ദുബൈ-ഷാർജ റൂട്ടിൽ ജലഗതാഗത സംവിധാനം പുനരാരംഭിക്കുന്നു. നിർത്തിവെച്ചിരുന്ന ദുബായ് ഫെറി പ്രവർത്തനം ഓഗസ്റ്റ് 4 മുതൽ പുനരാരംഭിക്കുമെന്ന് ദുബായ് റോഡ്സ് ആൻഡ് ട്രാൻസ്പോർട്ട് അതോറിറ്റി അറിയിച്ചു. മറൈൻ ട്രാൻസ്പോർട്ട് സർവീസ് തിങ്കൾ മുതൽ വ്യാഴം വരെ (പ്രവൃത്തി ദിവസങ്ങൾ) എട്ട് പ്രതിദിന ട്രിപ്പുകൾ നടത്തും, വെള്ളിയാഴ്ച മുതൽ ഞായർ വരെ (വാരാന്ത്യങ്ങൾ) 6 ട്രിപ്പുകൾ നടത്തും. തടസ്സമില്ലാത്ത യാത്രയും ദുബൈ, ഷാർജ മേഖലയിലെ കടൽ കാഴ്ചകളും നിരവധി താമസക്കാരെയും വിനോദസഞ്ചാരികളെയും സർവിസ് പ്രയോജനപ്പെടുത്താൻ പ്രേരിപ്പിക്കുമെന്നാണ് അധികൃതർ പ്രതീക്ഷിക്കുന്നത്.
ദുബൈ റോഡ് ഗതാഗത അതോറിറ്റി, ഷാർജയിലെ റോഡ്സ് ആൻഡ് ട്രാൻസ്പോർട്ട് അതോറിറ്റിയുമായി സഹകരിച്ചാണ് സമുദ്രഗതാഗത പദ്ധതി നടപ്പാക്കുന്നത്. ദുബൈയിലെ അൽ ഗുബൈബ മറൈൻ സ്റ്റേഷനിൽ നിന്ന് ഷാർജയിലെ അക്വേറിയം മറൈൻ സ്റ്റേഷനിലേക്കാണ് സർവിസ്. 35 മിനിറ്റാണ് യാത്രാസമയം. രണ്ട് എമിറേറ്റുകൾക്കിടയിൽ കൂടുതൽ ഗതാഗത സൗകര്യങ്ങൾ ഒരുക്കുന്നതിന്റെ ഭാഗമായാണ് ഇരു സ്ഥലങ്ങളിലെയും ഗതാഗത വകുപ്പുകൾ പുതിയ സംവിധാനം ഒരുക്കിയത്.
തിങ്കൾ-വ്യാഴം ദിവസങ്ങളിൽ ഷാർജയിൽനിന്ന് രാവിലെ ഏഴിനും 8.30നും വൈകീട്ട് 4.45നും 6.15നുമാണ് സർവിസ്. ദുബൈയിൽനിന്ന് രാവിലെ 7.45, വൈകീട്ട് നാല്, 5.30, ഏഴ് എന്നീ സമയങ്ങളിലും സർവിസുണ്ടാകും. വെള്ളി-ഞായർ ദിവസങ്ങളിൽ ഷാർജയിൽനിന്ന് ഉച്ചക്ക് രണ്ടിനും വൈകീട്ട് നാല്, ആറ് എന്നീ സമയങ്ങളിലും ദുബൈയിൽനിന്ന് വൈകീട്ട് മൂന്ന്, അഞ്ച്, എട്ടുമണി സമയങ്ങളിലുമാണ് സർവിസ്.