യുഎഇയിലെ ആലുവ നിവാസികളുടെ കൂട്ടായ്മയായ ആലുവ റസിഡൻസ് ഓവർസീസ് മലയാളീസ് അസോസിയേഷൻ ‘അരോമ’ യുടെ ഇരുപതാം വാർഷികാഘോഷം ഇന്ന് നടക്കും. ആലുവ എംഎൽഎ അൻവർ സാദത്ത് വാർഷികാഘോഷം ഉദ്ഘാടനം ചെയ്യും. അരോമ പ്രസിഡൻറ് സിദ്ധീഖ് മുഹമ്മദിൻറെ അധ്യക്ഷതയിൽ ഇന്ന് വൈകുന്നേരം 3 മണി മുതൽ ദുബായ് ഷെയ്ക്ക് റാഷിദ് ഓഡിറ്റോറിയത്തിൽ ആണ് പരിപാടികൾ തുടങ്ങുക. സിനിമാതാരം നിവിൻപോളി മുഖ്യാതിഥിയായിരിക്കും.
ചടങ്ങിൽ അരോമ ജനറൽ സെക്രട്ടറി നാദിർഷാ അലി അക്ബർ അരോമയുടെ “ഭവനമില്ലാത്തവർക്ക് ഭവനം” എന്ന പദ്ധതിയുടെ രൂപരേഖ അവതരിപ്പിക്കും. ഋഷിരാജ്സിംഗ് ഐപിഎസ്, ഐജി. പി. വിജയൻ, ഡോ.എം.ബീന ഐഎഎസ്, അഡ്വ. വൈ. എ റഹിം, മുഹമ്മദ് കെ മക്കാർ, മൊയ്തീൻ അബ്ദുൽ അസീസ് തുടങ്ങിയവർ പങ്കെടുക്കും. സിനിമാ പിന്നണി ഗായകരായ അമൃത സുരേഷ്, മുഹമ്മദ് അഫ്സൽ, സുമി അരവിന്ദ്, നീതു ജിനു, ബൈജു ഫ്രാൻസിസ്, അക്ബർഷാ തുടങ്ങിയവരുടെ ഗാനമേളയും കോമഡി ഷോ മറിമായത്തിലെ എല്ലാ കലാകാരന്മാരും അണിനിരക്കുന്ന സ്കിറ്റുകളും സിനിമ-ടെലിവിഷൻ താരം ഡയാന നയിക്കുന്ന നൃത്തപരിപാടികളും അരങ്ങേറും. ചടങ്ങിൽ ജനറൽ കൺവീനർ ഷിഹാബ് മുഹമ്മദ് സ്വാഗതവും വനിതാ വിഭാഗം പ്രസിഡൻറ് ഫെബിൻ ഷിഹാബ് നന്ദിയും രേഖപ്പെടുത്തും
ഇരുപത് വർഷങ്ങൾക്കു മുൻപ് ദുബായിൽ രൂപീകരിച്ച ആലുവ റസിഡൻസ് ഓവർസീസ് മലയാളീസ് അസോസിയേഷൻ വാർഷികത്തിൻറെ ഭാഗമായി ‘ഭവനമില്ലാത്തവർക്ക് ഭവനം’ എന്ന പദ്ധതിയിലുടെ, നിർധനരായ 9 പേർക്ക് വീടുവച്ചു നല്കുന്നതിനുള്ള പ്രാരംഭ പ്രവർത്തനങ്ങൾ ആരംഭിച്ചു കഴിഞ്ഞു. ഇതിനായി 20 സെൻറ് സ്ഥലം ഇതിനോടകം വാങ്ങിയിട്ടുണ്ട്. ഇവിടെ എല്ലാ സൌകര്യങ്ങളോടും കൂടിയ 9 ഫ്ലാറ്റുകൾനിർമ്മിക്കാനാണ് പദ്ധതി.
സാമൂഹ്യപ്രവർത്തന രംഗത്ത് സജീവമായ അരോമ ആലുവയിലെ സർക്കാർ ആശുപത്രിയിൽ സൗജന്യ ഡയാലിസിസിനായി മൂന്നു ഡയാലിസിസ് മെഷീനുകളും നൽകിയിരുന്നു. നിർധനരായ 11 പെൺകുട്ടികൾക്ക് 10 പവൻ സ്വർണ്ണാഭരണങ്ങളും 50,000 രൂപയും വിവാഹപ്പുടവയും നല്കിയതായും കോവിഡ് കാലത്ത് നാട്ടിലും ഗൾഫിലും നിരവധി കാരുണ്യപ്രവർത്തനങ്ങളും അരോമയുടെ നേതൃത്വത്തില് നടത്തിയതായും അരോമ ഭാരവാഹികൾ വ്യക്തമാക്കി.