ലോക കേരള സഭ സമ്മേളനത്തില് പങ്കെടുക്കാനായി മുഖ്യമന്ത്രി പിണറായി വിജയനും സംഘവും അമേരിക്കയിലെത്തി. കോണ്സല് ജനറല് രണ്ദീപ് ജയ്സ്വാള്, നോര്ക്ക ഡയറ്കടര് കെ അനിരുദ്ധന് തുടങ്ങിയവര് മുഖ്യമന്ത്രിയെയും സംഘത്തെയും സ്വീകരിച്ചു. മൂന്ന് ദിവസങ്ങളിലായാണ് അമേരിക്കയിൽ ലോക കേരള സഭയുടെ മൂന്നാം സമ്മേളനം നടക്കുന്നത്. നാളെയാണ് ഔദ്യോഗിക ഉദ്ഘാടന ചടങ്ങ് നടക്കുക. പ്രാദേശിക സമയം രാവിലെ 9.30 ന് നടക്കുന്ന ചടങ്ങില് മുഖ്യമന്ത്രി സമ്മേളനം ഉദ്ഘാടനം ചെയ്യും. സ്പീക്കര് ഷംസീര് അധ്യക്ഷനാകും. ധനമന്ത്രി ബാലഗോപാല് മുഖ്യപ്രഭാഷണം നടത്തും. ന്യൂയോര്ക്ക് സമയം വൈകീട്ട് ആറരയ്ക്ക് സൗഹൃദസമ്മേളനത്തോടെ ലോകകേരള സഭയുടെ അമേരിക്കന് മേഖലാ സമ്മേളനത്തിന് ഇന്ന് തുടക്കമാകും.
സ്പീക്കര് എഎന് ഷംസീര്, ധനമന്ത്രി കെഎന് ബാലഗോപാല്, ജോണ് ബ്രിട്ടാസ് എം പി, ചീഫ് സെക്രട്ടറി വി പി ജോയ്, മുഖ്യമന്ത്രിയുടെ ഭാര്യ കമല എന്നിവരും നോര്ക്ക ഭാരവാഹികളുമാണ് സംഘത്തിലുള്ളത്. അമേരിക്കയിലെ മലയാളി നിക്ഷേപകര്, പ്രവാസി മലയാളികള് തുടങ്ങിയവരുമായി കൂടിക്കാഴ്ച നടത്തും. വൈകീട്ട് ന്യൂയോര്ക്ക് ടൈംസ് സ്ക്വയറില് നടക്കുന്ന പൊതുസമ്മേളനത്തില് മുഖ്യമന്ത്രിപിണറായി വിജയന് പ്രവാസി സമൂഹത്തെ അഭിസംബോധന ചെയ്ത് സംസാരിക്കും.
യുഎന് ആസ്ഥാനത്തും മുഖ്യമന്ത്രി സന്ദര്ശനം നടത്തും. തുടര്ന്ന് ജൂണ് 14 ന് ന്യൂയോര്ക്കില് നിന്ന് ഹവാനയിലേക്ക് തിരിക്കും. ജൂണ് 15 ,16 തീയതികളില് ക്യൂബയും മുഖ്യമന്ത്രി സന്ദര്ശിക്കും. ഹവാനയിലെ വിവിധ പരിപാടികളില് മുഖ്യമന്ത്രി പങ്കെടുക്കും. ആരോഗ്യമന്ത്രി വീണാ ജോര്ജും ക്യൂബാ സന്ദര്ശന സംഘത്തിലുണ്ട്.