കാലങ്ങളിൽ നിന്ന് കാലങ്ങളിലൂടെ സഞ്ചരിച്ച അഭിനേത്രിയായിരുന്നു കെപിഎസി ലളിത. ബ്ലാക്ക് ആൻഡ് വൈറ്റ് സിനിമകളിൽ തുടങ്ങി നൂതന സാങ്കേതികത്വത്തിന്റെ ഏറ്റവും പുതിയ തലങ്ങളിലൂടെ വരെ സഞ്ചരിക്കാൻ കെ പി എസിലളിതയ്ക്ക് സാധിച്ചു. അതുകൊണ്ടുതന്നെ തലമുറകളോളം പകർന്നാട്ടം നടത്തിയ ആ മഹാനടിയെ ഓർക്കാത്തവരും അറിയാത്തവരുമായി മലയാളത്തിൽ ആരും ഉണ്ടാകില്ല . തന്റെ സ്വതസിദ്ധമായ അഭിനയ ശൈലി കൊണ്ടും കഴിവ് കൊണ്ടും സിനിമാലോകത്തെയും പ്രേക്ഷകരെയും പിടിച്ചിരുത്തിയ നടിയാണ് കെപിഎസി ലളിത.
തന്റെ ജീവിതം തന്നെ തൊഴിലിനായി ഉഴിഞ്ഞുവെച്ച ആദ്യന്തം കലാ ജീവിതത്തോട് ആത്മാർത്ഥത പുലർത്തിയ സ്ത്രീയായിരുന്നു അവർ. ചിരിപ്പിച്ചും കരയിപ്പിച്ചും കാലങ്ങളോളം നമ്മോടൊപ്പം സഞ്ചരിച്ച ആ അമ്മ മനസ്സ് ഇന്ന് നമ്മളോടൊപ്പം ഇല്ല എന്ന സത്യം ഉൾക്കൊള്ളുക എന്നത് തന്നെ ഏറെ ശ്രമകരം. ഒരാൾക്ക് പകരമാവാൻ മറ്റൊരാൾക്ക് ഒരിക്കലും കഴിയില്ല… എത്രയോ സത്യവത്തായ കാര്യം. ചില നഷ്ടങ്ങളുടെ ഓർമ്മകൾ ഒരിക്കലും നമ്മെ വിട്ടു പോകില്ല.. അവരുടെ ഓർമ്മകൾ…. കഥാപാത്രങ്ങളായും വാക്കുകളാലും നമ്മുടെയുള്ളിൽ അലയടിച്ചു കൊണ്ടേയിരിക്കും.. അത്തരം ഒരു വ്യക്തിത്വത്തിന് ഉടമയാണ് ഏവരുടെയും ലളിതാമ്മ എന്ന കെപിഎസി ലളിത… അവർക്കൊരിക്കലും അരങ്ങൊഴിയാൻ കഴിയില്ല..
അമ്മയായും ചേച്ചിയായും മോഡേൺ ആന്റി ആയും ഒക്കെ മലയാളികളുടെ മനസ്സിൽ എന്നും നിറഞ്ഞുനിൽക്കും കെപിഎസി ലളിത. അവരുടെ ഓർമ്മകൾക്ക് ഒരിക്കലും മരണമില്ല… കഥാപാത്രങ്ങളുടെ രൂപഭാവങ്ങൾക്ക് അനുസരിച്ച് അഭിനയിക്കുകയായിരുന്നില്ല കെ.പി.എ.സി ലളിത ചെയ്തിരുന്നത്… കഥാപാത്രങ്ങൾക്ക് ജീവൻ പകർന്ന് അതിലൂടെ ജീവിക്കുകയായിരുന്നു… അതുകൊണ്ടുതന്നെയാണ് കെ പി എ സി ലളിത എല്ലാവർക്കും ഇത്രയേറെ പ്രിയങ്കരി ആയത്….ലളിതാമ്മയുടെ സ്നേഹത്താൽ പൊതിഞ്ഞ അമ്മ കഥാപാത്രങ്ങളെ ഓർക്കാതിരിക്കാൻ തരമില്ല… അമ്മയുടെ സ്നേഹം നുകർന്ന ഏതൊരാളുടെയും മനസ്സിൽ ലളിതാമ്മ എന്നും തന്റെ അമ്മ തന്നെ. കഥാപാത്രങ്ങളിലൂടെ ജീവിച്ച് പ്രേക്ഷക മനസ്സിൽ ഇടം പറ്റിയ കഥാപാത്രങ്ങൾ ഏറെ ലളിതയുടെതായിട്ടുണ്ട്. അതുപോലെ തന്നെ ഹാസ്യ കഥാപാത്രങ്ങളിലൂടെ നമ്മളെ ചിരിപ്പിച്ചും തന്നോടൊപ്പം കൂട്ടാൻ കെപിഎസി ലളിതയ്ക്ക് കഴിഞ്ഞിട്ടുണ്ട്.
കായംകുളത്താണ് കെപിഎസി ലളിത ജനിച്ചത്. മഹേശ്വരിയമ്മ എന്ന യഥാർത്ഥ പേരിലുള്ള കെപിഎസി ലളിത പത്താം വയസ്സുമുതൽ തന്റെ നാടക ജീവിതം ആരംഭിച്ചു. ബാലി എന്ന നാടകത്തിലൂടെ അരങ്ങേറ്റം നടത്തിയ മഹേശ്വരിയമ്മ പിന്നീട് കെപിഎസിയിൽ ചേരുകയായിരുന്നു. അവിടെ നിന്ന് ഇങ്ങോട്ട് കെ.പി.എ സി ലളിതയായി.
‘ കൂട്ടുകുടുംബം’ എന്ന ചിത്രം ആയിരുന്നു കെപിഎസി ലളിത ആദ്യമായി അഭിനയിച്ച മലയാള ചിത്രം. തുടർന്ന് നിരവധി ചിത്രങ്ങളിലൂടെ വിവിധ കഥാപാത്രങ്ങൾ. മലയാളത്തിലെ ചലച്ചിത്ര സംവിധായകനായ ഭരതനെ വിവാഹം കഴിച്ചു. പിന്നീട് മണിച്ചിത്രത്താഴ്, തേന്മാവിൻ കൊമ്പത്ത്, വെള്ളാനകളുടെ നാട്, വീണ്ടും ചില വീട്ടുകാര്യങ്ങൾ, അമ്മ കിളിക്കൂട്, തുടങ്ങി ഹിറ്റ് സിനിമകളിൽ ശ്രദ്ധേയങ്ങളായ വേഷങ്ങൾ കൈകാര്യം ചെയ്തു. മലയാളത്തിലും തമിഴിലുമായി 600 ഓളം ചിത്രങ്ങളിലാണ് കെപിഎസി ലളിത തന്റെ കഴിവ് തെളിയിച്ചത്. കെപിഎസി ലളിതയുടെ കഴിവ് കലാലോകം അംഗീകരിച്ചതിന് തെളിവായി തന്നെയാണ് അവർക്ക് 1990 ലും 2000 ലുമായി ‘അമരം,’ ‘ശാന്തം’ എന്നീ ചിത്രങ്ങളിലെ അഭിനയത്തിന് മികച്ച സഹനടിക്കുള്ള ദേശീയ ചലച്ചിത്ര പുരസ്കാരവും, നീല പൊന്മാൻ, കടിഞ്ഞൂർ കല്യാണം, ഗോഡ് ഫാദർ, സന്ദേശം എന്നീ ചിത്രങ്ങളിലെ അഭിനയത്തിന് സംസ്ഥാന ചലച്ചിത്ര പുരസ്കാരവും ലഭിച്ചത്.
ഒരായുഷ്ക്കാലം മുഴുവൻ തന്റെ സ്വതസിദ്ധമായ അഭിനയ ശൈലി കൊണ്ട് പ്രേക്ഷകലക്ഷങ്ങളെ ചിരിപ്പിച്ചും ചിന്തിപ്പിച്ചും കരയിച്ചും ജീവിച്ചു പോയ ആ അഭിനയ പ്രതിഭയ്ക്ക് മുന്നിൽ നമസ്കരിക്കാം. ആ ഓർമ്മകൾക്ക് മുന്നിൽ ഒരു പിടി കണ്ണീർ പുഷ്പങ്ങൾ…