ഓഗസ്റ്റ് 13 ന് ആരംഭിച്ച കനത്ത മഴയ്ക്ക് പിന്നാലെയുണ്ടായ ദുരന്തങ്ങളിൽ ഹിമാചലിലും ഉത്തരാഖണ്ഡിലും മരണസംഖ്യ 66 ആയി ഉയർന്നു. ഇതില്‍ 60 പേരും ഹിമാചല്‍ പ്രദേശിലാണ് മരിച്ചത്. അയല്‍ സംസ്ഥാനമായ ഉത്തരാഖണ്ഡില്‍ മഴക്കെടുതിയില്‍ മരിച്ചവരുടെ എണ്ണം ആറായി. അടുത്ത രണ്ട് ദിവസങ്ങളില്‍ ഹിമാചലിലും അടുത്ത നാല് ദിവസങ്ങളില്‍ ഉത്തരാഖണ്ഡിലും ഒറ്റപ്പെട്ട കനത്ത മഴ പെയ്യുമെന്ന് കാലാവസ്ഥാ നിരീക്ഷണ കേന്ദ്രം പ്രവചിച്ചു.
ഹിമാചലില്‍ 3 മൃതദേഹങ്ങള്‍ കൂടി കണ്ടെത്തി. ചൊവ്വാഴ്ച മണ്ണിടിച്ചിലുണ്ടായ പ്രദേശത്തെ അവശിഷ്ടങ്ങള്‍ക്കിടയില്‍ നിന്ന് മൂന്ന് മൃതദേഹങ്ങള്‍ കണ്ടെടുത്തു. ഷിംലയില്‍ തകര്‍ന്ന ശിവക്ഷേത്രത്തിന്റെ അവശിഷ്ടങ്ങള്‍ക്കിടയില്‍ നിന്ന് ഒരാളുടെ മൃതദേഹവും പുറത്തെടുത്തു. നഗരത്തിലുണ്ടായ മറ്റൊരു മണ്ണിടിച്ചിലില്‍ രണ്ട് പേര്‍ മരിച്ചു. ഷിംലയിലെ കൃഷ്ണനഗര്‍ പ്രദേശത്തുണ്ടായ മണ്ണിടിച്ചിലിനെ തുടര്‍ന്ന് ആറ് താല്‍ക്കാലിക വീടുകളടക്കം എട്ട് വീടുകള്‍ തകര്‍ന്നു. തിങ്കളാഴ്ച മുതല്‍ ആകെ 19 മൃതദേഹങ്ങള്‍ കണ്ടെടുത്തു. തിങ്കളാഴ്ച തകര്‍ന്ന ശിവക്ഷേത്രത്തില്‍ പത്തിലധികം പേര്‍ കുടുങ്ങിക്കിടക്കുന്നുണ്ട്. ഷിംലയിൽ ഓഗസ്റ്റ് 19 വരെ യെല്ലോ അലര്‍ട്ട് പ്രഖ്യാപിച്ചിട്ടുണ്ട്. പ്രതികൂല കാലാവസ്ഥയെ തുടര്‍ന്ന് സംസ്ഥാനത്തെ എല്ലാ സ്‌കൂളുകള്‍ക്കും കോളേജുകള്‍ക്കും ബുധനാഴ്ച അവധിയായിരിക്കുമെന്ന് വിദ്യാഭ്യാസ വകുപ്പ് പുറത്തിറക്കിയ ഉത്തരവില്‍ പറയുന്നു. കനത്ത മഴയെത്തുടര്‍ന്ന് ഹിമാചല്‍ പ്രദേശ് സര്‍വകലാശാല ഓഗസ്റ്റ് 19 വരെ ക്ലാസുകള്‍ നിര്‍ത്തിവച്ചു. സര്‍വകലാശാല ലൈബ്രറിയും ഓഗസ്റ്റ് 20 വരെ അടച്ചിടും.
ഉത്തരാഖണ്ഡില്‍ തിങ്കളാഴ്ച മുതല്‍ സംസ്ഥാനത്ത് കനത്ത മഴയാണ് പെയ്യുന്നത്. ഉത്തര്‍കാശി ജില്ലയിലെ ഗ്രാമങ്ങളില്‍ പവാര്‍ നദിയില്‍ നിന്ന് വെള്ളം കയറി കാണാതായ സ്ത്രീയുടെ മൃതദേഹം ചൊവ്വാഴ്ച കണ്ടെത്തി. അമ്മയ്ക്കും സഹോദരനുമൊപ്പം സഞ്ചരിച്ചിരുന്ന കാര്‍ ഒലിച്ചുപോയതിനെ തുടര്‍ന്ന് കാണാതായ 14 വയസ്സുള്ള തേജസ്വിനി എന്ന പെണ്‍കുട്ടിയുടെ മൃതദേഹം കണ്ടെത്തി. അമ്മയെയും സഹോദരനെയും കണ്ടെത്താനുള്ള തിരച്ചില്‍ തുടരുകയാണ്.
ഓഗസ്റ്റ് 19 വരെ അടുത്ത നാല് ദിവസത്തേക്ക് ഉത്തരാഖണ്ഡിലെ പല സ്ഥലങ്ങളിലും യെല്ലോ അലര്‍ട്ട് പ്രഖ്യാപിച്ചിട്ടുണ്ട്. ചമോലി ജില്ലയിലെ ജോഷിമഠിന് സമീപം ഹെലാങ്ങില്‍ ചൊവ്വാഴ്ച തകര്‍ന്ന കെട്ടിടത്തില്‍ നിന്ന് മൂന്ന് പേരെ രക്ഷപ്പെടുത്തിയതായും ഏതാനും പേര്‍ അവശിഷ്ടങ്ങള്‍ക്കിടയില്‍ കുടുങ്ങിയതായും അധികൃതര്‍ അറിയിച്ചു. രക്ഷപ്പെടുത്തിയവരെ ആശുപത്രിയിലേക്ക് മാറ്റിയതെന്ന് ജില്ലാ അഡീഷണല്‍ ഇന്‍ഫര്‍മേഷന്‍ ഓഫീസര്‍ രവീന്ദ്ര നേഗി പറഞ്ഞു. ഈ വര്‍ഷമാദ്യം ജോഷിമഠത്തില്‍ നിരവധി വീടുകള്‍ മണ്ണിടിഞ്ഞ് നാശം വിതച്ചിരുന്നു. കാലക്രമേണ മഴയുടെ തീവ്രത കുറയുമെങ്കിലും, വെള്ളപ്പൊക്കവും ഉരുള്‍പൊട്ടലും ബാധിച്ച പ്രദേശങ്ങളില്‍ ആളുകള്‍ പുറത്തിറങ്ങരുതെന്ന് മുന്നറിയിപ്പ് നല്‍കിയിട്ടുണ്ട്.