിനായി സൗജന്യ സേവനവും നടത്തുന്നുണ്ട്. ഈ ഓട്ടോറിക്ഷകൾ പ്രത്യേകം ബോര്ഡ് വെച്ചായിരിക്കും സജ്ജീകരിച്ചിരിക്കുന്നതെന്നും അധികൃതർ അറിയിച്ചു.